சிறப்பு செய்திகள்

மாநகராட்சி, நகராட்சி, பேரூராட்சிகளில் பழைய சொத்து வரி முறையே நீடிக்கும் – அமைச்சர் எஸ்.பி.வேலுமணி அறிவிப்பு

சென்னை:-

மாநகராட்சி, நகராட்சி, பேரூராட்சிகளில் பழைய சொத்து வரி முறையே நீடிக்கும் என்று உள்ளாட்சித்துறை அமைச்சர் எஸ்.பி.வேலுமணி அறிவித்துள்ளார்.

நகராட்சி நிர்வாகம், ஊரக வளர்ச்சி மற்றும் சிறப்பு திட்டங்கள் செயலாக்கத்துறை அமைச்சர் எஸ்.பி.வேலுமணி தலைமை செயலகத்தில் நேற்று செய்தியாளர்களுக்கு பேட்டி அளித்தார்.

அப்போது அவர் கூறியதாவது:-

சென்னை மாநகராட்சியில் 1998-க்கு பின்னரும் பிற மாநகராட்சிகள், நகராட்சிகள் மற்றும் பேரூராட்சிகளில் 2008-க்கு பின்னரும் சொத்து வரி சீராய்வு மேற்கொள்ளப்படவில்லை. சென்னை உள்ளிட்ட 15 மாநகராட்சிகள், 121 நகராட்சிகள் மற்றும் 528 பேரூராட்சிகளில் 1.4.2018 முதல் சொத்து வரி சீராய்வு மேற்கொள்ள அரசால் 19.9.2018-ல் அறிவிப்பு வெளியிடப்பட்டது.

அதன் அடிப்படையில் வாடகை அல்லாத சொந்த குடியிருப்பு கட்டடங்களுக்கு 50 சதவீதம் மிகாமலும், வாடகை குடியிருப்பு கட்டடங்களுக்கு 100 சதவீதம் மிகாமலும், பிற வகை கட்டடங்களுக்கு 100 சதவீதம் மிகாமலும் சொத்து வரியை உயர்த்த ஆணைகள் வெளியிடப்பட்டன.

பின்னர் அரசு 26.7.2018-ல் வாடகை மற்றும் வாடகை அல்லாத குடியிருப்பு கட்டடங்கள் அனைத்திற்குமே சொத்து வரி 50 சதவீதம் மிகாமல் உயர்வு செய்யப்படும் என அறிவித்தது. இதன் அடிப்படையில் 1.4.2018 முதல் அனைத்து நகர்புற உள்ளாட்சி அமைப்புகளிலும் சொத்து வரி சீராய்வு பணிகள் மேற்கொள்ளப்பட்டு வந்தன.

விரிவாக்கம் செய்யப்பட்ட 6 மாநகராட்சிகள் மற்றும் 4 நகராட்சி பகுதிகளில் ஏற்கனவே இணைக்கப்பட்ட பகுதிகளில் முந்தைய நகர்புற உள்ளாட்சி அமைப்பில் உள்ளது போன்றே திருத்தப்பட்ட மண்டல அடிப்படை மதிப்பீட்டின்படி சொத்து வரி உயர்வு செய்து சொத்துவரி விதிக்கப்பட்டது. சென்னை மற்றும் கோயம்புத்தூர் மாநகராட்சிகள் தவிர அனைத்து மாநகராட்சிகள் மற்றும் நகராட்சிகளில் 1.4.2018-க்கு முன்பு குறைவான அளவீடு செய்யப்பட்டு சொத்து வரி, உயர்வினை குறைக்கக்கோரி கோரிக்கைகள் நகர்புற உள்ளாட்சி அமைப்புகளால் பெறப்பட்டு வந்தன.

அதன் அடிப்படையில் நான் ஏற்கனவே சட்டமன்றத்தில் கடந்த 8.7.2019 அன்று உயர்த்தப்பட்ட சொத்து வரி சீராய்வு குறித்து மறுபரிசீலனை செய்யப்படும் என அறிவித்தேன். அதன்படி முதலமைச்சர் உத்தரவின் பேரில் நான் சட்டமன்றத்தில் ஏற்கனவே அறிவிப்பு செய்தபடி உயர்த்தப்பட்ட சொத்து வரி மறுபரிசீலனை செய்ய ஏதுவாக அரசு நிதித்துறை (செலவினங்கள்) முதன்மை செயலாளர் தலைமையில் நகராட்சி நிர்வாக ஆணையர், பேரூராட்சிகளின் இயக்குநர் மற்றும் பெருநகர சென்னை மாநகராட்சி ஆணையர் அடங்கிய 3 உறுப்பினர் கொண்ட குழு தற்போது அமைக்கப்பட்டுள்ளது.

இக்குழு மறு கணக்கீடு மற்றும் உள்ளாட்சி அமைப்புகளுடன் இணைக்கப்பட்ட பகுதிகளில் திருத்தப்பட்ட மண்டல அடிப்படை மதிப்பீட்டின்படி உயர்வு செய்யப்பட்ட சொத்து வரி, மிக அதிகமாக உள்ளதென பல்வேறு குடியிருப்போர் நலச்சங்கங்கள், வணிகர் சங்கங்கள், அரசியல் கட்சிகள் மற்றும் பொதுமக்கள் ஆகியோரிடமிருந்து பெறப்பட்ட பல்வேறு கோரிக்கைகளின் மீது ஆய்வு செய்து அரசுக்கு அறிக்கை அனுப்ப உத்தரவிடப்பட்டுள்ளது.

அதுவரையில் 15 மாநகராட்சிகள், 121 நகராட்சிகள் மற்றும் 528 பேரூராட்சிகளில் சொத்து வரி சீராய்வுக்கு முன்னர் 1.4.2018 அன்று செலுத்தி வந்த அதே சொத்து வரியை நகர்புற உள்ளாட்சி அமைப்புகளில் கட்டட உரிமையாளர்கள் செலுத்தினால் போதும். வரி விதிப்பாளர்கள் ஏற்கனவே கூடுதலாக செலுத்திய சொத்து வரி அவர்களின் சொத்து வரி கணக்கில் அடுத்த அரையாண்டுகளில் ஈடு செய்யப்படும்.

இவ்வாறு அமைச்சர் எஸ்.பி.வேலுமணி கூறினார்.

பேட்டியின்போது நகராட்சி நிர்வாகம் மற்றும் குடிநீர் வழங்கல்துறை அரசு முதன்மை செயலாளர் ஹர்மந்தர் சிங், நகராட்சி நிர்வாக ஆணையர் க.பாஸ்கரன், பெருநகர சென்னை மராநகராட்சி ஆணையர் கோ.பிரகாஷ், பேரூராட்சிகளின் இயக்குநர் எஸ்.பழனிசாமி, சென்னை பெருநகர் குடிநீர் வழங்கல் மற்றும் கழிவுநீரகற்று வாரிய மேலாண்மை இயக்குநர் த.ந.ஹரிஹரன் உள்ளிட்ட அரசு அலுவலர்கள் உடனிருந்தனர்.