நீலகிரி

வெளிநாட்டிலிருந்து உதகை வந்த 142 பேர் வீடுகளை விட்டு வெளியேறக்கூடாது – மாவட்ட ஆட்சியர் அறிவுறுத்தல்

நீலகிரி

வெளிநாட்டிலிருந்து உதகை வந்த 142 பேர் வீடுகளை விட்டு வெளியேறக்கூடாது என்று மாவட்ட ஆட்சியர் ஜெ.இன்னசென்ட் திவ்யா அறிவுறுத்தியுள்ளார்.

நீலகிரி மாவட்டத்தில் கொரோனா வைரஸ் பரவலைத் தடுக்க மாவட்ட நிர்வாகம் பல்வேறு நடவடிக்கைகளை மேற்கொண்டு வருகிறது.இந்நிலையில், கடந்த மார்ச் மாதம் 1-ம்தேதி வரை வெளிநாடுகளுக்குச் சென்று திரும்பிய 142 பேர் கண்காணிக்கப்பட்டு வருவதாக தெரிவித்தார்.

இதுதொடர்பாக, மாவட்ட ஆட்சியர் ஜெ.இன்னசென்ட் திவ்யா செய்தியாளர்களிடம் கூறும்போது, “அரசு கரோனா வைரஸ் தடுப்பு நடவடிக்கைகளை மேற்கொண்டு வருகிறது. இந்நிலையில், வெளிநாடுகளுக்குச் சென்று திரும்பிய 142 பேர் கண்காணிக்கப்பட்டு வருகின்றனர். அவர்கள் வீடுகளை விட்டு வெளியேறக் கூடாது என அறிவுறுத்தப்பட்டுள்ளனர். அவர்களின் வீடுகளில் அவர்களது விவரங்கள் அடங்கிய நோட்டீஸ் ஒட்ட நடவடிக்கை எடுக்கப்பட்டு வருகிறது.

இவர்களுக்கு கரோனா அறிகுறி இல்லை. இதனால், மக்கள் இவர்களை ஒதுக்குவதோ, அவர்களை குறித்து அவதூறு தகவல்களையோ பரப்பக் கூடாது. முன்னெச்சரிக்கை நடவடிக்கையாகவே அவர்கள் கண்காணிக்கப்படுகின்றனர் .உதகை அரசு மருத்துவமனையில் 100 படுக்கைகள் கொண்ட கரோனா வார்டு அமைக்கப்பட்டு வருகிறது.

தனியார் மருத்துவமனைகளில் 25 சதவீதம் படுக்கைகள் கொரோனா சிகிச்சைக்காக ஒதுக்க அறிவுறுத்தப் பட்டுள்ளது.ெ காரோனா தொற்று உள்ளது என கண்டறியப்பட்டால், அவர்கள் கோவை இஎஸ்ஐ மருத்துவமனைக்கு அனுப்பப்படுவார்கள். இந்நிலையில், திருமணம் உள்ளிட்ட சுப நிகழ்ச்சிகளை மக்கள் ஒத்தி வைக்கலாம். ஒத்தி வைக்க முடியாத நிலையில், அதிகளவில் கூட்டம் கூட்டாமல் நடத்தலாம்” என்றார்.