தற்போதைய செய்திகள்

பண்டிகை காலங்களில் அதிக கட்டணம் வசூல்செய்யும் வாகனங்கள் சிறைபிடிப்பு – அமைச்சர் எம்.ஆர்.விஜயபாஸ்கர் எச்சரிக்கை

கரூர்

பண்டிகை காலங்களில் அதிக கட்டணம் வசூல் செய்யும் வாகனங்கள் சிறைபிடிக்கப்படும் என்று அமைச்சர் எம்.ஆர்.விஜயபாஸ்கர் எச்சரிக்கை விடுத்துள்ளார்.

கரூர் மாவட்டத்தில் இருந்து இயக்கப்படக்கூடிய 10 குளிர்சாதன வசதி கொண்ட பேருந்துகளை போக்குவரத்துத்துறை அமைச்சர் எம்.ஆர்.விஜயபாஸ்கர் கரூர் பேருந்து நிலையத்தில் கொடியசைத்து துவக்கி வைத்தார்.

இதன் பின்னர் அமைச்சர் எம்.ஆர்.விஜயபாஸ்கர் செய்தியாளர்களிடம் கூறியதாவது:-

புரட்சித்தலைவி அம்மா அவர்களின் நல்லாசியுடன், தமிழகத்தில் நல்லாட்சி நடத்தி வரும் முதலமைச்சர் மற்றும் துணை முதலமைச்சர் ஆகியோரின் உத்தரவிற்கிணங்க தமிழகத்தில் இருக்கக்கூடிய 8 போக்குவரத்து கழகங்களிலும், குறைந்த தூரம் பயணிக்கக் கூடிய பேருந்துகளில் குளிர்சாதன வசதிகொண்ட பேருந்துகள் இயக்கப்படுகிறது. ஒருபுறம் மூன்று இருக்கைகளும், மறுபுறம் இரண்டு இருக்கைகளுடன் கூடிய குளிர்சாதன பேருந்துகள் முதலமைச்சர் திருக்கரங்களால் ஏற்கனவே துவக்கி வைக்கப்பட்டுள்ளது.

கும்பகோணம், சேலம், திருநெல்வேலி, மதுரை, கோயம்புத்தூர் ஆகிய போக்குவரத்துக் கழகங்களுக்கு தலா 10 பேருந்துகளும், விழுப்புரம் மற்றும் சென்னை மாநகர போக்குவரத்துக்கழகத்திற்கு தலா 50 குளிர்சாதன பேருந்துகளும் இயக்கப்படும் என முதலமைச்சர் உத்தரவிட்டுள்ளார். அதனடிப்படையில் கும்பகோணம் போக்குவரத்துக் கழகத்திறகுட்பட்ட நான்கு பேருந்துகள் கரூரில் இருந்து துவக்கி வைக்கப்பட்டுள்ளது.

கரூர் முதல் திருப்பூர், கரூர் முதல் திருச்சி, கரூர் முதல் தஞ்சாவூர், கரூர் முதல் கோயம்புத்தூர், திருச்சி முதல் கோயம்புத்தூர், திருச்சி முதல் பழனி, காரைக்குடி முதல் திருச்சி ஆகிய வழித்தடங்களில் குளிர்சாதனப் பேருந்துகள் இயக்கப்படவுள்ளது. இதேபோல, அந்தந்த போக்குவரத்து கழகங்களில் தீபாவளி பண்டிகையை முன்னிட்டு பொதுமக்கள் சிறப்பாக பயணம் மேற்கொள்ளும் வகையில் இந்த குளிர்சாதனப் பேருந்துகள் இயக்கப்படும்.

முதன்முதலாக பரிட்சார்த்த முறையில் திருவண்ணாமலை முதல் சென்னை வரை விழுப்புரம் போக்குவரத்துக்கழகத்தில் இருந்து இயக்கப்பட்ட இரண்டு குளிர்சாதனப்பேருந்துகள் பொதுமக்களிடையே நல்ல வரவேற்பை பெற்றது. அம்மா அவர்களின் ஆட்சிகாலத்திலும், முதலமைச்சர் ஆட்சியிலும் போக்குவரத்துக்கழகத்தை நவீனமயமாக்க வேண்டும் என்ற உன்னத நோக்கத்தில் 5,000 புதிய பேருந்துகள் போக்குவரத்துக்கழகத்தில் சேர்க்கப்பட்டு இயக்கப்பட்டுள்ளது. தற்போது, முதலமைச்சர் 2,000 புதிய பேருந்துகளை வாங்க உத்தரவிட்டுள்ளார்.

படுக்கை வசதி மற்றும் இருக்கை வசதியுடன் கூடிய பேருந்துகள், குளிர்சாதனப்பேருந்துகள், கழிவறையுடன் கூடிய பேருந்துகள் என நவீனமயமாக்கப்பட்ட போக்குவரத்துக்கழகமாக, இந்திய துணை கண்டத்திலேயே தமிழக போக்குவரத்துத்துறை திகழ்கிறது. தீபாவளி பண்டிகையை முன்னிட்டு சிறப்பு பேருந்துகள் இயக்கப்பட்டு வருகின்றது. இன்று சென்னையில் பயணச்சீட்டுக்கான சிறப்பு முன்பதிவு மையங்கள் துவங்கப்படவுள்ளது. தீபாவளி பண்டிகை முடிந்த பிறகும் பொதுமக்கள் பாதுகாப்பாக சிரமமில்லாமல் திரும்பிச்செல்ல தேவையான பேருந்து வசதிகள் ஏற்பாடு செய்யப்பட்டுள்ளது.

தமிழ்நாடு போக்குவரத்துத்துறையும், காவல்துறையும் இணைந்து பொதுமக்கள் பாதுகாப்பாக பயணிக்கத் தேவையான அனைத்து ஏற்பாடுகளும் செய்யப்பட்டுள்ளது. இருசக்கர வாகனத்தில் நெடுஞ்சாலைகளில் ரோந்து செல்லும் பணியில் போக்குவரத்து காவலர்கள் ஈடுபட்டு வருகிறார்கள். அனைத்து சுங்கச்சாவடிகளிலும், வட்டாரப்போக்குவரத்து அலுவலர்கள், மற்றும் போக்குவரத்து ஆய்வாளர்கள் வாகனத்தணிக்கையில் ஈடுபட்டு வருகின்றனர்.

பண்டிகைகாலங்களில் அதிக கட்டணம் வசூல் செய்யும் வாகனங்கள் குறித்து தகவல் தெரிவித்தால் உடனடியாக ஆய்வு மேற்கொண்டு, சம்மந்தப்பட்ட வாகனம் சிறைபிடிக்கப்பட்டு சட்டப்படி நடவடிக்கை எடுக்கப்படும். பொதுமக்களின் நலன் கருதி, அனைத்து தரப்பினரும் பாதுகாப்பாக, சிறந்த முறையில் பயணம் மேற்கொள்ள தேவையான அனைத்து நடவடிக்கைகளையும் தமிழக போக்குவரத்துத்துறை மேற்கொண்டுள்ளது.

இவ்வாறு அமைச்சர் எம்.ஆர்.விஜயபாஸ்கர் கூறினார்.