தற்போதைய செய்திகள்

அம்மாவின் ஆட்சி என்றென்றும் தொடரும் – சட்டப்பேரவையில், அமைச்சர் நிலோபர்கபீல் உறுதி…

சென்னை:-

அம்மாவின் ஆட்சி என்றென்றும் தொடரும் என்று சட்டப்பேரவையில் தொழிலாளர் நலத்துறை அமைச்சர் நிலோபர்கபீல் தெரிவித்துள்ளார்.

சட்டப்பேரவையில் தொழிலாளர் நலத்துறை மானியக் கோரிக்கை விவாதங்களுக்கு தொழிலாளர் நலத்துறை அமைச்சர் நிலோபர்கபீல் அளித்த பதிலுரை வருமாறு:- 

பொறியியல் மற்றும் பல்தொழில்நுட்ப பட்டதாரிகளை தொழில்துறைக்கு ஏற்றவாறு தயார்படுத்தும் வகையில் தமிழ்நாடு திறன் மேம்பாட்டுக் கழகம், தானியங்கி மற்றும் ரோபோடிக்ஸ் துறையில் உலக அளவில் முன்னனி நிறுவனமான சீமென்ஸ் மற்றும் அண்ணா பல்கலைக்கழகத்துடன் இணைந்து பொது மற்றும் தனியார் கூட்டமைப்பாக ஒரு திறன்மிகு மையம் மற்றும் ஐந்து இணைப்பு தொழில்நுட்ப திறன் பயிற்சி மையங்கள் ரூ.546.84 கோடி திட்ட மதிப்பீட்டில் அமைக்கப்பட்டுள்ளது.

சென்னை குரோம்பேட்டையில் உள்ள எம்.ஐ.டி வளாகத்தில் அமைந்துள்ள திறன்மிகு மையம் மற்றும் ஐந்து இணைப்பு தொழில் நுட்பதிறன் மேம்பாட்டு மையங்கள் முதலமைச்சரால் 10.10.2018 அன்று திறந்து வைக்கப்பட்டது. இத்திறன் மேம்பாட்டு மையங்கள் மூலமாக 2018-19ம் ஆண்டில் 2887 நபர்கள் பயிற்சி பெற்று பயனடைந்துள்ளனர்.

தொழிலாளர் அரசு ஈட்டுறுதி திட்டமானது, அமைப்பு சார்ந்த துறைகளில் உள்ள தொழிலாளர்களுக்கு சமூக பாதுகாப்பு அளிக்கிறது. தமிழ்நாட்டில் தொழிலாளர் அரசு ஈட்டுறுதி திட்டத்தில் பதிவு செய்துள்ள காப்பீட்டு நபர்கள் மற்றும் அவர்தம் குடும்பத்தினருக்கும் 10 தொழிலாளர் அரசு ஈட்டுறுதி மருத்துவமனைகள் மற்றும் 218 தொழிலாளர் அரசு ஈட்டுறுதி மருந்தகங்கள் மூலம் மருத்துவ சேவை அளிக்கப்பட்டு வருகிறது.

மேலும், கடந்த எட்டு ஆண்டுகளில் 1,81,680 தொழிலாளர்கள் பயன் பெறும் வகையில் 33 புதிய தொழிலாளர் அரசு ஈட்டுறுதி மருந்தகங்கள் துவக்கி வைக்கப்பட்டுள்ளன. 2016-2017ம் வருடத்தில் 72264 தொழிலாளர்கள் பயன் பெறும் வகையில் அத்திப்பட்டு, துரைசாமிபுரம், கல்பாக்கம், குலசேகரம், குளத்தூர், மகாபலிபுரம், மணச்சநல்லூர், பண்ருட்டி, மற்றும் ஊத்துக்குளி ஆகிய ஒன்பது பகுதிகளிலும், 2017-2018ம் வருடத்தில் 31,699 தொழிலாளர் பயன் பெறும் வகையில் ஒட்டன்சத்திரம், நெல்லியாளம், கள்ளக்குறிச்சி,

சிதம்பரம், பவானி, குன்னூர், கீழ்குந்தா(ஊட்டி), பாப்பிரெட்டிப்பட்டி, அரவக்குறிச்சி, பூதலூர் ஆகிய பத்து பகுதிகளிலும் புதிய தொழிலாளர் அரசு ஈட்டுறுதி மருந்தகங்கள் துவக்க அரசாணைகள் வழங்கப்பட்டு தற்போது புதுடெல்லி தொழிலாளர் மாநில காப்புறுதி கழகத்தின் நடவடிக்கையில் உள்ளது. தற்போது காஞ்சிபுரம் மாவட்டத்தில் உள்ள திருமுடிவாக்கம், மற்றும் திருப்பூர் மாவட்டத்தில் உள்ள பெருமாநல்லூர் ஆகிய இடங்களில் தொழிலாளர் அரசு ஈட்டுறுதி மருந்தகங்கள் தற்போது திறக்கப்பட்டு பயன்பாட்டில் உள்ளன.

இந்திய அரசியல் வரலாற்றில் சாதனை படைத்த முதல் பெண் தலைவர் என்ற பெருமையை பெற்று, அதை ஒவ்வொரு செயலிலும் நிரூபித்து காட்டிய ஒரே தலைவர் அம்மா மட்டும் தான். ஒரு அரசியல் இயக்கத்தின் தலைவராக ஒரு மாநிலத்தின் முதலமைச்சராக புரட்சித்தலைவி அம்மா அவர்கள் வென்று காட்டிய அதிசயங்கள் அனைவரின் மனங்களையும் விட்டு இன்னும் அகலாதவை.

அத்தகைய மகத்தான ஆளுமை படைத்த புரட்சித்தலைவி அம்மா இந்த மண்ணுலகை விட்டு மறைந்தாலும் இன்னும் எத்தனை நூற்றாண்டுகள் ஆனாலும் தமிழக மக்களின் மனங்களில் என்றென்றும் மறக்க முடியாத மாபெரும் தலைவியாக நிலைத்து நிற்பார்கள். அம்மாவின் ஆட்சி என்றென்றும் தொடரும் என்று தெரிவித்து அந்த வகையில் அம்மா வழியில் நல்லாட்சி நடத்தி வரும் முதலமைச்சர் எடப்பாடி கே.பழனிசாமிக்கும், அவருக்கு உறுதுணையாக இருக்கும் துணை முதலமைச்சருக்கும் நன்றியை தெரிவித்துக் கொள்கிறேன்.

இவ்வாறு தொழிலாளர் நலத்துறை அமைச்சர் நிலோபர்கபீல் பேசினார்.