தற்போதைய செய்திகள்

சிறுமலையில் ரூ.5 கோடியில் உயிர்பன்மை பூங்கா – அமைச்சர் திண்டுக்கல் சி.சீனிவாசன் அடிக்கல் நாட்டினார்

திண்டுக்கல்

சிறுமலையில் ரூ.5 கோடி மதிப்பீட்டில் அமைக்கப்பட உள்ள உயிர்பன்மை பூங்காவுக்கு வனத்துறை அமைச்சர் திண்டுக்கல் சி.சீனிவாசன் அடிக்கல் நாட்டினார்.

திண்டுக்கல் மாவட்டம், சிறுமலையில் ரூ.5 கோடி மதிப்பீட்டில் அமைக்கப்பட உள்ள உயிர்பன்மை பூங்காவிற்கு மாவட்ட ஆட்சித்தலைவர் மு.விஜயலட்சுமி தலைமையில் நேற்று வனத்துறை அமைச்சர் திண்டுக்கல் சி.சீனிவாசன் அடிக்கல் நாட்டினார்.

பின்னர் அவர் செய்தியாளர்களிடம் கூறியதாவது:-

புரட்சித்தலைவி அம்மா அவர்களின் வழியில் சிறப்பாக செயல்பட்டு கொண்டிருக்கும் முதலமைச்சர் எடப்பாடி கே.பழனிசாமி பொதுமக்களின் தேவையை அறிந்து தொலைநோக்குப் பார்வையுடன் பல்வேறு துறைகளில் திட்டங்களை சிறப்பாக செயல்படுத்தி தமிழகத்தை வளச்சிப் பாதையில் வழிநடத்தி வருகிறார்.

திண்டுக்கல் மாவட்டத்தில் மேற்கு தொடர்ச்சி மலையில் அமைந்துள்ள கொடைக்கானல் மலைக்கு அருகில் சிறுமலை உள்ளது. சிறுமலையில் வளமான பல்லுயிர் வகை காடுகளும், அதேநேரத்தில் நடுமலைப் பகுதியில் வெப்ப மண்டல வறண்ட இலையுதிர் காடுகளும் அமைந்துள்ளன.

இங்கு வளர்ந்து வரும் மக்கள்தொகை பெருக்கம் மற்றும் காப்பி தோட்டங்கள், பழத் தோட்டங்கள், பல காய்கறி பயிர்கள் பயிரிடுதல் ஆகியவற்றின் விளைவாக சிறுமலையில் உள்ள அரியவகை தாவரங்களும் அழிவின் விளிம்பிற்கு தள்ளப்பட்டுள்ளன. சிறுமலையின் தாவரங்கள் கணக்கெடுப்பு ஆய்வின்படி தென்னிந்தியாவில் உள்ள தாவர வகைகளில் 536 உயிர் தாவரங்களையும், 895 சிற்றினங்களையும் கொண்டுள்ளதாக கண்டறியப்பட்டுள்ளது.

மேலும், காட்டெருமை, செந்நாய், மான், கேளையாடு, கரடி, முள்ளம்பன்றி, நரி, குரங்கு, சாம்பல் அணில், கீரி, பாம்பு, ஆந்தை, கழுகு, பட்டாம்பூச்சிகள் போன்ற உயிரினங்களும், தனக்கு, உசில், மருதமரம் என பல்லுயிர் பெருகி கிடக்கும் பசுஞ்சோலை சிறுமலைக்காடாகும். மேலும் சிறுமலையின் சீதோசன நிலையும் மற்றும் பசுமை நிறைந்த புல்வெளிகளும் சுற்றுலா பயணிகளை வெகுவாக கவருவதாக உள்ளது. மேலும் சிறுமலை பகுதி பல்வேறு மருத்துவ மூலிகைகளையும், அரியவகை மற்றும் அழிந்து வரும் மரங்களையும் உள்ளடக்கிய பகுதி என்பதால், இங்கு பல்லுயிர் பெருக்க பூங்கா அமைவதற்கு ஏதுவான இடமாகும்.

வளர்ந்து வரும் நகரங்கள் மற்றும் நகர்ப்புறங்களில் இழந்த பன்முகத்தன்மையை மீட்டெடுக்கும் விதமாக அரிதான மற்றும் அழிவின் தருவாயில் உள்ள உயிரினங்கள் மற்றும் தாவரங்களை பாதுகாக்கும் வகையில் முதலமைச்சர், சிறுமலையில் 100 ஏக்கர் பரப்பளவில் ரூ.5 கோடி திட்ட மதிப்பீட்டில் உயிர்பன்மை பூங்கா அமைப்பதற்கான அறிவிப்பினை வெளியிட்டார்.

திண்டுக்கல் வனக்கோட்டம், சிறுமலை வனச்சரகம், சிறுமலை பகுதியில் சுமார் 100 ஏக்கர் பரப்பளவில் அமையவுள்ள உயிர்பன்மை பூங்காவிற்கான இடம் 12.08.2019 அன்று தேர்வு செய்யப்பட்டது. மேலும் இத்திட்டத்தின் கீழ் 2019-2020-ம் நிதியாண்டில் உயிர்பன்மை பூங்காவிற்கு பாதுகாப்பு அளிக்கும் வகையில் வேலி அமைக்கும் பணி மற்றும் பூங்காவில் நடைபாதைகள் அமைக்கும் பணிகள் இந்நிதியாண்டில் மேற்கொள்ளப்பட உள்ளது.

பல்லுயிர் பெருக்கம் பற்றி விளக்கும் மையங்கள், சிறுமலை இயற்கை அழகை காணும் வண்ணம் வாட்ச் டவர் அமைக்கும் பணி ஆகியவை சுமார் ரூ.2.05 கோடி மதிப்பீட்டில் 2020-2022-ம் நிதியாண்டில் பல்வேறு விதமான பூங்காக்கள் அமைக்கப்பட உள்ளன. மேலும் இப்பூங்கா, மூன்று ஆண்டுகளில் திட்டப்பணிகள் மேற்கொள்ளப்பட்டு 2021-2022-ஆம் ஆண்டு பொதுமக்கள் பயன்பாட்டிற்கு வரவுள்ளது.

சிறுமலையில் உயிர்பன்மை பூங்கா அமைவதன் மூலமாக, அரியவகை மூலிகை தாவரங்களையும், அரியவகை மரங்களை பற்றியும் மக்களுக்கு விழிப்புணர்வு ஏற்படவும், அவற்றின் அவசியத்தை மக்களுக்கு உணர்த்தவும் வாய்ப்பாக இருக்கும். மேலும், இப்பூங்காவில் மூங்கில் பூங்கா, ஆர்க்கிடோரியம் பூங்கா, பட்டாம்பூச்சி பூங்கா மற்றும் சிறுவர், சிறுமியருக்கான விளையாட்டு பூங்கா, பல்லுயிர் பெருக்கத்தின் அவசியத்தை விளக்கும் வண்ணம் பல்வேறு வசதிகளுடன் கூடிய பார்வையாளர் தகவல் மையம் அமைத்தல்,

கள்ளிச்செடி தோட்டம், பனைப்பூங்கா போன்ற பல்வேறு சிறப்பம்சங்களை உள்ளடங்கியதாக அமைப்பதன் மூலம் இயற்கை வளத்தினை பாதுகாப்பதின் அவசியத்தை அறியவும், வனத்தினை பற்றிய கல்வி அறிவினையும் மக்களுக்கு வழங்குவதற்கும், சுற்றுச்சூழல் மேம்பாட்டுக்கு குழுக்கள் அமைத்து அதன் மூலம் வேலைவாய்ப்பினை உருவாக்குவதற்கும் ஒரு வாய்ப்பாக அமையும்.

மேலும் சுற்றுலாப் பயணிகளின் வசதிக்கேற்ப தங்கும் விடுதி அமைத்தல், உணவகங்கள், இப்பகுதியில் சுற்றுலா இடங்கள் குறித்து சுற்றுலாப் பயணிகளுக்கு விளக்குவதற்கென சுற்றுலா வழிகாட்டிகள் நியமித்தல், பேருந்து வசதிகள் போன்றவைகளை ஏற்படுத்தி சுற்றுலாப்பயணிகளை கவரும் வகையில் நடவடிக்கை மேற்கொள்ளப்படவுள்ளது. இதுபோன்று, சிறுமலை பகுதியை சுற்றுலாத்தலமாக மேம்படுத்துவதற்கான நடவடிக்கைகள் துரிதமாக மேற்கொள்ளப்படுகிறது.

இவ்வாறு அமைச்சர் திண்டுக்கல் சி.சீனிவாசன் கூறினார்.

இந்நிகழ்ச்சியில், மாவட்ட வருவாய் அலுவலர் பா.வேலு, தலைமை வன பாதுகாவலர் வே.திருநாவுக்கரசு, மத்திய கூட்டுறவு வங்கித்தலைவர் வி.மருதராஜ், திண்டுக்கல் மாவட்ட கூட்டுறவு ஒன்றிய தலைவர் சி.எஸ்.ராஜ்மோகன், அறங்காவலர்கள் தேர்வு குழு தலைவர் பிரேம்குமார், ஒன்றிய குழு உறுப்பினர் கனிராஜன், மாவட்ட வன அலுவலர்கள் ச.வித்யா, தேஜஸ்வி, சிறுமலை வனச்சரக அலுவலர் கா.மனோஜ், கூட்டுறவு அச்சக சங்கத் தலைவர் அ.ஜெயசீலன் மற்றும் வனத்துறை அலுவலர்கள் கலந்து கொண்டனர்.