திருப்பத்தூர்

அத்தியாவசிய பொருட்களை கொண்டு செல்பவர்களுக்கு அடையாள அட்டை – திருப்பத்தூர் ஆட்சியர் தகவல்

திருப்பத்தூர்

வாகனங்களில் அத்தியாவசிய பொருட்களை கொண்டு செல்பவர்களுக்கு அடையாள அட்டை வழங்கப்படும் என்று திருப்பத்தூர் மாவட்ட ஆட்சித்தலைவர் ம.ப.சிவன்அருள் தெரிவித்துள்ளார்.
திருப்பத்தூர் மாவட்ட ஆட்சியர் அலுவலக கூடுதல் கட்டடத்தில் கொரோனா வைரஸ் நோய் தொற்று தடுப்பு நடவடிக்கைகள் குறித்து அனைத்து துறை அலுவலர்களுக்கான ஆய்வுக்கூட்டம் மாவட்ட ஆட்சித்தலைவர் ம.ப.சிவன்அருள் தலைமையில் நடைபெற்றது.

கூட்டத்தில் திருப்பத்தூர் மாவட்டத்தில் கொரோனா வைரஸ் நோய் தொற்று தடுப்பு நடவடிக்கைகள் குறித்து நகராட்சி, வட்டார வளர்ச்சி மற்றும் பேரூராட்சி அலுவலர்களிடம் இன்றைய நாள் வரையில் செய்யப்பட்டு வரும் தடுப்பு நடவடிக்கைகளை மாவட்ட ஆட்சித்தலைவர் கேட்டறிந்தார்.

திருப்பத்தூர் மாவட்டத்தில் இன்றைய நாள் வரையில் வெளிநாடுகளில் இருந்து சொந்த ஊர் வந்துள்ளவர்கள் 715 நபர்கள், வெளி மாநிலத்தில் இருந்து வந்துள்ளவர்கள் 158 நபர்கள் என மொத்தம் 873 நபர்களை 28 நாள் தனிமை படுத்தி அவர்களை முழுமையாக கண்காணிக்க வேண்டும். இதில் எவ்வித பிரச்சனைகளும் ஏற்பட்டு விடக்கூடாது. சம்பந்தப்பட்ட வருவாய்த்துறை, ஊரக வளர்ச்சித்துறை, நகராட்சி நிர்வாகத்துறை பணியாளர்களுக்கு பணி ஆணைகள் வழங்கி அவர்களை நாள்தோறும் கண்காணித்து அறிக்கையை சம்பந்தப்பட்ட துறை அலுவலர்களுக்கு அளிக்க வேண்டும். பொதுமக்களின் அடிப்படை தேவை உணவு பொருட்கள் விற்பனை மளிகை கடைகளை சுழற்சி முறையில் திறக்க நடவடிக்கை எடுக்கப்பட்டுள்ளது.

பால் விற்பனை கடைகளை திறந்து வைக்கலாம். இக்கடைகளில் விற்பனையாளர்கள் சமூக இடைவெளியையும், பாதுகாப்பு கவசங்களையும் கட்டாயம் பயன்படுத்திட வேண்டும்.
அத்தியாவசிய பொருட்களை ஏற்றி வரும் வாகனங்கள், விவசாய வேளாண் விளைபொருட்களை சென்னை போன்ற பெரிய நகரங்களுக்கு எடுத்து செல்லும் வாகனங்களுக்கும், பொருட்கள் வாங்க செல்லும் சிறிய கடைகள் உரிமையாளர்களுக்கும் வாகன அனுமதி அடையாள அட்டைகளை வழங்கிட நடவடிக்கை எடுக்கப்படும். இதனை வைத்துக்கொண்டு இவர்கள் வாகனங்களில் செல்லும்போது காவலர்கள் அனுமதிப்பார்கள்.

இதில் அத்தியாவசிய தேவைகளுக்கும் வணிக ரீதியாக செல்லும் வாகனங்களுக்கு மட்டுமே பெட்ரோல் நிரப்ப அனுமதி அளிக்கப்பட்டுள்ளது. காய்கறிகளை பொதுமக்கள் சமூக இடைவெளியில் வாங்கி செல்ல உழவர் சந்தைகள், மற்றும் நகர பேருந்து நிலையங்களில் நாளை முதல் ஏற்பாடுகள் செய்யப்பட்டுள்ளது. மேலும் சிறிய நான்கு சக்கர வாகனங்கள் மூலம் பொருட்களை எடுத்து சென்று விற்பனை செய்ய வாகனங்களுக்கு அனுமதி அட்டைகள் வழங்கப்படும்.

இவற்றில் விற்பனையாளர்கள் கட்டாயமாக பாதுகாப்பு கவசங்களை அணிந்து கொண்டு உணவு பொருட்களை தெருக்களில் விற்பனை செய்யலாம். இதுபோன்ற நடவடிக்கைகளை சம்பந்தப்பட்ட வட்டாட்சியர், வட்டார வளர்ச்சி அலுவலர்கள், நகராட்சி ஆணையாளர்கள் மற்றும் பேரூராட்சி அலுவலர்கள் கண்காணித்திட வேண்டும் நாம் மக்களின் அடிப்படை தேவைகளை தங்கு தடையின்றி கிடைக்க மேற்கொள்ளும் நடவடிக்கைகளில் தொற்று போன்ற பிரச்சனைகளுக்கு இடம் அளிக்காமல் சுகாதார விதிகளின் படி இப்பணிகள் நடைபெறுவதை வருவாய்த்துறை மற்றும் உள்ளாட்சி பணியாளர்கள் கண்காணிக்க நடவடிக்கைகளை மேற்கொள்ள வேண்டுமென மாவட்ட ஆட்சித்தலைவர் கேட்டுக்கொண்டார்.

இந்த ஆய்வுகூட்டத்தில் மாவட்ட வருவாய் அலுவலர் என்சிஈ.தங்கையாபாண்டியன், வருவாய் கோட்டாட்சியர் காயத்திரி சுப்பிரமணியன், நேர்முக உதவியாளர் வில்சன்ராஐசேகர், துணை இயக்குநர் பொது சுகாதாரம் சுரேஷ், உதவி இயக்குநர் ஊராட்சிகள் அருண், துணை ஆட்சியர் அப்துல்முனிர் மற்றும் அனைத்து வட்டாட்சியர்கள், வட்டார வளர்ச்சி அலுவலர்கள், நகராட்சி ஆணையாளர்கள், பேரூராட்சி செயல் அலுவலர்கள் கலந்து கொண்டனர்.