தமிழகம்

ரூ.288 கோடியில் சுற்றுலா வளர்ச்சி பணிகள் – முதலமைச்சர் அறிவிப்பு

சென்னை:-

சென்னை தீவுத்திடலில் 46-வது சுற்றுலா பொருட்காட்சி நேற்று மாலை தொடங்கி வைக்கப்பட்டது. முதலமைச்சர் எடப்பாடி கே.பழனிசாமியும், துணை முதலமைச்சர் ஓ.பன்னீர்செல்வமும் குத்து விளக்கேற்றி பொருட்காட்சியை தொடங்கி வைத்தனர். இந்த பொருட்காட்சியில் அரசு துறை சார்பில் 28 அரங்குகளும், பொதுத்துறை சார்பில் 16 அரங்குகளும், மத்திய, மாநில அரசுகள் சார்பில் அரங்குகளும், 110 தனியார் அரங்குகளும் இடம்பெற்றுள்ளன.

70 நாட்கள் நடைபெறும் இந்த பொருட்காட்சி சிறுவர்களையும், பெரியவர்களையும் கவரும் வகையில் மிக சிறப்பாக அமைக்கப்பட்டுள்ளது. ஐ லேண்ட் மைதானமே ஒளி வெள்ளத்தில் திகழும் இந்த பொருட்காட்சியை காண பெரியவர்களுக்கு ரூ.35-ம், சிறுவர்களுக்கு ரூ.20-ம் கட்டணம் நிர்ணயிக்கப்பட்டுள்ளது. பொருட்காட்சியில் தினமும் பல்வேறு பொழுதுபோக்கு நிகழ்ச்சிகள், இசை நிகழ்ச்சிகள் நடைபெற உள்ளன.

பொருட்காட்சியை தொடங்கி வைத்து முதலமைச்சர் எடப்பாடி கே.பழனிசாமி பேசியதாவது:-

அம்மா அவர்கள் கொண்டு வந்த பல்வேறு நலத்திட்டங்கள் இங்கு அமைக்கப்பட்டுள்ள அரசு அரங்குகளில் இடம் பெற்றுள்ளன. பொழுது போக்கு அம்சங்களும், அனைவரும் கண்டு மகிழும் பல்வேறு அரங்குகளும் இடம் பெற்றிருக்கின்றன. ஆண்டு தோறும் தமிழக சுற்றுலாத்துறை முதலிடம் பெற்று திகழ்கிறது. இந்தியாவிலேயே தமிழ்நாடு தான் சுற்றுலாத்துறையில் முதல் மாநிலமாக திகழ்ந்து கொண்டிருக்கிறது.

தமிழகத்தில் பல்வேறு சுற்றுலா தலங்கள், ஆன்மிக தலங்கள், ஊட்டி, கொடைக்கானல், ஏற்காடு போன்ற இயற்கை எழில் கொஞ்சும் மலை பிரதேசங்கள், மெரினா கடற்கரை, மாமல்லபுரம் சிற்பக்கலை, தஞ்சை பெரிய கோயில், கன்னியாகுமரி போன்ற இடங்கள் இந்திய சுற்றுலா பயணிகளையும் உலகின் பல்வேறு நாடுகளில் இருந்து வரும் சுற்றுலா பயணிகளையும் வெகுவாக கவர்ந்துள்ளன.

சுற்றுலா துறைக்கென பல்வேறு வளர்ச்சி திட்டங்களை தமிழக அரசு செய்து வருகிறது. காஞ்சிபுரத்தில் ரூ.16 கோடியிலும், வேளாங்கண்ணியில் ரூ.5 கோடியிலும் புதிய சுற்றுலா வளர்ச்சி பணிகள் நடைபெற்று வருகின்றன. ஆசிய வளர்ச்சி வங்கியின் உதவி பெற்று ரூ.288 கோடியில் பல்வேறு வளர்ச்சி பணிகள் சுற்றுலா துறைக்கென நடைபெற்று வருகின்றன. இந்த பணிகள் அடுத்த ஆண்டுக்குள் நிறைவு பெற்று விடும்.

தமிழக சுற்றுலாத்துறை ஆண்டுதோறும் விருது பெற்று வருகிறது. அதுமட்டுமல்ல சர்வதேச விருதும் தமிழக சுற்றுலாத்துறைக்கு கிடைத்திருக்கிறது. சுற்றுலாத்துறையில் மட்டுமல்ல பல்வேறு துறைகளில் தமிழகம் முதல்நிலை மாநிலமாக திகழ்ந்து வருவதோடு இதுவரை 99 தேசிய விருதுகளை பெற்று பெருமைக்குரிய மாநிலமாக திகழ்ந்து வருகிறது. என்ன தான் நாம் வளர்ச்சி பணிகளையும், நாட்டின் முன்னேற்றத்திற்கான திட்டங்களையும் வகுத்து நிறைவேற்றினாலும் குறை கூறுவதற்கென்றே சில புத்திசாலிகள் இருக்கிறார்கள்.

இந்த நேரத்தில் எனக்கு ஒரு கதை நினைவுக்கு வருகிறது. ஒரு குடும்பத்தை சேர்ந்த புத்திசாலிகள் வீடு கட்ட நினைத்தார்கள். அதற்கு மரம் வெட்டுவதற்கு ஆளுக்கொரு கோடாரியை எடுத்துக் கொண்டு காட்டுக்கு சென்றார்கள். முதலில் சென்றவர் பாதி வழியில் செல்லும் போது தவறி அடிபட்டு விட்டது. அதனால் கோடாரியை தூக்கி எறிந்து விட்டு நடந்து சென்றார். அவர் பின்னால் சென்றவர்கள் நமக்கு முன்னால் சென்றவர்களை கோடாரியை எறிந்து விட்டார்கள். நமக்கு எதற்கு என்று அவர்களும் எறிந்து விட்டார்கள். பிறகு காட்டுக்குள் சென்று அவர்கள் ஒரு மரத்தை வெட்ட முயற்சித்தபோது தான் தங்களிடம் கோடாரி இல்லை என்பது தெரியவந்தது.

அதற்கு முதலில் சென்றவர் சொன்னார். நான் மரத்தில் ஏறி அந்த கிளையை பிடித்து தொங்குகிறேன். நீங்கள் என் காலை பிடித்து வரிசையாக தொங்குங்கள், அந்தகிளை ஒடிந்து விடும். அதைஎடுத்துக் கொண்டு போய் வீடு கட்டலாம் என்றார். அதே மாதிரி அவர் மரத்தில் ஏறி கிளையை பிடித்து தொங்கினார். அதைத்தொடர்ந்து மற்றவர்களும் அவர் காலை பிடித்து தொங்கினார்கள். இறுக பிடித்து தொங்குங்கள்.

அப்போது தான் கிளை ஒடியும் என்றார் மேலே இருந்தவர். அனைவரும் அவர் காலை இறுக பிடித்து தொங்கியபோது எல்லோரும் கீழே விழுந்து விட்டார்கள். மரக்கிளை மட்டும் அப்படியேத்தான் இருந்தது. மரம் வெட்டுவதற்கு கோடாரி தான் முக்கியம் என்பது கூட தெரியாமல் சில புத்திசாலிகள் இருப்பதை போன்று நல்ல விஷயங்களை தெரிந்து கொள்ளாமல் எதற்கெடுத்தாலும் குறை சொல்வதையே தொழிலாக வைத்திருக்கும் புத்திசாலிகளும் இருக்கிறார்கள்.

இவ்வாறு முதலமைச்சர் எடப்பாடி கே.பழனிசாமி பேசினார்.

விழாவில் துணை முதலமைச்சர் ஓ.பன்னீர்செல்வம் பேசுகையில், தமிழகத்தில் பழங்கால கலை பொக்கிஷங்கள் தான் சுற்றுலாத்துறையின் வளர்ச்சிக்கு பெரிதும் காரணமாக உள்ளன என்று குறிப்பிட்டார். தமிழகத்தில் உள்ள சிற்பக்கலை, இசை, நாட்டியம், ஆன்மிக தலங்கள், இயற்கையை கொஞ்சும் இடங்கள் போன்றவை சுற்றுலா பயணிகளை பெரிதும் கவர்ந்து இழுக்கின்றன. அதனால் தான் தமிழகம் சுற்றுலாத்துறையில் முதல்நிலை மாநிலமாக தொடர்ந்து விருது பெற்று வருகிறது. ஆண்டுதோறும் சுற்றுலா பயணிகளின் எண்ணிக்கையும் அதிகரித்துக் கொண்டே வருகிறது என்று துணை முதலமைச்சர் குறிப்பிட்டார்.

விழாவில் சுற்றுலாத்துறை அமைச்சர் வெல்லமண்டி என்.நடராஜன், மீன்வளத்துறை அமைச்சர் டி.ஜெயக்குமார் மற்றும் அமைச்சர்கள், சட்டமன்ற, நாடாளுமன்ற உறுப்பினர்கள் கலந்து கொண்டனர்.