தமிழகம்

ஜோலார்பேட்டையில் இருந்து ரயில் மூலம் சென்னைக்கு குடிதண்ணீர் வருகிறது

வேலூர்:-

ஜோலார்பேட்டையில் இருந்து ரயில் மூலம் சென்னைக்கு தண்ணீர் நாளை வெள்ளிகிழமை கொண்டு வரப்படுகிறது.

சென்னையில் குடிநீர் தட்டுப்பாட்டை போக்க ஜோலார்பேட்டையில் இருந்து ரயில் வேகன்கள் மூலம் காவேரி கூட்டு குடிநீர் தண்ணீரை கொண்டு வர தமிழக அரசு ரூ.65 கோடி நிதி ஒதுக்கியது. இதைத்தொடர்ந்து தமிழ்நாடு குடிநீர் வடிகால் வாரியம், சென்னை மெட்ரோ மற்றும் தெற்கு ரயில்வே அதிகாரிகள் ஜோலார்பேட்டையில் கடந்த சில நாட்களாக 3 கட்டமாக ஆய்வு செய்தனர்.

வேலூரில் செயல்படுத்தப்படும் காவேரி கூட்டு குடிநீர் குழாயில் இருந்து ஜோலார்பேட்டை மேற்கு சக்கரைகுப்பத்தில் உள்ள காவேரி கூட்டு குடிநீர் 5.5 லட்சம் லிட்டர் கொள்ளளவு கொண்ட தரைமட்ட நீர்த்தேக்க தொட்டியில் தண்ணீர் நிரப்ப திட்டமிட்டனர். அங்கிருந்து ஆஞ்சநேயர் கோயில், புதூர், சுண்ணாம்பு காளை வழியாக பார்சம்பேட்டை ரயில்வே உயர்நிலைப்பள்ளி பின்புறம் வரை 3.5 கி.மீ. தூரம் புதிதாக பைப் லைன் அமைத்து தண்ணீர் கொண்டு செல்ல திட்டமிடப்பட்டது.

இதன்மூலம் 10 மில்லியன் லிட்டர் (1 கோடி லிட்டர்) குடிநீர் வேகன்களில் சென்னைக்கு கொண்டு செல்ல அதிகாரிகள் முடிவெடுத்தனர். இதற்கான பணிகள் கடந்த மாதம் 26-ந்தேதி தொடங்கி இரவு பகலாக நடந்தது. நேற்று  இப்பணி நிறைவடைந்தது. ராஜஸ்தான் மாநிலத்தில் இருந்து 55 ஆயிரம் லிட்டர் கொள்ளளவு கொண்ட 100 ரயில்வே வேகன்கள் நேற்று  ஜோலார்பேட்டை வந்தடைந்தன.

இந்த வேகன்கள் சுத்தம் செய்யப்பட்டு பலத்த ஆய்வுக்கு பின்னர் குடிநீர் கொண்டு செல்ல தகுதியானதாக மாற்றி ஒவ்வொரு வேகன்களிலும் வாட்டர் டேங்க் என எழுதப்பட்டுள்ளது. மேட்டு சக்கர குப்பத்தில் உள்ள தமிழ்நாடு குடிநீர் வடிகால் வாரியத்தின் தரைமட்ட நீர்த்தேக்க தொட்டியிலிருந்து நேற்று முன்தினம் மதியம் பார்சம்பேட்டை ரயில்வே கேட் வரை சோதனை ஓட்டம் நடந்தது. அப்போது வழியில் தண்ணீர் கசிவு ஏற்பட்டதால் சோதனை ஓட்டம் நிறுத்தப்பட்டது. உடனடியாக கசிவு ஏற்பட்ட இடம் 2 மணி நேரம் போராடி சரி செய்யப்பட்டது. இதையடுத்து தண்ணீர் ஏற்று வெள்ளோட்டம் பார்க்கப்பட்டது. அப்போது கசிவு ஏற்படவில்லை.

சோதனை ஓட்டம் வெற்றிகரமாக முடிந்ததால் அதிகாரிகளும், பணியாளர்களும் மகிழ்ச்சி அடைந்தனர். ரயில்வே வேகன்களில் தண்ணீர் நிரப்புவதற்கான இரும்பு பைப் அமைக்கும் பணிகள் முடிவடைந்து விட்டது. இதற்கான யாடின் அருகே 660 மீட்டருக்கு மெகாசைஸ் இரும்பு பைப் நிலத்தில் இருந்து2 அடி உயரத்துக்கு அமைக்கப்பட்டுள்ளது. அதிலிருந்து சிறிய அளவில் இரும்பாலான கண்ட்டோலர் வால்வு பொருத்தியுள்ளனர்.

அதிலிருந்து 25 அடி நீளத்திற்கு வளையும் தன்மை கொண்ட பைப் பொருத்தி ரயில்வே வேகன்களில் குடிநீர் நிரப்பப்படுகிறது. நேற்று  இரவு 50 வேகன்களில் 2.5 மில்லியன் லிட்டர் குடிநீர் நிரப்பும் பணி விடிய விடிய நடந்தது. இப்பணியில் நூற்றுக்கும் மேற்பட்ட ஊழியர்களும், அதிகாரிகளும் ஈடுபட்டனர். அதனை ஆய்வு செய்த ரயில்வே அதிகாரிகள் ஒவ்வொரு வேகனிலும் 50 ஆயிரம் லிட்டர் தண்ணீர் தான் ஏற்ற வேண்டும் என்று கூறினர். 50 வேகன்களிலும் மொத்தம் 25 லட்சம் லிட்டர் தண்ணீர் ஏற்றப்பட்டு சென்னைக்கு புறப்பட தயாராக உள்ளது.

இந்த ரயில் பார்சம்பேட்டை 4-வது யார்டில் நிற்கிறது. ஒருமுறை 50 வேகன்கள் என அடுத்தடுத்து 2 ரயில்களில் குடிநீர் நிரப்பி சென்னைக்கு அனுப்பி வைக்கப்பட்டது. அதிக திறன் கொண்ட நீர் உறிஞ்சும் நீர்மூழ்கி மோட்டார் பொருத்தப்பட்டுள்ளதால் 50 வேகன்களில் 2.5 மில்லியன் லிட்டர் குடிநீரை 3 மணி நேரத்திற்குள் நிரப்பி விடலாம். ரயில் வேகன்களில் குடிநீர் நிரப்பப்படும் நேரத்தில் ரயில் என்ஜினை இயக்கும் 25 ஆயிரம் மெகவா வாட் மின் கம்பியின் இணைப்பு துண்டிக்கப்படும். வேகன்களில் குடிநீர் நிரப்பிய பின்னர் மின் இணைப்பு கொடுக்கப்படும். தினமும் 4 முறை ரயில் வேகன்களில் குடிநீர் நிரப்புவதால் அந்த நேரத்தில் மட்டும் மின் இணைப்பு நிறுத்தப்படும். இதனால் மற்ற ரயில் பாதைகளுக்கு எந்த பாதிப்பும் ஏற்படாது என அதிகாரிகள் தெரிவித்தனர்.

50 வேகன்களில் ஒருமுறை 25 லட்சம் லிட்டர் தண்ணீர் என்று மொத்தம் 4 முறை தண்ணீர் கொண்டு செல்லப்படும். இதற்கு ஒரு தடவைக்கு 8.6 லட்சம் ரூபாய் ரயில்வே துறைக்கு தமிழக அரசு கட்டணமாக செலுத்துகிறது. சராசரியாக ஒரு லிட்டருக்கு 35 பைசா செலுத்தப்படுகிறது. ஜோலார்பேட்டையில் இருந்து சென்னைக்கு 4 மணியில் இருந்து 5 மணி நேரத்திற்குள் தண்ணீர் வந்து விடும். 50 ரயில்வே வேகன்களில் குடிநீர் நிரப்பப்பட்ட ரயில் 12-ந்தேதி சென்னைக்கு புறப்படுகிறது. சென்னை மக்களின் தாகம் தீர்க்கும் இத்திட்டம் 6 மாதம் வரை நடைமுறைப்படுத்தப்படும் என்று அதிகாரிகள் தெரிவித்தனர்.