கோவை

எதிர்க்கட்சிகளின் சூழ்ச்சிகளை முறியடித்து கழக கூட்டணி அமோக வெற்றி பெறும் – பி.ஆர்.ஜி.அருண்குமார் பேச்சு…

கோவை:-

எதிர்க்கட்சிகளின் சூழ்ச்சிகளை முறியடித்து கழக கூட்டணி அமோக வெற்றி பெறும் என்று கோவை மாநகர் மாவட்ட கழக செயலாளர் பி.ஆர்.ஜி.அருண்குமார் தெரிவித்தார்.

கோவையில் பா.ஜ.க. வேட்பாளர் சி.பி.ராதாகிருஷ்ணனை ஆதரித்து மாநகர் மாவட்ட கழக செயலாளர் பி.ஆர்.ஜி அருண்குமார் எம்.எல்.ஏ. கோவை வடக்கு சட்டமன்ற தொகுதிக்கு உட்பட்ட நல்லாம்பாளையம் பகுதிகளில் வீடு வீடாக சென்று தீவிர வாக்கு சேகரிப்பில் ஈடுபட்டார். அவருடன் பொதுக்குழு உறுப்பினர் வெண்தாமரை பாலு, பகுதி செயலாளர் ஜி.கே சண்முகம், கணபதி ஜெயபிரகாஷ், பேச்சாளர் அசோக் உள்பட கழக நிர்வாகிகள் மற்றும் கூட்டணி கட்சி நிர்வாகிகள் பலர் இணைந்து பிரச்சாரம் செய்து தாமரை சின்னத்தில் வாக்கு சேகரித்தனர்.

பிரச்சாரத்தின்போது மாநகர் மாவட்ட கழக செயலாளர் பி.ஆர்.ஜி.அருண்குமார் எம்.எல்.ஏ. பேசியதாவது:-

கடந்த 15 ஆண்டுகளில் மத்தியிலும் மாநிலத்திலும் ஆட்சியில் இருந்த திமுக மக்களுக்கு செய்தது என்ன? கருணாநிதி காங்கிரசுடன் கூட்டணி கிடையாது என்று கடைசியாக சொன்னார். ஆனால் அவரது மகன் ஓட்டு வங்கி இல்லாத கட்சிகளுக்கு 10 சீட் கொடுத்து ராகுல் பிரதமர் என முன்மொழிகிறார்.

தமிழகத்தில் கடந்த திமுக ஆட்சியில் ஊழல், வன்முறை, நில அபகரிப்பு என சட்டம்- ஒழுங்கு கெட்டு கிடந்தது. ஆனால் இன்று தமிழகத்தில் நல்லாட்சி நடக்கிறது. தமிழகத்தில் மின்வெட்டே கிடையாது. காரணம் அம்மா அவர்கள் வழியில் முதல்வர், துணை முதல்வர் ஆகியோர் சிறப்பாக ஆட்சி நடத்தி வருகின்றனர். புரட்சித்தலைவி அம்மா அவர்கள் பொங்கல் பரிசு தொகுப்புடன் ரூ.100 வழங்கினார். தற்போது பொங்கல் பரிசு தொகுப்புடன் ரூ.ஆயிரம் வழங்கப்பட்டது. அம்மா வழியில் ஏழை எளிய மக்களின் துன்பங்களை துடைக்கும் அரசாக இந்த அரசு விளங்குகிறது.

மு.க.ஸ்டாலின் துண்டு சீட்டு வைத்து கூட ஒழுக்கமாக படிக்கத் தெரியவில்லை, பழனிசாமி முதல்வராக எடப்பாடி காரணம் என்றும், திருப்பூருக்கு துறைமுகம் கட்டித் தருவேன் என்றும், ஜப்பானின் துணை முதல்வராக இருந்தேன் என்று தினம் ஒரு தமாஷ் செய்கிறார். ஸ்டாலின் கூடாரம் இந்த தேர்தலோடு ஒழிந்து விடும். தமிழினத் துரோகம் செய்த திமுக, காங்கிரஸ் துணையுடன் மீண்டும் வந்து விடலாம் என நினைக்கிறது. மானமுள்ள தமிழன் திமுகவிற்கு ஓட்டு போட மாட்டான்.

திமுக ஒரு கார்ப்பரேட் கம்பெனி. ஊழல்வாதிகளுக்கு மீண்டும் சீட் தந்துள்ளது. சேது சமுத்திர திட்டத்தில் கடலில் மண்ணை தோண்டி ரூ.40 ஆயிரம் கோடியை வீணடித்துள்ளனர். 2ஜி ஊழல் என நவீன ஊழலில் திமுக தவிர வேறு யாராலும் செய்ய முடியாது.

மோடி ஆட்சியில் நாட்டில் ஒரு மத கலவரம் கிடையாது, இனக்கலவரம் கிடையாது. வலிமையான இந்தியாவை உருவாக்க பிரதமராக மோடி மீண்டும் வர வேண்டும். எதிரிகளின் சூழ்ச்சிகளை முறியடித்து கழக கூட்டணி மாபெரும் வெற்றி பெறும். எனவே கோவை நாடாளுமன்ற தொகுதியில் போட்டியிடும் சி.பி ராதாகிருஷ்ணனுக்கு உங்களது பொன்னான, முத்தான வாக்குகளை தாமரை சின்னத்திற்கு தாருங்கள்.

இவ்வாறு பி.ஆர்.ஜி.அருண்குமார் எம்.எல்.ஏ. பேசினார்.