சிறப்பு செய்திகள்

வாக்குறுதியை நிறைவேற்றாத கட்சி தி.மு.க. – அமைச்சர் பி.தங்கமணி கடும் தாக்கு

நாமக்கல்:-

வாக்குறுதியை நிறைவேற்றாத கட்சி தி.மு.க. தான் என்று அமைச்சர் பி.தங்கமணி கூறினார்.

நாமக்கல் மாவட்ட மாணவர் அணி சார்பில் ராசிபுரம் சட்டமன்ற தொகுதிக்குட்பட்ட வெண்ணந்தூரில் மொழிப்போர் தியாகிகள் வீரவணக்க நாள் பொதுக்கூட்டம் நடைபெற்றது. மாவட்ட மாணவர் அணி செயலாளர் கே.சந்திரமோகன் தலைமையில் நடைபெற்ற இக்கூட்டத்தில் நாமக்கல் மாவட்ட கழக அவைத்தலைவரும், மாவட்ட ஊராட்சிக்குழு துணைத்தலைவரும், முன்னாள் நாடாளுமன்ற உறுப்பினருமான பி.ஆர்.சுந்தரம், கொல்லிமலை ஒன்றிய கழக செயலாளரும், சேந்தமங்கலம் தொகுதி கழக சட்டமன்ற உறுப்பினருமான சி.சந்திரசேகரன், தலைமை கழக பேச்சாளர்கள் எஸ்.மணிமேகலை, விஜயா தைலான், வெண்ணந்தூர் ஒன்றிய கழக செயலாளரும், நாமக்கல் மாவட்ட கூட்டுறவு அச்சக தலைவருமான எஸ்.பி.தாமோதரன், கழக அமைப்பு செயலாளர் சேவல் எஸ்.ராஜூ உள்பட பலர் கலந்து கொண்டு பேசினர்.

இக்கூட்டத்தில் கழக அமைப்புச் செயலாளரும், நாமக்கல் மாவட்ட கழக செயலாளரும், மின்சாரம், மதுவிலக்கு மற்றும் ஆயத்தீர்வைத்துறை அமைச்சருமான பி.தங்கமணி கலந்து கொண்டு சிறப்புரையாற்றினார். அவர் பேசியதாவது:-

தமிழுக்காக தன்னுயிரை நீத்தவர்களுக்காக வருடம்தோறும் அவர்கள் நினைவாக இக்கூட்டம் நடைபெறுகிறது. இவர்கள் இல்லை என்று சொன்னால் இந்தி ஆதிக்கம் இன்று தமிழகத்திற்கு வந்து இருக்கும். இது திராவிட நாடு, பல்லாயிரம் பேர் தியாகம் செய்ததன் விளைவாக தான் இங்கு தமிழ்மொழி காக்கப்பட்டுள்ளது. அனைத்திந்திய அண்ணா திராவிட முன்னேற்றக் கழகம் என்பது புரட்சித்தலைவர் எம்.ஜி.ஆரால் உருவாக்கப்பட்டது. புரட்சித்தலைவி அம்மா அவர்களால் கட்டி காக்கப்பட்டது. முதலமைச்சர், துணை முதலமைச்சரால் இந்த இயக்கம் இப்பொழுது வளர்ந்து கொண்டிருக்கிறது.

தமிழகத்திலே ஒரு வரலாறு இருக்கிறது. ஐந்து வருடங்களுக்கு ஒரு ஆட்சி மாற்றம் என்ற வரலாறு. 32 ஆண்டுகளுக்கு பின்னால் அந்த வரலாற்றை முறியடித்து ஆண்ட கட்சியே மீண்டும் ஆளுகின்ற நிலைமையை அம்மா அவர்கள் உருவாக்கினார் என்றால் அது சாதாரண உழைப்பா? ஏழை மக்களுக்கு எத்தனை திட்டங்களை அம்மா அவர்கள் கொண்டு வந்திருக்கிறார். சொன்னதை நிறைவேற்றிக் கொடுத்து ஆட்சியில் என்னென்ன வாக்குறுதி கொடுத்தார்களோ அத்தனையும் நிறைவேற்றி கொடுத்தார்.

ஆனால் கருணாநிதியை பொறுத்தவரை உங்களிடம் வாக்குகளை பெறுவதற்கு மட்டுமே வாக்குறுதிகளை கொடுப்பார். உதாரணத்திற்கு சொல்லவேண்டும் என்று சொன்னால் 2006-ம் ஆண்டு சட்டமன்றத் தேர்தலில் கருணாநிதி அனைவருக்கும் இரண்டு ஏக்கர் நிலம் இலவசம் என்று சொன்னார். அப்பொழுது அம்மா அவர்கள் எப்படி இரண்டு ஏக்கர் நிலம் கொடுப்பீர்கள் என்று கேட்டதற்கு கொடுப்பேன் என்று ஒரு பொய்யான வாக்குறுதியை கொடுத்தார். மக்கள் பார்த்தார்கள் நமக்கு இருப்பதற்கே இடம் இல்லாமல் இருக்கிறது. இரண்டு ஏக்கர் கொடுக்கிறார்களே என்று சொல்லி அன்றைய தினம் அனைவரும் மாற்றி வாக்களித்தார்கள்.

ஐந்தாண்டுகள் நிறைவு பெறுகின்ற பொழுது அம்மா அவர்கள் 2011-ம் ஆண்டு சட்டமன்றத்திலே கேட்டார். இரண்டு ஏக்கர் நிலம் கொடுக்காவிட்டால் பரவாயில்லை என் இதயத்தில் இடம் இருக்கிறது என்று சொல்லி வாக்களித்தவரை ஏமாற்றியவர் கருணாநிதி. கொடுத்த வாக்குறுதியை முழுமையாக நிறைவேற்றி தந்தது புரட்சித்தலைவி அம்மா அவர்கள். புலிக்குப் பிறந்தது பூனையாகுமா என்பதைப்போல கருணாநிதியின் மகன் ஸ்டாலின் நடந்து முடிந்த நாடாளுமன்றத் தேர்தலில் தந்தையை போல நாமும் ஒரு பொய்யான வாக்குறுதியை கொடுத்தால்தான் நாடாளுமன்றத்தில் வெற்றி பெற முடியும் என்று சொல்லி முதல் வாக்குறுதியாக ஐந்து பவுன் யாரெல்லாம் அடமானம் வைத்து இருக்கிறீர்களோ அவர்களுக்கெல்லாம் நகைக்கடன் தள்ளுபடி என்று சொன்னார். அவர்கள் வெற்றியும் பெற்றார்கள். நாடாளுமன்றத்திற்கும் சென்றார்கள்.

கிட்டத்தட்ட 7 மாதங்கள் ஆகிவிட்டது. உங்களது நகை மட்டும் திரும்பாத சூழ்நிலைதான் இருக்கிறது. மக்கள் இதை சிந்தித்து பார்க்க வேண்டும். அதேபோல கல்லூரியில் படிக்கின்ற மாணவர்கள் வங்கியில் பெற்ற கடன் தள்ளுபடி என்று சொன்னார். அவர்களும் சேர்ந்து வாக்களித்தார்கள். இப்பொழுது வங்கி அதிகாரிகள் அவர்களது வீட்டுக்கு வந்து கட்டுகிறீர்களா என்று கேட்ட வண்ணம் உள்ளனர்.நாங்கள் இந்த மக்களுக்கு என்ன துரோகம் செய்து இருக்கிறோம். இந்த ஆட்சி அனைத்து நலத்திட்டங்களையும் வழங்கிக் கொண்டிருக்கிறது. எதற்காக இந்த ஆட்சி போக வேண்டும். இந்த ஆட்சியின் மீது என்ன குறை இருக்கிறது என்பதை கூறுங்கள். அதற்கு பதிலளிக்க தயாராக இருக்கிறோம். பொறாமையின் காரணமாக இந்த ஆட்சி போக வேண்டும் என்று சொன்னால் சிந்தித்து பாருங்கள். நாங்கள் நல்ல நிர்வாகத்தை அளித்துக் கொண்டிருக்கின்றோம்.

2016-ம் ஆண்டு அம்மா ஒரு திட்டத்தை அறிவித்தார். படித்த இளம் பெண்கள், வேலைக்கு செல்கின்ற அனைவருக்கும் ரூ.25 ஆயிரம் மானியத்தில் ஸ்கூட்டி வழங்கப்படும் என்பதை அறிவித்தார். அம்மா அவர்கள் நம்மிடத்தில் இல்லை என்றாலும் கூட அம்மாவின் ஆட்சியை சிறப்பான முறையில் வழி நடத்தி கொண்டிருக்கின்ற முதலமைச்சர் எடப்பாடி கே.பழனிசாமி ஆட்சியில் தொடர்ந்து இரண்டு ஆண்டு காலமாக வருடத்திற்கு ஒரு லட்சம் பேர் என்ற அடிப்படையில் இந்த ஆண்டு ஒரு லட்சம் பேருக்கு என மொத்தம் மூன்று லட்சம் பேருக்கு ஸ்கூட்டி வழங்கப்பட்டிருக்கிறது. அம்மா அறிவித்த திட்டங்கள் அம்மாவின் ஆட்சி இருக்கின்ற காரணத்தினால்தான் முழுமையாக மக்களுக்கு வந்தடைகின்றது.

தமிழகத்தை பொறுத்தவரை புரட்சித்தலைவி அம்மா அவர்கள் என்ன நிலைமையில் இருந்தார்களோ அதே நிலைமையில் தான் இப்பொழுதும் முதலமைச்சர் செயல்பட்டு கொண்டிருக்கிறார். 93-ம் ஆண்டு பாபர் மசூதி இடித்த பொழுது இந்தியா முழுவதும் பயங்கர கலவரம் நடைபெற்றது.

ஆனால் தமிழகத்தில் ஏதாவது ஒரு சிறிய சம்பவம் நடைபெற்றதா? அப்படி சிறுபான்மை இன மக்களை பாதுகாப்பது யாருடைய ஆட்சி என்று சொன்னால் அது அம்மாவின் ஆட்சி. அதேபோல தான் முதலமைச்சரும் ஒரு சிறுபான்மையின மக்களுக்கு பாதிப்பு ஏற்படும் என்று சொன்னால் முதல் ஆளாக நிற்போம் என்று சொல்லி அறைகூவல் விடுத்துள்ளார். ஆனால் எதிர்க் கட்சியை சேர்ந்தவர்கள் அவர்களை வாக்கு வங்கிக்காக தூண்டி விட்டுக் கொண்டிருக்கிறார்கள்.

குடியுரிமை திருத்த சட்டத்தை முதன்முதலில் அறிமுகப்படுத்தியது காங்கிரஸ் கட்சியைச் சேர்ந்த ப.சிதம்பரம் தான். திமுக கூட்டணியில் இருக்கின்ற பொழுது தான் கொண்டு வந்தார்கள். 2010-ம் ஆண்டு அவர்கள் கொண்டுவந்து அந்த சட்டத்தை நிறைவேற்ற நினைத்தார்கள். சந்தர்ப்ப சூழ்நிலையால் நிறைவேற்ற முடியாமல் போய்விட்டது. இன்றைய தினம் அந்த சட்டத்தை நிறைவேற்றி இருக்கிறார்கள். இந்த சட்டத்தால் ஒரு சிறுபான்மை மக்கள் தாக்கப்பட்டாலும் உறுதுணையாக நாங்கள் அங்கே நிற்போம்.

இவ்வாறு அமைச்சர் பி.தங்கமணி பேசினார்.