தமிழகம்

20 நாளில் வெங்காயம் விலை குறையும் – முதலமைச்சர் எடப்பாடி கே.பழனிசாமி பேட்டி

கோவை:-

கோவை விமான நிலையத்தில் முதலமைச்சர் எடப்பாடி கே.பழனிசாமி நேற்று மாலை செய்தியாளர்களுக்கு பேட்டி அளித்தார். அப்போது அவர் கூறியதாவது:-

வெங்காயம் விலை உயர்வுக்கு விளைச்சல் பாதிக்கப்பட்டது தான் காரணம். வெங்காயம் அதிகம் விளையும் மாநிலங்களில் இந்த ஆண்டு மழையின் காரணமாக மிகவும் குறைந்து விட்டது. விளைச்சல் பற்றாக்குறை காரணமாகத்தான் வெங்காயம் விலை அதிகரித்து இருக்கிறது. தமிழகத்தில் விளைச்சல் சீராக உள்ளதால் இன்னும் 20 நாட்களில் வெங்காயம் விலை பழைய நிலைக்கே வந்துவிடும். எனவே இந்த விலை உயர்வு தற்காலிகமானது தான்.

உள்ளாட்சித் தேர்தல் உச்சநீதிமன்ற தீர்ப்பின் அடிப்படையில் தான் அறிவிக்கப்பட்டு இருக்கிறது. உச்சநீதிமன்றம் என்ன தீர்ப்பு கூறியதோ அதன் அடிப்படையில் தான் தமிழக தேர்தல் ஆணையம் தேர்தல் அறிவிப்பை வெளியிட்டு இருக்கிறது. இந்த உள்ளாட்சித் தேர்தலில் கழக கூட்டணி அமோக வெற்றி பெறும். ஏற்கனவே உள்ளாட்சித் தேர்தல் தொடர்ந்து தள்ளி போனதற்கு காரணம் தி.மு.க. தான். இப்பொழுது உள்ளாட்சித் தேர்தல் அறிவிக்கப்பட்டு இருக்கிறது. இத்தேர்தலை சந்திக்க தி.மு.க. அஞ்சுகிறது. தயக்கம் காட்டுகிறது.

மக்கள் செல்வாக்கு கழகத்திற்கு நாளுக்கு நாள் அதிகரித்து வருகிறது. அந்த பயத்தில் தான் தி.மு.க. உள்ளாட்சித் தேர்தலை சந்திக்க பயந்து நடுங்குகிறது. வார்டு மறுவரையறை கடந்த மே மாதமே முடிந்து விட்டது என்று தேர்தல் ஆணையம் அறிவித்துள்ளது. இந்நிலையில் இட ஒதுக்கீடு எந்த மாவட்டத்தில் உள்ளது என்பதை தி.மு.க. தான் சொல்ல வேண்டும். 2016-ல் உள்ளாட்சித் தேர்தல் அறிவிக்கப்பட்டபோது அதை நிறுத்துவதற்கு நீதிமன்றம் சென்றது தி.மு.க. தான். தொடர்ந்து உள்ளாட்சித் தேர்தலை நடத்த விடாமல் தி.மு.க. இடையூறு செய்து கொண்டே வருகிறது.

இப்பொழுது உச்சநீதிமன்றம் உத்தரவின் பேரில் தேர்தல் ஆணையம் தேர்தல் தேதி அறிவித்த பின்னர் அதை தடுத்து நிறுத்த உச்சநீதிமன்றம் போகப் போவதாக ஸ்டாலின் தெரிவித்திருக்கிறார். இதிலிருந்தே உள்ளாட்சித் தேர்தலை நடத்த விடாமல் ஸ்டாலின் தான் தடுப்பது என்று மக்களுக்கே தெரியும். அதனால் தான் தொடர்ந்து உள்ளாட்சித் தேர்தலை சந்திக்க அவர் அஞ்சுகிறார்.

இவ்வாறு முதலமைச்சர் எடப்பாடி கே.பழனிசாமி கூறினார்.