தற்போதைய செய்திகள்

ராசிபுரம் நகராட்சியில் ரூ.1 கோடியில் வளர்ச்சி பணிகள் – அமைச்சர்கள் தொடங்கி வைத்தனர்…

நாமக்கல்:-

ராசிபுரம் நகராட்சியில் ரூ.1 கோடியில் வளர்ச்சி பணிகளை அமைச்சர் பி.தங்கமணி, வெ.சரோஜா ஆகியோர் துவக்கி வைத்தனர்.

நாமக்கல் மாவட்டம், ராசிபுரம் நகராட்சி, வேலா பூங்கா மற்றும் செம்மலை தெருவில் சட்டமன்ற உறுப்பினர் தொகுதி மேம்பாட்டு நிதியின் கீழ் கட்டப்பட்ட அங்கன்வாடி மையகட்டடம் திறப்பு விழா நிகழ்ச்சியும், ராசிபுரம் நகராட்சி பகுதிகளில் நியாயவிலைக்கடை கட்டுவதற்காக பூமிபூஜை நிகழ்ச்சியும், ராசிபுரம் நகராட்சி அலுவலகத்தில் திடக்கழிவு மேலாண்மை திட்டத்தின் கீழ் மின்கல (பேட்டரி) த்தினால் இயங்கும் குப்பை அள்ளும் வாகனங்கள் வழங்கும் நிகழ்ச்சியும் மாவட்ட ஆட்சித்தலைவர் மு.ஆசியா மரியம் தலைமையில் நடைபெற்றது.

இந்நிகழ்ச்சியில் கழக அமைப்புச் செயலாளரும், நாமக்கல் மாவட்ட கழக செயலாளரும், மின்சாரம், மதுவிலக்கு மற்றும் ஆயத்தீர்வைத்துறை அமைச்சருமான பி.தங்கமணி, கழக மகளிர் அணி இணைச் செயலாளரும், சமூக நலன் மற்றும் சத்துணவுத் திட்டத்துறை அமைச்சருமான மருத்துவர்.வெ.சரோஜா ஆகியோர் கலந்து கொண்டு ராசிபுரம் நகராட்சி, வேலா பூங்கா மற்றும் செம்மலை தெருவில் சட்டமன்ற உறுப்பினர் தொகுதி மேம்பாட்டு நிதியின் கீழ் ரூ.17 லட்சம் மதிப்பீட்டில் கட்டப்பட்ட அங்கன்வாடி மைய கட்டடத்தை மின்சாரம், மதுவிலக்கு மற்றும் ஆயத்தீர்வைத்துறை அமைச்சர் பி.தங்கமணி, சமூக நலன் மற்றும் சத்துணவுத்திட்டத்துறை அமைச்சர் மருத்துவர்.வெ.சரோஜா ஆகியோர் திறந்து வைத்தனர்.

மேலும் ராசிபுரம் நகராட்சி, வீட்டுவசதி வாரியம் அருகில் சட்டமன்ற உறுப்பினர் தொகுதி மேம்பாட்டு நிதியின்கீழ் ரூ.8.50 லட்சம் மதிப்பீட்டில் அங்கன்வாடி மைய புதிய கட்டடம் கட்டும் பணியினையும், ரூ.8.50 லட்சம் மதிப்பீட்டில் நியாய விலைக்கடை புதிய கட்டடம் கட்டும் பணியினையும், செம்மலை தெருவில் ரூ.8.50 லட்சம் மதிப்பீட்டில் நியாய விலைக்கடை புதிய கட்டடம் கட்டும் பணியினையும் அமைச்சர்கள் பூமிபூஜையிட்டு துவக்கி வைத்தனர். அதனைத்தொடர்ந்து ராசிபுரம் நகராட்சி அலுவலகத்தில் நடைபெற்ற நிகழ்ச்சியில் திடக்கழிவு மேலாண்மை திட்டத்தின் கீழ் ரூ.49.70 லட்சம் மதிப்பில் 24 எண்ணிக்கையில் மின்கல (பேட்டரி) த்தினால் இயங்கும் குப்பை அள்ளும் வாகனங்களை அமைச்சர்கள் கொடியசைத்து துவக்கி வைத்தனர்.

இந்நிகழ்ச்சிகளில் கூட்டுறவு சங்கங்களின் இணை பதிவாளர் பொ.பாலமுருகன், மாவட்ட வழங்கல் அலுவலர் கண்ணன், முன்னாள் நாமக்கல் நாடாளுமன்ற உறுப்பினர் பி.ஆர்.சுந்தரம், ராசிபுரம் நகர கழக செயலாளரும், ராசிபுரம் நகர கூட்டுறவு வங்கி தலைவருமான எம்.பாலசுப்ரமணியன், ஆர்.சி.எம்.எஸ் தலைவர் ஈ.கே.பொன்னுசாமி, ராசிபுரம் ஒன்றிய செயலாளர் எம்.காளியப்பன், வெண்ணந்தூர் ஒன்றிய செயலாளர் எஸ்.பி.தாமோதரன், மாவட்ட எம்.ஜி.ஆர். இளைஞர் அணி செயலாளரும், சேலம் கூட்டுறவு சர்க்கரை ஆலை மோகனூர் தலைவருமான கே.பி.எஸ்.சுரேஷ்குமார், ராசிபுரம் நகராட்சி ஆணையாளர் மா.கணேசன் உட்பட வட்டாட்சியர், அரசுத்துறை அலுவலர்கள், கூட்டுறவாளர்கள், உள்ளாட்சி அமைப்புகளின் முன்னாள் பிரதிநிதிகள், பொதுமக்கள் கலந்து கொண்டனர்