தற்போதைய செய்திகள்

கள்ளக்குறிச்சி பானையங்கால் ஊராட்சியில் மும்முனை மின்சாரம் வழங்க ஆய்வு செய்து முடிவு – பிரபு எம்.எல்.ஏ கேள்விக்கு அமைச்சர் பி.தங்கமணி பதில்

சென்னை

கள்ளக்குறிச்சி பானையங்கால் ஊராட்சியில் மும்முனை மின்சாரம் வழங்க ஆய்வு செய்து முடிவெடுக்கப்படும் என்று பிரபு எம்.எல்.ஏ கேள்விக்கு அமைச்சர் பி.தங்கமணி பதிலளித்தார்.

சட்டப்பேரவையில்  மின்சாரம், மதுவிலக்கு மற்றும் ஆயத்தீர்வைத் துறை அமைச்சர் பி.தங்கமணி அளித்த பதிலுரை வருமாறு:

உறுப்பினர் அ.பிரபு:- கள்ளக்குறிச்சி தொகுதி, தியாகதுருகம் ஊராட்சி ஒன்றியம், பானையங்கல் ஊராட்சியில் உள்ள ஆதி திராவிடர் குடியிருப்புப் பகுதியில் மின்மாற்றி அமைக்க அரசு முன்வருமா?

அமைச்சர் பி.தங்கமணி:- உறுப்பினர் தியாகதுருகம் ஊராட்சி ஒன்றியம், பானையங்கல் ஊராட்சியில் ஏற்கெனவே இருக்கின்ற 25 கேவிஏ திறன் கொண்ட மின்மாற்றி மூலம் மின்சாரம் வழங்கப்பட்டுக் கொண்டிருக்கிறது. இருந்தாலும், மின் பளு அதிகமாக இருக்கின்ற காரணத்தினால் 30-3-2019 அன்று முதல் 100 கேவிஏ திறன் கொண்ட மின்மாற்றியாகத் தரம் உயர்த்தப்பட்டு, இப்போது சீரான மின்சாரம் வழங்கப்பட்டு வருகிறது என்பதை உறுப்பினருக்குத் தெரிவித்துக் கொள்கிறேன்.

உறுப்பினர் அ.பிரபு:- இந்த ஆண்டு பொதுப்பணித்துறை மானியக் கோரிக்கையில் 25 கோடியே 50 லட்சம் ரூபாய் எனது தொகுதிக்கு ஒதுக்கித் தந்து, தடுப்பணைகளைக் கட்ட முதலமைச்சர் நிதி ஒதுக்கியிருப்பதற்கு எனது தொகுதியிலிருக்கின்ற விவசாயப் பெருங்குடி மக்களின் சார்பாகவும், எனது தொகுதி மக்களின் சார்பாகவும் எனது மனமார்ந்த நன்றியைத் தெரிவித்துக் கொள்கிறேன்.

எனது கள்ளக்குறிச்சி தொகுதி, பானையங்கல் ஊராட்சியில் 100 கேவிஏ திறன் கொண்ட மின்மாற்றி அமைக்கப்பட்டிருக்கிறது. அந்தப் பகுதியில் பார்த்தோமென்றால், அங்கிருக்கின்ற மின்கடத்தியானது பல ஆண்டுகளுக்கு முன்பு பொருத்தப்பட்டது. அந்த மின்கடத்தியை மாற்றித் தந்தால் அங்கிருக்கின்ற மக்களுக்கு மின்சாரம் கிடைக்க ஏதுவாக இருக்கும். அதுமட்டுமல்ல, அங்கு சிங்கிள் பேஸ் மின் இணைப்புதான் கொடுக்கிறார்கள். அதையும் மாற்றி, திரி பேஸ் கொடுக்க வேண்டுமென்று கேட்டுக்கொள்கிறேன்.

அமைச்சர் பி.தங்கமணி:- உறுப்பினர் கோரிய அந்தப் பகுதியில் ஆதி திராவிடர் குடியிருப்பில் ஏற்கெனவே இருந்த 25 கேவிஏ திறன் கொண்ட மின்மாற்றியை மாற்றி, இப்போது, 100 கேவிஏ திறன் கொண்ட மின்மாற்றி பொருத்தப்பட்டதன் காரணமாகத்தான் சீரான மின்சாரம் வழங்கப்பட்டுக்கொண்டிருக்கிறது. மேலும், உறுப்பினர் அங்கு சிங்கிள் பேஸ் வழங்கப்படுகிறது. அதை மும்முனை மின்சாரமாக வழங்க வேண்டுமென்று கேட்டிருக்கிறார். அதுகுறித்து ஆய்வு செய்து, அங்கே இருக்கின்ற தேவையின் அடிப்படையில் பரிசீலிக்கப்படும் என்பதை உறுப்பினருக்குத் தெரிவித்துக் கொள்கிறேன்.

உறுப்பினர் அ.பிரபு: நேற்றைய தினம் முதலமைச்சர் 110 விதியின் கீழ் 22 110 கே.வி. துணை மின் நிலையங்களை அமைத்துத் தருவதாக அறிவித்திருக்கிறார். அதில் கள்ளக்குறிச்சி தொகுதிக்கும் ஒன்றை அமைச்சர் அமைத்துத் தருவாரா? தியாகதுருகம் துணை மின் நிலையத்திலிருந்து ரிஷிவந்தியம் பகுதிக்கு பீடர் மூலம் அதாவது மின்சாரம் வழங்கப் பட்டிருக்கிறது. ஆகையால், அந்த தியாகதுருகம் பகுதி எஸ் எஸ் -லிருந்து வழங்கப்பட்டிருக்கின்ற மின்சாரத்தினால் தியாகதுருகம் பகுதிக்கு மின்சாரம் போதுமானதாகக் கிடைக்கவில்லை. எனவே, தியாகதுருகம் பகுதியிலிருந்து ரிஷிவந்தியம் பகுதியைத் தனியாகப் பிரித்து, ரிஷிவந்தியம் பகுதிக்கு தனியாக ஒரு துணை மின் நிலையம் அமைத்துத் தர அமைச்சர் முன்வருவாரா?

அமைச்சர் பி.தங்கமணி ;- உறுப்பினர் அவர்கள் ஏற்கெனவே பெருவரங்கூர் கிராமத்தில், தச்சூர் கிராமத்தில் ஒரு துணை மின்நிலையம் வேண்டுமென்று கேட்டிருந்தார். அதற்காக பெருவரங்கூர் கிராமத்தில், 3.57 எக்டர் பாட்டை புறம்போக்கு இடம் கண்டறியப்பட்டு இப்போது அரசினுடைய கோப்பு வந்திருக்கிறது. உடனடியாக அந்த இடம் எடுத்தவுடன் துணை மின் நிலையம் அமைக்கப்படும். உறுப்பினர் அவர்கள் புதிதாக ஒரு துணை மின் நிலையம் கேட்கிறார். அந்தப் பகுதியில் மின் தேவை எந்தளவிற்கு இருக்கிறதோ, அந்தத் தேவையின் அடிப்படையில் முடிவெடுக்கப்படும்.

உறுப்பினர் எம்.எஸ்.ஆர்.ராஜவர்மன்: சாத்தூர் நகரில் மின் துறையில் செயற்பொறியாளர் அலுவலகம் அமைக்க முன் வருவார்களா?

அமைச்சர் பி. தங்கமணி:- உறுப்பினருடைய தொகுதியிலே ஒரு கோரிக்கை வைத்திருக்கிறார்கள். முதலமைச்சர் கவனத்திற்குக் கொண்டு செல்லப்பட்டு தேவையிருப்பின் பரிசீலிக்கப்படும் என்பதை உறுப்பினருக்குத் தெரிவித்துக்கொள்கிறேன்.