தமிழகம்

தமிழ்நாடு என்றாலே தேசிய விருதுகளை குவிக்கும் முதன்மை – மாநிலம் முதலமைச்சர் எடப்பாடி கே.பழனிசாமி பெருமிதம்

சென்னை

தமிழ்நாடு என்றாலே இந்தியாவில் தேசிய விருதுகளை குவிக்கும் மாநிலம் என்ற பெருமையை பெற்று வருகிறது என்று முதலமைச்சர் எடப்பாடி கே.பழனிசாமி பெருமிதத்துடன் கூறினார.

சென்னை தீவுத்திடலில் நேற்று மாலை 46-வது இந்திய சுற்றுலா மற்றும் தொழில் பொருட்காட்சியை தொடங்கி வைத்து முதலமைச்சர் எடப்பாடி கே. பழனிசாமி ஆற்றிய உரை வருமாறு:-

“ஒரு மலையில் பெருக்கெடுத்து ஓடும் ஆறு, பயனில்லாத இடங்கள் வழியாக பாய்ந்து கடலில் கலப்பதால் யாருக்கும் எவ்விதப் பயனும் இல்லை. அந்நீர் அணைகளில் தேக்கப்பட்டு, வாய்க்கால் வழியாக வயல்களுக்கு பாய்ந்தால் பயிர் செழிக்கும். உயிர்கள் வாழ வழிவகை ஏற்படும்” என்றார் புரட்சித்தலைவி அம்மா அவர்கள்.

பயிர்கள் செழிக்க, அணைகளில் நீர் தேக்கி வைப்பது எவ்வளவு முக்கியமோ, அதேபோல, அரசு செயல்படுத்தும் திட்டங்கள் மற்றும் மக்கள் நலப் பணிகள் பற்றிய விவரங்கள், அரசின் சாதனைகள் ஆகியவற்றை மக்களிடையே கொண்டு செல்லும் ஒரு கருவியாக செயல்படுவது பொருட்காட்சிகள் தான்.

பொங்கல் திருநாள் என்றாலே அதனுடன் சேர்ந்து நினைவுக்கு வருவது சென்னை தீவுத் திடலில் நடக்கும் இந்திய சுற்றுலா மற்றும் தொழில் பொருட்காட்சி தான். இந்த ஆண்டு பொருட்காட்சி, கிறிஸ்துமஸ் பண்டிகைக்கு முன்னரே தொடங்கி வைக்கப்பட்டிருப்பது கூடுதல் விசேஷமாகும்.

தமிழ்நாடு சுற்றுலா வளர்ச்சி கழகம், 1974-ம் ஆண்டு முதல் இந்திய சுற்றுலா மற்றும் தொழில் பொருட்காட்சியை தொடர்ந்து வெற்றிகரமாக நடத்தி வருகிறது. அதன் தொடர்ச்சியாக, 46-வது இந்திய சுற்றுலா மற்றும் தொழில் பொருட்காட்சி இன்று இனிதே துவங்குகிறது. இந்த ஆண்டு பொருட்காட்சியின் கருப்பொருள் “Tourism and jobs, a ,better future for all!” என்பதாகும். இப்பொருட்காட்சியில் மாநிலத்தின் 28 அரசுத் துறைகள், 14 மாநில பொதுத் துறை நிறுவனங்கள், ஒரு மத்திய அரசு நிறுவனம், 4 பிற மாநில அரசு நிறுவனங்கள், தமிழ்நாடு சட்ட உதவி மையம் மற்றும் 110 தனியார் அரங்குகள் இடம் பெற்றுள்ளன.

இப்பொருட்காட்சியில் அம்மா அவர்களின் அரசு செய்து கொண்டிருக்கும் ஆக்கபூர்வமான பணிகளையும், மக்களின் வாழ்க்கைத் தரத்தை உயர்த்துவதற்காக செயல்படுத்தப்படும் திட்டங்களையும் மக்கள் எளிதில் புரிந்து கொண்டு பயன்பெறும் வகையில், அரசுத் துறை அரங்கங்கள் அமைக்கப்பட்டுள்ளன. மேலும், குழந்தைகளுக்காகவும், பெரியவர்களுக்காகவும் பொழுதுபோக்கு அம்சங்களும் இந்தப் பொருட்காட்சியில் இடம் பெற்றுள்ளன. இப்பொருட்காட்சியில் பனி உலகம், கடல்வாழ் மீன் அருங்காட்சியகம், லேசர் ஷோ கண்காட்சி ஆகிய சிறப்பு அம்சங்களும் இடம் பெற்றுள்ளன.

Tour என்ற ஆங்கில சொல்லானது, TORNOS என்ற லத்தீன் சொல்லில் இருந்து பிறந்தது ஆகும். டோர்னஸ் என்ற லத்தீன் வார்த்தை சக்கரத்தை, அதாவது சுற்றி வருவதை குறிக்கிறது. இவ்வாறு லத்தீன் மொழியில் பிறந்த Tour என்ற சொல் ஆங்கில மொழியில் இணைந்தது. எனவே பல இடங்களுக்குச் சென்று பார்த்து விட்டு மீண்டும் தனது இருப்பிடம் வந்து சேர்வதைத் தான் இந்த Tour என்ற வார்த்தை குறிக்கிறது.

முன்னர் பணம் படைத்தவர்கள் மட்டுமே சென்று வந்த சுற்றுலா என்பது, தற்போது உலக மக்களின் தேவைகளில் ஒன்றாக மாறி வருகிறது. அதிசயமானவை, ஆர்வமூட்டக் கூடியவை, மனதை கவர்பவை, இயற்கைக் காட்சிகள் போன்றவற்றைக் காண மக்கள் விரும்புகின்றனர். தாங்கள் வசிக்கும் இடங்களிலிருந்து சென்று பிற இடங்களைக் காணும் ஆர்வமே சுற்றுலா தோன்றுவதற்கு அடிப்படை காரணமாகும். மக்கள் இன்பமாகவும், பயனுள்ளதாகவும் ஓய்வு நேரத்தை செலவிட சுற்றுலாவை விரும்புகின்றனர். மக்களின் வாழ்க்கைத் தரம், போக்குவரத்தில் முன்னேற்றம், தரமான சாலைகள், விரைவான செய்தித் தொடர்பு வசதி போன்றவை சுற்றுலாவை ஒரு முக்கியமான தொழிலாக மாற்றியுள்ளன.

இன்றைய உலகில் சுற்றுலா ஒரு பயன்மிகு தொழிலாக விளங்குகிறது. சுற்றுலா மூலம் தனிநபர் பயனடைவது தவிர, நாட்டின் வருவாயும் அதிகரித்து, பொருளாதார வளர்ச்சி அடைந்து, பல துறைகளில் நாடு முன்னேற வழி வகுக்கிறது.
வேற்றுமையில் ஒற்றுமையைப் பேணும் இந்தியா போன்ற நாடுகளில், சுற்றுலா செல்லும் பயணி பிற மாநிலங்களில் வாழும் மக்களுடன் கூடிப் பேசி மகிழ முடிகிறது. நாட்டின் ஒரு பகுதியில் வாழும் மக்கள், பிற பகுதிகளுக்கு செல்லும் போது, ஒருமைப்பாட்டு உணர்வு வலுவடைகிறது.

வெளிநாட்டிற்கு நாம் செல்லும் போதும், வெளிநாட்டினர் நம் நாட்டிற்கு வரும் போதும், புலவர் கனியன் பூங்குன்றனாரின் ‘யாதும் ஊரே யாவரும் கேளீர்’ என்ற கூற்றிற்கு ஏற்ப நாம் அனைவரும் உலகத்தின் குடிமக்கள் என்ற உணர்வு மேலோங்குகிறது. தமிழ்நாட்டிற்கு வரும் சுற்றுலா பயணிகளின் எண்ணிக்கை அதிகரித்து வருவதை கருத்தில் கொண்டு சுற்றுலாத் தலங்களின் உட்கட்டமைப்பு வசதிகளை மேம்படுத்துவதிலும், தொடர்ந்து புதிய சுற்றுலா மையங்களை தெரிவு செய்து அதற்குத் தேவையான அடிப்படை வசதிகளை உருவாக்குவதற்கும், பல்வேறு திட்டங்களை அம்மா அவர்களின் அரசு செயல்படுத்தி வருவதால், சுற்றுலாப் பயணிகளின் வருகையில் தமிழ்நாடு, இந்தியாவிலேயே ஒரு முன்னோடி மாநிலமாக திகழ்ந்து வருகிறது. இதனால், தமிழ்நாட்டிற்கு வருகை புரியும் உள்நாட்டு மற்றும் வெளிநாட்டு சுற்றுலாப் பயணிகளின் எண்ணிக்கை ஆண்டுதோறும் அதிகரித்து வருகிறது.

தமிழ்நாட்டில் மிகவும் போற்றத்தக்க வகையில் கட்டடக் கலைகள், உயிரோட்டமுள்ள பாரம்பரிய இசை, நடனம், கிராமியக் கலை மற்றும் கவின் கலை ஆகியவை உள்ளன.

* தமிழ்நாட்டில் ஆண்டுதோறும் நடைபெறும் இசை விழா நிகழ்ச்சியை கேட்டு ரசிப்பதற்கும்,

* நாட்டியாஞ்சலி மற்றும் தமிழ்நாட்டிற்கே உரிய வீர விளையாட்டுகளை கண்டு களிப்பதற்கும்,

* தமிழ்நாட்டில் உயர்தர மருத்துவம் பெறுவதற்கும்,

* உயர்கல்வி நிறுவனங்களில் கல்வி பயில்வதற்கும் என பிற நாடுகள் மற்றும் மாநிலங்களில் இருந்து தமிழ்நாட்டிற்கு சுற்றுலாப் பயணிகள் பெருமளவில் வந்த வண்ணம் உள்ளனர்.இது தவிர, ஆன்மிகம் மற்றும் பொழுதுபோக்கு சுற்றுலாத் தலங்கள் தமிழ்நாட்டில் அதிக அளவில் உள்ளன. குறிப்பாக உதகமண்டலம், கொடைக்கானல், ஏற்காடு போன்ற சுற்றுலாத் தலங்கள், உலகின் 2-வது நீளமான கடற்கரையான சென்னை மெரினா கடற்கரை, உலகிலேயே மூன்று கடல் சங்கமிக்கும் கன்னியாகுமரி, சிற்பக் கலையில் சிறந்த மாமல்லபுரம், தமிழ்நாடு முழுவதும் நிறைந்து காணப்படும் 40 ஆயிரத்துக்கு மேற்பட்ட கோயில்கள், ஒவ்வொரு மதத்தினரும் வழிபடும் வழிபாட்டு தலங்கள் ஆகியவை சுற்றுலாப் பயணிகளை தமிழ்நாட்டிற்கு ஈர்க்கின்றன.

யுனெஸ்கோவால் அறிவிக்கப்பட்ட உலகப் பாரம்பரிய சின்னங்கள் அமைந்துள்ள மாமல்லபுரம், தஞ்சை பெரிய கோயில், தாராசுரம் திருக்கோயில், கங்கைகொண்ட சோழபுரம் திருக்கோயில் மற்றும் நீலகிரி மலை ரயில் ஆகியவை தமிழ்நாட்டில் உள்ளன.2014, 2015, 2016 மற்றும் 2017-ம் ஆண்டுகளில் உள்நாட்டு மற்றும் வெளிநாட்டு சுற்றுலாப் பயணிகளின் வருகையில் இந்தியாவிலேயே தமிழ்நாடு முதலிடத்தை பெற்றுள்ளது. 2018ஆம் ஆண்டில் 39 கோடி உள்நாட்டு சுற்றுலாப் பயணிகள், 61 லட்சம் வெளிநாட்டு சுற்றுலாப் பயணிகள் என சுமார் 40 கோடி சுற்றுலாப் பயணிகள் தமிழ்நாட்டிற்கு வருகை புரிந்துள்ளனர்.

ஆண்டுக்கு ஆண்டு தமிழ்நாட்டுக்கு வருகை புரியும் சுற்றுலாப் பயணிகளின் எண்ணிக்கை அதிகரித்து வருவது, இந்தியாவிலேயே மிகவும் விரும்பத் தக்க சுற்றுலா தலங்கள் நிறைந்த மாநிலம் தமிழ்நாடு என்பதை உறுதிப்படுத்துகிறது.
சுற்றுலாத் துறையில் அம்மாவின் அரசு நிகழ்த்திய சாதனைகள் சிலவற்றை இங்கே குறிப்பிட்டுச் சொல்ல விரும்புகிறேன்.

• தமிழ்நாடு சுற்றுலா வளர்ச்சிக் கழகம், 53 தங்கும் விடுதிகள் மற்றும் 14 சொகுசு பேருந்துகளுடன் செயல்பட்டு வருகிறது.
• தமிழ்நாட்டிற்கு வருகை புரியும் சுற்றுலாப் பயணிகளின் வசதிக்காக, முக்கிய சுற்றுலாத் தலங்களின் உட்கட்டமைப்பு வசதிகள் மற்றும் அடிப்படை வசதிகள் மேம்படுத்த, 2018-19 ஆம் ஆண்டில் 6 கோடியே 28 லட்சம் ரூபாயும், சாலை மேம்பாட்டுப் பணிகளுக்காக 10 கோடியே 64 லட்சம் ரூபாயும் செலவிடப்பட்டுள்ளன. இந்த ஆண்டில் 2 வோல்வோ பேருந்துகள் வாங்கியது உட்பட 20 கோடியே 94 லட்சம் ரூபாய் மதிப்பீட்டில் பல்வேறு பணிகள் தமிழ்நாடு சுற்றுலா வளர்ச்சிக் கழகத்தினால் மேற்கொள்ளப்பட்டு வருகின்றன.

• மேலும், காஞ்சிபுரத்தில் சுற்றுலா மேம்பாட்டிற்காக 16 கோடியே 47 லட்சம் ரூபாய் மதிப்பீட்டிலும், வேளாங்கண்ணியில் சுற்றுலா மேம்பாட்டிற்காக 5 கோடியே 60 லட்சம் ரூபாய் மதிப்பீட்டிலும் பணிகள் நடைபெற்று வருகின்றன.
• முக்கியமான கடற்கரை சுற்றுலா தலங்களை மேம்படுத்த 99 கோடியே 91 லட்சம் ரூபாய் நிதியில், கடற்கரை பகுதிகளில் நிலச் சீரமைப்பு, மின் விளக்கு வசதி, பொது கழிப்பிடங்கள், சாலையோர வசதிகள், கண்காணிப்பு கோபுரங்கள் அமைத்தல் போன்ற பல்வேறு பணிகள் நடைபெற்று வருகின்றன.

• ஆசிய வளர்ச்சி வங்கி நிதி உதவியுடன் சுற்றுலா உள்கட்டமைப்பு மேம்பாட்டு மூலதனத் திட்டம் தொகுதி-4ன் கீழ், 288 கோடி ரூபாய் மதிப்பீட்டில் சுற்றுலாத் தலங்களில் ஆற்றல்மிகு மின் விளக்குகள் அமைத்தல், ஒளிரும் வழிகாட்டு பலகைகள் அமைத்தல், சிதம்பரம், ஆலங்குடி மற்றும் வேதாரண்யத்தில் சுற்றுலாப் பயணியர் தங்கும் விடுதி கட்டுதல், காஞ்சிபுரத்தில் யாத்ரி நிவாஸ் கட்டுதல், கன்னியாகுமரியில் உள்ள விவேகானந்தர் நினைவு மண்டபத்திற்கு சென்று வர படகுகள் வாங்குதல் போன்ற பல்வேறு பணிகள் துவக்கப்பட்டுள்ளன. இவை அனைத்தும் வரும் 2020 ஆம் ஆண்டில் முடிவடையும் வகையில் பணிகள் பல்வேறு நிலைகளில் நடைபெற்று வருகின்றன.

• அம்மா அவர்களின் ஆணையின்படி, 1992-ம் ஆண்டு முதல் ஒவ்வோர் ஆண்டும் டிசம்பர்-ஜனவரி மாதங்களில் இந்திய நாட்டிய விழா மாமல்லபுரத்தில் நடத்தப்பட்டு வருகிறது. இவ்விழாவினை காண இந்தியாவின் பிற பகுதிகள் மற்றும் வெளிநாடுகளிலிருந்து அதிக அளவில் சுற்றுலாப் பயணிகள் வருகை புரிகின்றனர்.

• தமிழ்நாட்டில் சிற்பங்கள், குகை கோயில்கள் அதிகம் உள்ள மாமல்லபுரத்தில் சமீபத்தில் சீன நாட்டு அதிபரும், பாரதப் பிரதமரும் பேச்சு வார்த்தை நடத்தியது ஒரு வரலாற்று சிறப்புமிக்க நிகழ்வாகும். இதனைத் தொடர்ந்து, மாமல்லபுரத்தை காண சுற்றுலாப் பயணிகளின் வருகை அதிகரித்துள்ளது. சுற்றுலாப் பயணிகளின் தேவைகளை நிறைவேற்றும் வகையில், உட்கட்டமைப்பு வசதிகளை மேம்படுத்தவும், ஏற்கனவே உள்ள வசதிகளை நவீனப்படுத்தவும் மத்திய அரசின் துணையுடன் திட்டங்கள் செயல்படுத்தப்படும். இதற்கென மத்திய அரசு தனது ஒப்புதலை சமீபத்தில் வழங்கியுள்ளது என்பதையும் மகிழ்ச்சியுடன் தெரிவித்துக் கொள்கிறேன்.

• கடந்த 29.11.2019 அன்று செங்கல்பட்டு மாவட்ட துவக்க விழாவில், மாமல்லபுரத்திற்கு வரும் உள்நாடு மற்றும் வெளிநாடு சுற்றுலாப் பயணிகளின் வசதிக்காக, மாமல்லபுரச் சுற்றுலா பேருந்து வசதியினை துவக்கி வைத்தேன். இதன் சிறப்பு அம்சம் என்னவென்றால், மாமல்லபுரத்தில் உள்ள கடற்கரைக் கோவில், ஐந்து ரதம், அர்ஜுனன் தபசு பாறை சிற்பங்கள், சிற்ப அருங்காட்சியம், கலங்கரை விளக்கம், புலிக்குகை உள்ளிட்ட வரலாற்று நினைவுச் சின்னங்களை சுற்றுலாப் பயணிகள் சிரமமின்றி குறுகிய காலத்தில் குளிர்சாதன வசதி கொண்ட பேருந்தில் 50 ரூபாய் கட்டணத்தில் கண்டு களிக்கலாம்.

இது போன்று எண்ணற்ற சாதனைகளை தமிழ்நாடு சுற்றுலாத் துறை நிகழ்த்தி வருகிறது என்பதைப் பெருமையுடன் இந்த நிகழ்ச்சியின் வாயிலாகதெரிவித்துக் கொள்கிறேன்.  பசிபிக் பகுதி பயண எழுத்தாளர்கள் சங்கத்தின் சார்பில் ‘சிறந்த பாரம்பரிய சுற்றுலா மாநிலம்’ என்ற சர்வதேச விருது தமிழ்நாட்டிற்கு வழங்கப்பட்டுள்ளது.
• ‘இந்தியா டுடே’ குழுமம் 2018-ம் ஆண்டில் ‘சுற்றுலாவில் சிறந்த செயல்திறன் மிக்க மாநிலம்’ என தமிழ்நாட்டை தேர்வு செய்து விருது வழங்கியுள்ளது.

வேளாண்மைத் துறையில் 5வது முறையாக கிரிஷி கர்மான் விருதைப் பெற்றுள்ள மாநிலம் தமிழ்நாடு,
* உள்ளாட்சித் துறையில் மத்திய அரசின் 99 விருதுகளைப் பெற்று சாதனையை படைத்த அரசு அம்மாவின் அரசு,
* உடல் உறுப்பு மாற்று அறுவை சிகிச்சையில் 5வது முறையாக மத்திய அரசு விருதை தொடர்ந்து பெற்றுள்ளது,
* சட்டம் ஒழுங்கிற்காக ‘இந்தியா டுடே’ பத்திரிகை விருது வழங்கியுள்ளது,

என அம்மாவின் அரசின் ஒவ்வொரு துறையும் சிறந்த பணிகளுக்கான விருதுகளை பெற்ற மாநிலம் என்ற அந்தஸ்தைப் பெற்றுள்ளது. இதன் மூலம் தமிழ்நாடு என்றால் விருது பெறும் முதன்மை மாநிலம் என்று அனைவரும் நினைக்கும் அளவுக்கு இந்திய அளவில் தமிழ்நாட்டின் நிலை உயர்ந்து நிற்கிறது என்பதை பெருமிதத்துடன் இந்த நிகழ்ச்சியின் வாயிலாக குறிப்பிட விரும்புகிறேன்.அம்மாவின் அரசு நிகழ்த்தும் சாதனைகள் பலரால் பாராட்டப்பட்டாலும், சிலர் ஒப்புக் கொள்ள மனமின்றி, நாம் வெற்றிகரமாக பயணிக்கும் பாதைகளில் தடைகளை ஏற்படுத்த முயன்று வருகிறார்கள்.

இந்தப் பொருட்காட்சியில் நேர்த்தியாக அரங்கங்களை அமைத்த அரசுத் துறை நிறுவனங்கள், பொதுத் துறை நிறுவனங்கள், மத்திய, பிற மாநிலத் துறை நிறுவனங்கள் மற்றும் தனியார் நிறுவனங்களுக்கு எனது பாராட்டுதல்களை தெரிவித்துக் கொள்கிறேன்.ஒரு முறை பயன்படுத்தி தூக்கி எறியக்கூடிய நெகிழி பொருட்களை அம்மாவின் அரசுதான் முதன் முதலில் தடை செய்தது. இதற்கு பொது மக்களாகிய நீங்கள் அளித்து வரும் ஆதரவு எனக்கு மட்டற்ற மகிழ்ச்சி அளிக்கின்றது.
இந்தப் பொருட்காட்சியில் ஒரு முறை பயன்படுத்தி தூக்கி எறியும் நெகிழி பொருட்களை அறவே ஒதுக்கியும், அரங்கங்களை சுத்தமாக வைக்கவும், பொதுமக்களாகிய உங்களின் ஒத்துழைப்பை நல்குமாறு அன்புடன் கேட்டுக் கொள்கிறேன்.

இந்த இனிய விழாவினை நல்ல முறையில் ஏற்பாடு செய்த அனைத்து நல்ல உள்ளங்களுக்கும் எனது நன்றியை தெரிவித்துக் கொள்கிறேன்.

இவ்வாறு முதலமைச்சர் எடப்பாடி கே.பழனிசாமி பேசினார்.