தற்போதைய செய்திகள்

பட்டுக்கோட்டையை தலைமையிடமாக கொண்டு புதிய மாவட்டம் உருவாக்க பரிசீலனை – பேரவையில் அமைச்சர் ஆர்.பி.உதயகுமார் தகவல்

சென்னை

பட்டுக்கோட்டையை தலைமையிடமாக கொண்டு புதிய மாவட்டம் உருவாக்க பரிசீலிக்கப்படும் என்று பேரவையில் அமைச்சர் ஆர்.பி.உதயகுமார் தெரிவித்தார்.

தமிழக சட்டப்பேரவையில் நேற்று கேள்வி நேரத்தின் போது பட்டுக்கோட்டை தொகுதி உறுப்பினர் சி.வி.சேகர் தஞ்சாவூர் மாவட்டத்தை இரண்டாக பிரித்து பட்டுக்கோட்டையை தலைமையிடமாக கொண்டு புதிய மாவட்டம் அமைக்க அரசு முன் வருமா? என்று கேள்வி எழுப்பினார்.

இதற்கு வருவாயத்துறை அமைச்சர் ஆர்.பி.உதயகுமார். புதிய மாவட்டம் உருவாவதற்கான அளவுகோள் நிர்ணயிக்கப் படுகின்றன. புதிதாக உருவாக்கப்படும் மாவட்டத்திற்கு பரப்பளவு குறைந்தபட்சம், 2500 சதுர கிலோ மீட்டர் இருக்க வேண்டும். அதேபோல் மக்கள் தொகை குறைந்தபட்சம் 10 லட்சமாகவும், அதிகபட்சம் 30 லட்சமாகவும் இருக்க வேண்டும்.

2 கோட்டங்கள், 5 வட்டங்கள் மற்றும் 200 வருவாய் கிராமங்கள் இருக்க வேண்டும் என்ற அளவுகோள் நிர்ணயிக்கப் பட்டுள்ளன. தஞ்சாவூர் மாவட்டத்தின் மொத்த பரப்பளவு 3,396.53 சதுர கிலோ மீட்டராகவும், 2011 ம் ஆண்டு மக்கள் தொகை கணக்கெடுப்பின்படி 16 லட்சத்து 67 ஆயிரத்து 809 ஆகவும், வருவாய் கோட்டங்களின் எண்ணிக்கை 3 ஆகவும், வருவாய் வட்டங்களின் எண்ணிக்கை 9 ஆகவும், வருவாய் கிராமங்களின் எண்ணிக்கை 754 ஆகவும் உள்ளன.

அரசாணையில் உள்ள அளவுகோள்களின்படி தஞ்சாவூர் மாவட்டத்தை இரண்டாக பிரித்து பட்டுகோட்டையை தலைமையிடமாக கொண்டு, புதிய மாவட்டம் அமைத்திடும் பட்சத்தில் கிராமங்களின் எண்ணிக்கை குறித்த அளவுகோல் மட்டுமே பூர்த்தியாகின்றன. முதல்வரின் தலைமையிலான அரசு ஒரே ஆண்டில் 5 புதிய மாவட்டத்தை துவக்கி சரித்திர சாதனை படைத்துள்ளது. புதிய மாவட்டம் உருவாக்குவது என்பது அரசின் கொள்கை முடிவுக்கு உட்பட்டது.

எனவே பட்டுகோட்டையை தலைமையிடமாக கொண்டு புதிய மாவட்டம் பிரிப்பது தொடர்பாக முதல்வரின் கவனத்திற்கு கொண்டு சென்று கொள்கை ரீதியாக முடிவு எடுத்து பரிசீலிக்கப்படும் என்றார். இதனை தொடர்ந்து தி.நகர் தொகுதி சட்டமன்ற உறுப்பினர் சத்யா சென்னை மாவட்டத்தில் 16 சட்டமன்ற தொகுதிகள் இருந்தன. தற்போது திருவள்ளூர், காஞ்சிபுரம் மாவட்டத்தில் உள்ள 6 தொகுதிகள் சென்னை மாவட்டத்துடன் இணைக்கப்பட்டு தற்போது 22 தொகுதிகள் இருக்கிறது. நிர்வாக பயன்பாட்டுக்காக அவற்றை பிரிக்க வேண்டும் என்று துணை கேள்வி கேட்டார்.

இதற்கு அமைச்சர் உறுப்பினர் நிர்வாகம் மற்றும் மக்கள் நலன் சார்ந்த கோரிக்கை வைத்துள்ளார். இது தொடர்பாக முதல்வரின் கவனத்திற்கு கொண்டு சென்று கொள்கை ரீதியாக முடிவு எடுக்க நடவடிக்கை மேற்கொள்ளப்படும் என்றார்.