தற்போதைய செய்திகள்

காய்ச்சல்- தொற்றுநோய்கள் பரவாமல் தடுக்க சுகாதாரத்துறை தொடர் பன்முக நடவடிக்கை – அமைச்சர் டாக்டர் சி.விஜயபாஸ்கர் தகவல்

சென்னை

காய்ச்சல், தொற்றுநோய் பரவாமல் தடுக்க சுகாதாரத்துறை தொடர் பன்முக நடவடிக்கைகளை மேற்கொண்டு வருகிறது என்று அமைச்சர் டாக்டர் சி.விஜயபாஸ்கர் தெரிவித்தார்.

சென்னை ஓமந்தூரார் அரசு பன்னோக்கு மருத்துவமனை வளாகத்தில் மக்கள் நல்வாழ்வு மற்றும் குடும்ப நலத்துறை அமைச்சர் டாக்டர் சி.விஜயபாஸ்கர் தலைமையில் டெங்கு மற்றும் தொற்று நோய் தடுப்பு நடவடிக்கைகள் குறித்து அனைத்து துறைகளுடனான ஒருங்கிணைப்பு குழு கூட்டம் நடைபெற்றது.

இக்கூட்டத்தில் அமைச்சர் டாக்டர் சி.விஜயபாஸ்கர் பேசியதாவது:-

புரட்சித்தலைவி அம்மா அவர்களின் அரசு, காய்ச்சல் மற்றும் தொற்றுநோய்கள் பரவாமல் தடுத்திடவும் 100 சதவீதம் உயிரிழப்பு இல்லாத நிலையை ஏற்படுத்திடவும் மக்கள் நல்வாழ்வு மற்றும் குடும்ப நலத்துறை பல்வேறு பன்முக தொடர் நடவடிக்கைகளை எடுத்து வருகிறது.

தமிழகத்தில் பருவமழை தொடங்கியதை முன்னிட்டு காய்ச்சல் பரவுவதை தடுப்பதற்காக மக்கள் நல்வாழ்வுத் துறையானது உள்ளாட்சி அமைப்புகள் போன்ற பல்வேறு துறைகளுடன் ஒருங்கிணைந்து கொசு ஒழிப்பு, விழிப்புணர்வு ஏற்படுத்துதல், காய்ச்சல் கண்டறிதல், காய்ச்சல் கண்ட இடங்களில் உடனடி தடுப்பு நடவடிக்கைகள் மேற்கொள்ளுதல், மருத்துவ முகாம்கள் நடத்துதல் போன்ற தொடர் நடவடிக்கைகளை மேற்கொண்டு வருகிறது.

மேலும், முதலமைச்சர் தலைமையிலும், அரசு தலைமைச் செயலாளர் தலைமையிலும் காய்ச்சல் மற்றும் தொற்று நோய்கள் பரவாமல் தடுப்பது குறித்தும் பல்வேறு ஆலோசனை கூட்டம் நடைபெற்று வருகிறது. இதன் ஒரு அங்கமாக அனைத்து துறைகளும் ஒருங்கிணைந்து செய்ய வேண்டிய நடவடிக்கைகள் குறித்து இந்த ஒருங்கிணைப்பு குழுக் கூட்டம் நடைபெறுகிறது. இதன் மூலம் அனைத்துத் துறைகளும் இணைந்து தொற்றுநோய்கள் பரவாமல் தடுத்திட முழு கவனத்துடன் செயல்பட வேண்டும்.

பொதுமக்கள் காய்ச்சலுக்கான அறிகுறிகள் அறியப் பெற்றவுடன், அரசு மருத்துவ நிலையங்களை அணுகுமாறும், மருத்துவரின் பரிந்துரையின்றி எந்த மருந்தையும் அவர்களாகவே உட்கொள்ளக் கூடாது என்று அறிவுறுத்தப்பட்டுள்ளது. மருந்துக்கடைகளில் பொதுமக்களுக்கு உரிய பரிந்துரையின்றி மருந்துகள் வழங்கக் கூடாது என்று மருந்து கட்டுப்பாட்டுத்துறை இயக்குநரகம் மூலமாக அறிவுறுத்தப்பட்டு உள்ளது. இந்திய மருத்துவ முறை பாரம்பரிய மருந்தான நிலவேம்பு குடிநீர் அரசு மருத்துவமனை மற்றும் அனைத்து ஆரம்ப சுகாதார நிலையங்களிலும் வழங்கப்பட்டு, இயற்கையாக காய்ச்சல் குணமடைய ஊக்குவிக்கப்படுகிறது.

அனைத்து மாவட்டங்களிலும் உள்ள மருத்துவமனைகள், பள்ளிகள், அரசு அலுவலகங்கள், பொது மக்கள் கூடும் இடங்கள் என பல்வேறு இடங்களில் டெங்கு காய்ச்சலின் தடுப்பு நடவடிக்கைகள் பற்றியும் அதில் மக்களின் பங்கு குறித்து உறுதிமொழி எடுக்கப்படுகிறது.

பொது கட்டடங்கள், அலுவலகங்கள், உணவகங்கள், பூங்காக்கள், திரையரங்குகள், திருமண மண்டபங்கள், கல்வி நிலையங்கள், தொழிற்சாலைகள் மற்றும் இதர பகுதிகளை பார்வையிட்டு, கொசு உற்பத்தியாகும் இடங்களை கண்டறிந்து அழிக்கும் பணி நடைபெற்று வருகிறது. டெங்கு காய்ச்சலை கட்டுப்படுத்த மருத்துவ கையேடு மற்றும் புத்தகம் அனைத்து தனியார் மற்றும் அரசு மருத்துவமனைகளுக்கு வழங்கப்பட்டுள்ளது. டெங்கு காய்ச்சல் பற்றிய விழிப்புணர்வு செய்திகள் பொது இடங்களிலும் திரையரங்குகளிலும் அளிக்கப்பட்டு வருகிறது.

இவ்வாறு அமைச்சர் டாக்டர் சி.விஜயபாஸ்கர் பேசினார்.

இக்கூட்டத்தில் மக்கள் நல்வாழ்வு மற்றும் குடும்ப நலத்துறை செயலாளர் டாக்டர் பீலா ராஜேஷ், சென்னை பெருநகர மாநகராட்சி ஆணையர் கோ.பிரகாஷ், தமிழ்நாடு மருத்துவப் பணிகள் கழக மேலாண்மை இயக்குநர் உமாநாத், நகராட்சி நிர்வாக ஆணையர் கா.பாஸ்கரன், தொழில்நுட்ப கல்லூரி இயக்குநர் கே. விவேகானந்தன், பேரூராட்சிகளின் இயக்குநர் சு.பழனிசாமி, கால்நடை பராமரிப்புத் துறை இயக்குநர் அ.ஞானசேகரன், இந்திய மருத்துவம் மற்றும் ஓமியோபதி துறை இயக்குநர் சு.கணேஷ், மக்கள் நல்வாழ்வுத்துறை இணைச் செயலாளர் நடராஜன், தேசிய நலவாழ்வு குழும இயக்குநர் செந்தில்ராஜ், பொது சுகாதாரத்துறை இயக்குநர் குழந்தைசாமி, மருத்துவம் மற்றும் ஊரக நலப்பணிகள் இயக்குநர் சுவாதி, மருத்துவக் கல்வி இயக்குநர் நாராயணபாபு மற்றும் அனைத்து துறை உயர் அலுவலர்கள் கலந்து கொண்டனர்.