விருதுநகர்

தீவிரவாத மிரட்டல்களை எதிர்கொள்ள மோடியை மீண்டும் பிரதமராக்குவோம் – நடிகர் சரத்குமார் பிரச்சாரம்

விருதுநகர்:-

தீவிரவாத மிரட்டல்களை எதிர்கொள்ள மோடியை மீண்டும் பிரதமர் ஆக்குவோம் என்று நடிகர் சரத்குமார் கூறினார்.

விருதுநகர் மக்களவை தொகுதி தே.மு.தி.க. வேட்பாளர் அழகா்சாமி, சாத்தூா் சட்டப்பேரவை தொகுதி கழக வேட்பாளர் ராஜவா்மன், தென்காசி மக்களவை தொகுதியில் இரட்டை இலை சின்னத்தில் போட்டியிடும் டாக்டா் கிருஷ்ண்சாமி ஆகியோருக்கு ஆதரவாக விருதுநகா் மாவட்டத்தில் விருதுநகா், திருத்தங்கல், சிவகாசி, சாத்தூர், திருவில்லிபுத்தூா், ராஜபாளையம் ஆகிய பகுதிகளில் சமத்துவ மக்கள் கட்சியின் தலைவர் நடிகா் சரத்குமார் பிரச்சாரம் செய்தார்.

அப்போது அவர் பேசியதாவது:-

இளைய சமுதாயத்தினர் எதிர்காலத்தில் நல்ல வாழ்வாதாரம் பெற்றிட மத்தியில் நல்ல ஆட்சி, வலுவான ஆட்சி தொடர வேண்டும். அண்டை நாடான சீனா, பாகிஸ்தானின் அச்சுறுத்தல்கள், தீவிரவாதிகளின் மிரட்டல்கள் ஆகியவற்றை எதிர்கொள்ள வலிமையான பிரதமர் வேண்டும். எனவே பிரதமராக மோடி மீண்டும் பொறுப்பு ஏற்க வேண்டும். இதற்கு 40 தொகுதிகளிலும் நாம் வெற்றி பெற்றாக வேண்டும். ஒவ்வொரு அரசியல் கட்சியிலும் மாறுபட்ட கொள்கைகள் இருக்கலாம். வேறுபட்ட கோட்பாடுகள் இருக்கலாம். ஆனால் மத்தியில் வலிமையான ஆட்சி வேண்டும் என்பதற்காகத்தான் கழகத்தின் தலைமையில் மெகா கூட்டணி அமைந்துள்ளது.

தி.மு.க., காங்கிரஸ் கூட்டணி ஊழல் கூட்டணி. 10 ஆண்டு கால காங்கிரஸ் ஆட்சியில் தி.மு.க.வும் அங்கம் வகித்தது. 2006-ம் ஆண்டு முதல் 2008-ம் ஆண்டு வரை ஹெலிகாப்டர் ஊழலில் ரூ.200 கோடி, 2ஜி ஊழலில் ரூ.1 லட்சத்து 70 ஆயிரம் கோடி, நிலக்கரி ஊழலில் ரூ.1 லட்சத்து 80 ஆயிரம் கோடி என ஊழல் செய்தனர். அவர்கள் மீண்டும் ஆட்சிக்கு வரக்கூடாது. தர்மத்துக்கும், அதர்மத்துக்கும் இடையே நடக்கும் போட்டி தான் இந்த தேர்தல். கழகத்தின் தலைமையிலான மெகா கூட்டணியை ஸ்டாலின் சந்தர்ப்பவாத கூட்டணி என்று கூறுகிறார். ஆனால் ஒரு சந்தர்ப்பத்தை பயன்படுத்தி கூட்டணி அமைப்பது தான் சந்தர்ப்பவாத கூட்டணி ஆகும். சந்தர்ப்பவாத கூட்டணி என்று சொன்னால் அது தி.மு.க. தலைமையிலான கூட்டணி தான்.

1999-ம் ஆண்டு முதல் 2004-ம் ஆண்டு வரையில் பாரதிய ஜனதா கட்சியுடன் கூட்டணி வைத்தனர். அதன் பின்னர் 2004 முதல் 2014-ம் ஆண்டு வரை காங்கிரசுடன் கூட்டணி வைத்து 15 ஆண்டுகள் மத்தியில் ஆட்சி பொறுப்பில் இருந்தவர்கள் தி.மு.க.வினர். தமிழகத்தில் தி.மு.க. தலைமையிலான கூட்டணியில் காங்கிரஸ், கம்யூனிஸ்டு உள்பட பல கட்சிகள் உள்ளன. ஆனால் கேரளாவில் ராகுல்காந்தியை எதிர்த்து கம்யூனிஸ்டு போட்டியிடுகிறது இது தான் சந்தர்ப்பவாதம்.

இவ்வாறு நடிகர் சரத்குமார் பேசினார்.