தற்போதைய செய்திகள்

கழகத்தின் வெற்றியை தட்டி பறிக்க முடியாது – அமைச்சர் எம்.சி.சம்பத் பேச்சு

கடலூர்

கழகத்தின் வெற்றியை யாராலும் தட்டிப்பறிக்க முடியாது என்று அமைச்சர் எம்.சி.சம்பத் கூறினார்.

கடலூர் மத்திய மாவட்டம் கடலூர் மாவட்ட ஊராட்சிக் குழு 2-வது வார்டு உறுப்பினர் பதவி உள்பட ஊரக உள்ளாட்சி தேர்தலில் போட்டியிடும் கழக வேட்பாளர்களின் தேர்தல் வெற்றி குறித்த ஆலோசனை கூட்டம் சாவடியில் நடைபெற்றது. இந்த கூட்டத்திற்கு கடலூர் மத்திய மாவட்ட செயலாளரும், தொழில்துறை அமைச்சருமான எம்.சி.சம்பத் தலைமை தாங்கினார். கூட்டத்தில் கடலூர் தெற்கு ஒன்றிய துணைசெயலாளர் டி.எஸ்.ஆர்.மதிவாணன், மாவட்ட பிரதிநிதி ஆர்.வி.மணி ஆகியோர் முன்னிலை வகித்தனர்.

இந்த கூட்டத்தில் அமைச்சருர் எம்.சி.சம்பத், முன்னாள் அமைச்சரும், கழக கொள்கை பரப்பு துணைச் செயலாளருமான டாக்டர்.வைகைச் செல்வன் ஆகியோர் வேட்பாளர்களை அறிமுகப்படுத்தி வைத்து சிறப்புரையாற்றினர்.

இந்த கூட்டத்தில் அமைச்சர் எம்.சி.சம்பத் பேசியதாவது:-

இந்த உள்ளாட்சித் தேர்தலை சந்திக்க தி.மு.க.வுக்கு திராணி இல்லை. இந்த நேரம் அ.தி.மு.க.வுக்கு சிறப்பான நேரம். கூட்டணி கட்சிகளுக்கும் மிக சிறப்பாக நேரமாக உள்ளது. இந்த கூட்டணியில் உள்ள பா.ம.க, தே.மு.தி.க, த.மா.கா ஆகிய கட்சி தொண்டர்களை நாம் ஒருங்கிணைத்து கூட்டணியை கொண்டு செல்ல வேண்டும். இன்னும் ஒரு சில நாட்களே உள்ளது. ஒருமித்தக் கருத்தோடு நாம் அனைவரும் பணியாற்ற வேண்டும்.

இந்த வெற்றி நமக்கு மிக முக்கியமான வெற்றி. 2021ம் ஆண்டு சட்டசபை தேர்தலுக்கான அடித்தளமாக இந்த நாம் வெற்றியை பெற வேண்டும். நாம் வெற்றி பெறுவதை நமக்கு வெற்றிக்கனி கிடைப்பதை யாராலும் தட்டிப்பறிக்க முடியாது. இங்கு நாம் வெற்றிபெற்று அந்த வெற்றிக்கனியை முதலமைச்சரிடம் சமர்ப்பிக்க வேண்டும். வேட்பாளர்கள் அனைவரும் ஒரு வாக்காளர்களை கூட விடாமல் வீடு, வீடாக சென்று சந்தி ஓட்டு கேட்க வேண்டும்.

தற்போது தமிழகத்தில் மக்களின் நலன் காக்கின்ற, மக்களின் தேவைகளை நிறைவேற்றுகின்ற அரசை முதல்வர் எடப்பாடி கே.பழனிசாமி நடத்துகிறார். நமது முதல்வர் அனைவராலும் எளிதாக அணுகக் கூடிய முதல்வர். மக்கள் நலத்திட்டங்கள் தேவை என்று எதைக் கேட்டாலும் உடனடியாக நிறைவேற்றி தருகின்ற முதல்வர் தற்போது தமிழகத்தை ஆட்சி செய்து கொண்டிருக்கிறார்.

தேர்தல் நடைபெற இன்னும் இரண்டு நாட்களே உள்ள நிலையில் நாம் கண் துஞ்சாது பணியாற்றி சிறப்பான வெற்றியைப் பெற வேண்டும். எதிரிக்கு வெற்றி இல்லை கழகமே அனைத்து இடங்களில் வெற்றி பெற்றது என்ற நிலையை கடலூர் மத்திய மாவட்டம் உருவாக்க வேண்டும்.

இங்கு 2-வது வார்டு மாவட்ட ஊராட்சி கவுன்சிலர் பதவிக்கு போட்டியிடும் தமிழ்செல்வி ஆதிநாராயணன் மற்றும் ஊராட்சி ஒன்றிய கவுன்சிலர் வேட்பாளர்கள் டி.எஸ்.ஆர்.மதிவாணன், ஜி.காமராஜ், கு.லக்ஷ்மி, க.பிரியதர்ஷினி, பொற்கலை வினாயகம், அஞ்சலாட்சி பெருமாள் ஆகியோருக்கு இரட்டைஇலை சின்னத்திலும், பமிதா கலாநிதிக்கு முரசு சின்னத்தில் வாக்களித்து வெற்றி பெறச்செய்ய வேண்டும்.

இவ்வாறு அமைச்சர் எம்.சி.சம்பத் பேசினார்.

இந்த கூட்டத்தில் கடலூர் நகர செயலாளர் ஆர்.குமரன், மாவட்ட எம்,ஜி,ஆர் மன்ற செயலாளர் சேவல் ஜி.ஜி.குமார், மாவட்ட தகவல் தொழில் நுட்ப பிரிவு இணைசெயலாளர் கோபி உள்பட பலர் கலந்து கொண்டனர்.