சிறப்பு செய்திகள்

பட்டாசு தொழிற்சாலை தீ விபத்தில் உயிரிழந்த 9 பேர் குடும்பங்களுக்கு தலா ரூ.1 லட்சம் நிதி – முதலமைச்சர் அறிவிப்பு

சென்னை

பட்டாசு தொழிற்சாலையில் ஏற்பட்ட தீ விபத்தில் உயிரிழந்தவர்கள் குடும்பத்துக்கு தலா ரூ.1 லட்சம் நிதி உதவி வழங்கப்படும் என்று முதலமைச்சர் அறிவித்துள்ளார்.

முதலமைச்சர் எடப்பாடி பழனிசாமி நேற்று சட்டப்பேரவையில், விருதுநகர் மாவட்டம், வெம்பக்கோட்டை வட்டம், சிப்பிப்பாறை கிராமத்தில் பட்டாசு தயாரிக்கும் தொழிற்சாலையில் ஏற்பட்ட தீ விபத்தில் உயிரிழந்தவர்களின் குடும்பத்தினருக்கு நிவாரணம் வழங்குவது குறித்து அளித்த விளக்கம் வருமாறு:-

விருதுநகர் மாவட்டம், வெம்பக்கோட்டை வட்டம், சிப்பிப்பாறை கிராமத்தில் இயங்கி வந்த பட்டாசு தயாரிக்கும் தொழிற்சாலையில் 20.3.2020 அன்று ஏற்பட்ட தீ விபத்தில் தென்காசி மாவட்டத்தைச் சேர்ந்த ஜெயமுருகன் என்பவரின் மனைவி ராணி, கணேசன் என்பவரின் மனைவி தாமரைச்செல்வி, முப்பிடாரி என்பவரின் மனைவி தங்கம்மாள், ஜெயக்குமார் என்பவரின் மனைவி ஜெயபாரதி, முத்துகனி என்பவரின் மனைவி பத்திரகாளி, செல்வக்குமார் என்பவரின் மனைவி வேலுத்தாய், முருகையா, ரங்கசாமி நாயக்கர் என்பவரின் மனைவி காளியம்மாள் மற்றும் குருசாமி ஆகிய ஒன்பது நபர்கள் சம்பவ இடத்திலேயே உயிரிழந்தனர் என்ற செய்தியை அறிந்து நான் மிகவும் வேதனை அடைந்தேன்.

இந்த துயர சம்பவத்தில் அகால மரணமடைந்தவர்களின் குடும்பத்தினருக்கு எனது ஆழ்ந்த இரங்கலையும், அனுதாபத்தையும் தெரிவித்துக் கொள்கிறேன்.

மேலும், இந்த பட்டாசு தயாரிக்கும் தொழிற்சாலையில் ஏற்பட்ட தீ விபத்தில், பத்து நபர்கள் காயம் அடைந்துள்ளனர் என்பதை அறிந்து நான் மிகுந்த வருத்தமடைந்தேன். காயமடைந்து மருத்துவமனையில் அனுமதிக்கப்பட்டு சிகிச்சைப் பெற்று வரும் இவர்களுக்கு நல்ல முறையில் சிகிச்சை அளிக்க மருத்துவமனை அதிகாரிகளுக்கும், விருதுநகர், திருநெல்வேலி மற்றும் தூத்துக்குடி மாவட்ட நிர்வாகத்திற்கும் நான் உத்தரவிட்டுள்ளேன். இவர்கள் அனைவரும் விரைவில் பூரண குணமடைந்து வீடு திரும்ப வேண்டும் என்ற என்னுடைய விருப்பத்தைத் தெரிவித்துக் கொள்கிறேன்.

பட்டாசு தயாரிக்கும் நிறுவனங்கள் மிகுந்த எச்சரிக்கையுடனும், பாதுகாப்புடனும் பட்டாசு தயாரிக்கும் தொழிலை மேற்கொள்ள வேண்டும் என இத்தருணத்தில் கேட்டுக் கொண்டு, இந்த தொழிற்சாலை இன்றைக்கு உறுப்பினர் சொன்னதைப் போல உரிமம் இல்லாமல் செயல்படுவதாக என்று தெரிவித்திருக்கிறார்கள். இது எல்லாம் காவல்துறையினர் மூலம் வழக்குப்பதிவு செய்யப்பட்டு, விசாரணை மேற்கொள்ளப்பட்டு வருகிறது. அப்படி ஏதாவது இருந்தால் அவர்கள் மீது உரிய நடவடிக்கை எடுக்கப்படும் என்பதை இந்த நேரத்திலே தெரிவித்துக் கொள்கிறேன்.

இந்த துயரச் சம்பவத்தில் உயிரிழந்த ஒன்பது நபர்களின் குடும்பங்களுக்கு தலா ஒரு லட்சம் ரூபாயும், பலத்த காயடைந்தவர்களுக்கு தலா 50,000 ரூபாயும், லேசான காயமடைந்தவர்களுக்கு தலா 25,000 ரூபாயும் முதலமைச்சரின் பொது நிவாரண நிதியிலிருந்து வழங்கப்படும் என்பதை தெரிவித்துக் கொள்கிறேன்.

இவ்வாறு முதலமைச்சர் எடப்பாடி கே.பழனிசாமி விளக்கம் அளித்தார்.