தற்போதைய செய்திகள்

கழக கூட்டணி வெற்றிக்கு கண் துஞ்சாது உழைப்போம் – அமைச்சர் எம்.சி.சம்பத் அறைகூவல்

கடலூர்

உள்ளாட்சி தேர்தல் நடைபெற இன்னும் 6 நாட்களே உள்ள நிலையில் நாம் கண் துஞ்சாது பணியாற்றி சிறப்பான வெற்றியை பெற வேண்டும் என்று கடலூரில் நடந்த ஆலோசனைக் கூட்டத்தில் அமைச்சர் எம்.சி.சம்பத் பேசினார்.

கடலூர் மத்திய மாவட்டம் கடலூர் ஊராட்சி ஒன்றியம் மூன்றாவது மாவட்ட ஊராட்சி 3-வது வார்டு உறுப்பினர் பதவி உள்பட ஊரக உள்ளாட்சி தேர்தலில் போட்டியிடும் வேட்பாளர்களின் அறிமுக கூட்டம் மற்றும் தேர்தல் வெற்றி குறித்த ஆலோசனை கூட்டம் வெள்ளக்கரையில் நடைபெற்றது.

இந்த கூட்டத்திற்கு கடலூர் தெற்கு ஒன்றிய செயலாளர் இராம.பழனிசாமி தலைமை தாங்கினார். பா.ம.க மாநில துணை பொதுச்செயலாளர் சண்.முத்துகிருஷ்ணன், மாவட்ட தலைவர் கோபிநாத், கடலூர் நகர பொருளாளர் தனசேகரன், துணை செயலாளர் கந்தன், மாவட்ட எம்ஜிஆர் மன்ற இளைஞரணி தலைவர் ஆர்.மாதவன், ஆகியோர் முன்னிலை வகித்தனர்.

இந்த கூட்டத்தில் கடலூர் மத்திய மாவட்ட செயலாளரும், தொழில்துறை அமைச்சருமான எம்.சி.சம்பத், முன்னாள் அமைச்சரும், கழக கொள்கை பரப்பு துணைச் செயலாளருமான டாக்டர்.வைகைச்செல்வன் ஆகியோர் வேட்பாளர்களை அறிமுகப்படுத்தி பேசினர்.

இந்த கூட்டத்தில் அமைச்சர் எம்.சி.சம்பத் பேசியதாவது:-

தற்போது நடைபெறவுள்ள உள்ளாட்சித் தேர்தலில் மிக சிறப்பான ஒரு கூட்டணியின் சார்பாக நாம் போட்டியிடுகின்றோம். தற்போது தமிழகத்தில் மக்களின் நலன் காக்கின்ற, மக்களின் தேவைகளை நிறைவேற்றுகின்ற அரசை முதல்வர் எடப்பாடி கே.பழனிசாமி நடத்துகிறார். நமது முதல்வர் அனைவராலும் எளிதாக அணுகக்கூடிய முதல்வர். மக்கள் நலத்திட்டங்கள் தேவை என்று எதை கேட்டாலும் உடனடியாக நிறைவேற்றி தருகின்ற முதல்வர் தற்போது தமிழகத்தை ஆட்சி செய்து கொண்டிருக்கின்றார்.

தமிழக வரலாற்றில் தற்போது தான் மேட்டூர் அணை மூன்று முறைக்கு மேல் நிரம்பி தமிழகத்தை வளமாக்கிக் கொண்டிருக்கிறது. தமிழகத்தில் சிறப்பாக ஆட்சி நடந்து கொண்டிருக்கிறது என்பதற்கு இதைவிட சான்று வேறு தேவையில்லை. கழக வேட்பாளர்களும், கூட்டணி கட்சி வேட்பாளர்களும் தாங்கள் போட்டியிடும் பகுதிகளில் உள்ள மாற்று கட்சியினரை அரவணைத்து செல்ல வேண்டும். உள்ளாட்சி தேர்தல் நடைபெற இன்னும் 6 நாட்களே உள்ள நிலையில் நாம் கண் துஞ்சாது பணியாற்றி சிறப்பான வெற்றியை பெற வேண்டும். எதிரிக்கு வெற்றி இல்லை. கழகமே அனைத்து இடங்களில் வெற்றிபெற்றது என்ற நிலையை கடலூர் மத்திய மாவட்டம் உருவாக்க வேண்டும்.

வேட்பாளர்கள் அனைவரும் வீடு, வீடாக சென்று வாக்குகளை சேகரிக்க வேண்டும். இந்த தேர்தலில் வரலாற்று சிறப்பு மிக்க வெற்றியை பெற்று கழகம் எனக்கு பின்னும் இன்னும் நூறாண்டு காலம் ஆட்சி செய்யும் எனும் புரட்சித்தலைவி அம்மாவின் கனவை நினைவாக்க வேண்டும். இங்கு மூன்றாவது வார்டு மாவட்ட கவுன்சிலர் பதவிக்கு போட்டியிடும் இராம.பழனிசாமி மற்றும் ஊராட்சி ஒன்றிய கவுன்சிலர் வேட்பாளர்கள் குமுதம் சேகர், ராமதாஸ், த.ராமலிங்கம், வினோத், குருநாதசாமி, கிருஷ்ணசாமி ஆகியோருக்கு இரட்டைஇலை சின்னத்திலும், ஜெயராமன், சுதாமுத்துகிருஷ்ணன். தீபா வீரமணி, ஆகியோருக்கு மாம்பழம் சின்னத்தில் வாக்களித்து வெற்றிபெறச் செய்ய வேண்டும்.

இவ்வாறு அமைச்சர் எம்.சி.சம்பத் பேசினார்.

இந்த கூட்டத்தில் மாவட்ட பிரதிநிதி எம்.வேல்முருகன், ஊராட்சி செயலாளர்கள் கொடுக்கன்பாளையம் மாயவேல், வி.காட்டுப்பாளையம் ராமலிங்கம், இராமபுரம் கலியமூர்த்தி, குமளங்குளம் சுந்தரம், திருமாணிக்குழி சுந்தரமூர்த்தி, முன்னாள் ஊராட்சி மன்றத்தலைவர் அருள், தி.புதுப்பாளையம் சேகர், வண்டிக்குப்பம் சேகர், திருமாணிக்குழி மோகன் மற்றும் பலர் கலந்து கொண்டனர்.