தற்போதைய செய்திகள்

மத்தியிலும், மாநிலத்திலும் நல்லாட்சி தொடர கழக கூட்டணிக்கு வாக்களிப்பீர் – அமைச்சர் திண்டுக்கல் சி.சீனிவாசன் வேண்டுகோள்…

திண்டுக்கல்:-

மத்தியிலும், மாநிலத்திலும் நல்லாட்சி தொடர கழக கூட்டணிக்கு வாக்களிப்பீர் என்று வாக்காளப் பெருமக்களுக்கு அமைச்சர் திண்டுக்கல் சி.சீனிவாசன் வேண்டுகோள் விடுத்துள்ளார்.

திண்டுக்கல் நாடாளுமன்ற தொகுதியில் கழக கூட்டணி வேட்பாளர் ஜோதி முத்துவும், நிலக்கோட்டை சட்டமன்ற தொகுதியில் கழக வேட்பாளர் தேன்மொழி சேகரும் போட்டியிடுகின்றனர். இவர்களுக்கு ஆதரவாக வனத்துறை அமைச்சர் திண்டுக்கல் சி.சீனிவாசன், கழக அமைப்புச் செயலாளர் இரா.விசுவநாதன், மாவட்ட கழக செயலாளர் மருதராஜ், மாவட்ட கழக பொருளாளர் உதயகுமார் எம்பி மற்றும் கூட்டணி கட்சித் தலைவர்கள் தீவிர பிரச்சாரம் செய்து வருகின்றனர்.

இந்நிலையில் திண்டுக்கல் மாவட்டம் நிலக்கோட்டை சட்டமன்ற தொகுதி வத்தலகுண்டு ஒன்றியம் கோம்பைபட்டி, விருவீடு, குன்னுவராயன் கோட்டை, விராலி மாயன் பட்டி, மல்லனம் பட்டி ,சந்தையூர், ராஜதானி கோட்டை செங்கட்டாம்பட்டி ஆகிய ஊராட்சிகளில் வனத்துறை அமைச்சர் திண்டுக்கல் சி.சீனிவாசன் பிரச்சாரம் செய்து பேசியதாவது:-

பாரதிய ஜனதா கட்சி நாடாளுமன்ற தேர்தலையொட்டி தேர்தல் அறிக்கை வெளியிட்டுள்ளது. இந்த அறிக்கையை மக்கள் அனைவரும் வரவேற்றுள்ளனர். நடிகர் ரஜினிகாந்த் வரவேற்றுள்ளார். இதேபோல் அஇஅதிமுகவின் தேர்தல் அறிக்கையையும் மக்கள் மத்தியில் மிகுந்த வரவேற்பை பெற்றுள்ளது. ஏழை எளிய மக்கள் பயன்பெறும் வகையில் பல்வேறு நலத்திட்டங்கள் இடம்பெற்றுள்ளதால் அஇஅதிமுக, பாஜக தேர்தல் அறிக்கைகள் தமிழக அரசியலில் திருப்புமுனையை ஏற்படுத்தியுள்ளது.

குறிப்பாக தேர்தல் அறிக்கையில் கூறியுள்ளபடி காவேரி- கோதாவரி நதிகள் இணைக்க நடவடிக்கை எடுக்கப்படும். நிலக்கோட்டை தொகுதி மக்களின் நீண்ட கால கோரிக்கையாக உள்ள வாசனை திரவிய தொழிற்சாலை அமைக்கப்படும். விவசாயிகளின் நலனை கருத்தில் கொண்டு காய்கறிகள், பழங்களை சேமித்து வைக்க குளிர்பதன கிடங்கு அமைக்க நடவடிக்கை எடுக்கப்படும்.

நிலக்கோட்டை தொகுதியில் அரசு ஆண்கள் கலைக்கல்லூரி அமைய நடவடிக்கை மேற்கொள்ளப்படும். விருவீடு பகுதியில் முருங்கை பவுடர் தொழிற்சாலை, நிலக்கோட்டை தொகுதியில் குடிநீர், பாசன வசதிக்காக வைகை ஆற்றுப்படுகையில் ராமநாயக்கன் பட்டியலில் இருந்து பழைய வத்தலக்குண்டு கண்மாய் வரை புதிய கால்வாய் வெட்ட நடவடிக்கை எடுக்கப்படும். திண்டுக்கல்-குமுளி ரயில் பாதை அமைக்க வலியுறுத்தப்படும். எனவே மத்தியிலும், மாநிலத்திலும் மக்கள் ஆட்சி, நல்லாட்சி தொடர கழக கூட்டணிக்கு வாக்களியுங்கள்.

இவ்வாறு அமைச்சர் திண்டுக்கல் சி.சீனிவாசன் பேசினார்.

பிரச்சாரத்தின்போது மாவட்ட கழக பொருளாளர் உதயகுமார் எம்.பி, நிலக்கோட்டை ஒன்றிய செயலாளர் யாகப்பன், வத்தலகுண்டு ஒன்றிய செயலாளர் பாண்டியன் மற்றும் கழக நிர்வாகிகள் சென்றனர்.