தற்போதைய செய்திகள்

ஸ்டாலினின் பொய் பிரச்சாரம் மக்களிடம் இனியும் எடுபடாது – மாவட்ட செயலாளர் வி.வி.ராஜன் செல்லப்பா பேச்சு

மதுரை

ஸடாலினின் பொய் பிரச்சாரம் மக்களிடம் இனியும் எடுபடாது என்று மதுரை புறநகர் கிழக்கு மாவட்ட கழக செயலாளர் வி.வி.ராஜன் செல்லப்பா எம்.எல்.ஏ. கூறினார்.

மதுரை புறநகர் கிழக்கு மாவட்டத்தில் உள்ளாட்சித்தேர்தலில் போட்டியிடும் கழக வேட்பாளர்களை ஆதரித்து கூட்டுறவுத்துறை அமைச்சர் செல்லூர் கே.ராஜூ, மாவட்ட செயலாளர் வி.வி.ராஜன் செல்லப்பா எம்.எல்.ஏ ஆகியோர் தீவிர பிரச்சாரம் செய்து வருகின்றனர். நேற்று மேலூர் தொகுதியில் உள்ள அழகர் கோவில் பகுதியில் அவர்கள் தீவிர வாக்கு சேகரிப்பில் ஈடுபட்டனர்.

வாக்கு சேகரிப்பின் போது மாவட்ட கழக செயலாளர் வி.வி.ராஜன்செல்லப்பா எம்.எல்.ஏ. பேசியதாவது:-

அஇஅதிமுகவுக்கு சேரும் மக்கள் கூட்டத்தை பார்த்த பின்பு தான் திமுக தேர்தலுக்கு தடை கேட்டுள்ளது. எத்தனை தடை வந்தாலும் அதையெல்லாம் தகர்த்தெறிந்து தமிழகம் முழுவதும் 100 சதவீதம் உள்ளாட்சித்தேர்தலில் வேட்பாளர்கள் வெற்றி பெறுவார்கள். நீதிமன்றத்தில் தி.மு.க. தடை வாங்கியதாலேயே மக்களுக்கு பொங்கல் பரிசு ஆயிரம் ரூபாய் தற்போது கிடைக்கவில்லை. தேர்தல் முடிந்தவுடன் அனைவருக்கும் 1000 ரூபய் வழங்கப்படும்.

சென்னையில் ஸ்டாலின் தலைமையில் ஈழத்தமிழர்களுக்காக, சிறுபான்மையினருக்காக பேரணி நடத்தினார்கள். விளம்பரம் எப்படி வேண்டுமானாலும் தேடலாம். ஏன் நாடாளுமன்றத்தில் 39 நாடாளுமன்ற உறுப்பினர்களை வைத்து எதை எதையோ செய்திருக்கலாம். கருணாநிதி இருந்த திமுக வேறு, தற்போது இருக்கும் திமுக வேறு. ஏனென்றால் தற்போது தலைவராக இருக்கும் ஸ்டாலினை மூத்த நிர்வாகிகள் ஏற்றுக் கொள்ளவில்லை.

உள்ளாட்சித் தேர்தல் களத்தில் கண்ணுக்கு எட்டிய தூரம் தி.மு.க.வை காணவில்லை. இதன் மூலம் வரும் சட்டமன்ற தேர்தலிலும் போட்டியிட பயந்து பின்வாங்குவார்கள். ஏனென்றால் ஸ்டாலின் பொய் பிரச்சாரம் ஒருபோதும் எடுபடாது.

இவ்வாறு அவர் பேசினார்.