சிறப்பு செய்திகள்

இஸ்ரோ விஞ்ஞானிகள் சாதனை – புதிய மைல் கல்லை எட்டியுள்ளதாக முதலமைச்சர் பாராட்டு

சென்னை

நேற்று முன்தினம் பி.எஸ்.எல்.வி. சி- 48 ராக்கெட்டை வெற்றிகரமாக விண்ணில் செலுத்தி நிலை நிறுத்தப்பட்டுள்ளது. இது இஸ்ரோ விஞ்ஞானிகள் அளப்பரிய சாதனையாகும். இதற்கு முதலமைச்சர் எடப்பாடி கே.பழனிசாமி பாராட்டு தெரிவித்துள்ளார்.

இது குறித்து அவர் வெளியிட்டுள்ள அறிக்கையில் கூறியிருப்பதாவது:-

நாட்டின் பாதுகாப்பு, இயற்கை வளங்கள் ஆய்வு போன்றவற்றிற்காக 11.12.2019 அன்று 50-வது பி.எஸ்.எல்.வி. ராக்கெட் இஸ்ரோ விஞ்ஞானிகளால் வெற்றிகரமாக விண்வெளியில் செலுத்தப்பட்ட நிகழ்வு, இந்திய திருநாட்டிற்கு மேலும் பெருமை சேர்த்துள்ளது. பி.எஸ்.எல்.வி. 2- 48 ராக்கெட்டை விண்ணில் செலுத்தியதன் மூலம் இஸ்ரோ விஞ்ஞானிகள் புதிய மைல் கல்லை எட்டியுள்ளனர்.

பி.எஸ்.எல்.வி. ராக்கெட்டை விண்ணில் ஏவுவதற்காக அல்லும், பகலும் அயராது பாடுபட்ட இஸ்ரோ தலைவர், விஞ்ஞானிகள், பொறியாளர்கள் மற்றும் பணியாளர்கள் ஆகியோரது முயற்சியும், உழைப்பும் மிகவும் பாராட்டுக்குரியது. இந்தச் சாதனை இளைய தலைமுறையினரை உற்சாகப்படுத்தி அவர்களை விண்வெளி ஆராய்ச்சியில் ஈடுபட ஊக்குவிக்கும். இஸ்ரோ தலைவர், விஞ்ஞானிகள், பொறியாளர்கள் மற்றும் பணியாளர்கள் பற்பல சாதனைகள் படைத்து நம் தாய் திருநாட்டிற்கு மேலும் பெருமை சேர்த்திட இத்தருணத்தில் என் சார்பாகவும், தமிழ்நாட்டு மக்கள் சார்பாகவும் மனதார வாழ்த்துகிறேன்.

இவ்வாறு முதலமைச்சர் எடப்பாடி கே.பழனிசாமி வெளியிட்டுள்ள அறிக்கையில் தெரிவித்துள்ளார்.