தற்போதைய செய்திகள்

அனைத்து தரப்பினரின் வாழ்க்கை தரத்தை உயர்த்த சிறப்பு திட்டங்கள் நிறைவேற்றம் – அமைச்சர் ஓ.எஸ்.மணியன் பேச்சு

நாகப்பட்டினம்

அனைத்து தரப்பினரின் வாழ்க்கை தரத்தை உயர்த்த அரசு சார்பில் சிறப்பு திட்டங்கள் நிறைவேற்றப்படுகின்றன என்று அமைச்சர் ஓ.எஸ்.மணியன் கூறினார்.

நாகப்பட்டினம் மாவட்டம் மயிலாடுதுறை ஏ.வி.சி திருமண மண்டபத்தில் நடைபெற்ற விழாவில், முதலமைச்சரின் சிறப்பு குறை தீர்க்கும் திட்டத்தின் கீழ் கோரிக்கைகளை மனுக்களாக அளித்தவர்களில், தகுதியான 1024 பயனாளிகளுக்கு ரூ.5 கோடியே 74 லட்சத்து 72 ஆயிரத்து 55 மதிப்பிலான நலத்திட்ட உதவிகளை கைத்தறி மற்றும் துணிநூல்துறை அமைச்சர் ஓ.எஸ்.மணியன் வழங்கினார்.

இந்நிகழ்ச்சியில் அமைச்சர் ஓ.எஸ்.மணியன் பேசியதாவது:-

புரட்சித்தலைவி அம்மா அவர்களின் வழிகாட்டுதலுடன் செயல்பட்டு வரும் தமிழ்நாடு அரசு, பொதுமக்களின் வாழ்வாதாரம் மேம்படவும், ஏழை, எளிய மக்களின் முன்னேற்றத்திற்காகவும் பல்வேறு நல்ல திட்டங்களை செயல்படுத்தி வருகிறது.

தமிழக மக்களுக்கு அனைத்து வகையான அரசு நலத்திட்டங்களும் சென்று சேர்வதை துரிதப்படுத்தும் வகையில் முதலமைச்சர் கடந்த 18.17.2019 அன்று சட்டப்பேரவையில் 110 விதியின் கீழ் சிறப்பு குறைதீர்க்கும் முகாம் நடத்தி, பொதுமக்களிடமிருந்து நலத்திட்ட உதவி குறித்த கோரிக்கைகளை மனுக்களாக பெற்று அவற்றில் தகுதியான கோரிக்கைகளுக்கு தீர்வு காண உத்தரவிட்டார். வருவாய்த்துறையின், சமூகப் பாதுகாப்புத் திட்டம் மூலம் வழங்கப்பட்டு வரும் அனைத்து விதமான மாதாந்திர உதவித் தொகைகளும் தகுதியான அனைத்து பயனாளிகளுக்கும் கிடைத்திட வேண்டும் என்பதற்காகவே இத்தகைய சிறப்பு குறைதீர்வு முகாம்கள் நடத்தப்படுகின்றன.

முதலமைச்சர் உத்தரவின்படி “மக்களைத் தேடி அரசு” என்ற கொள்கையின் அடிப்படையில் நாகப்பட்டினம் மாவட்டத்தில் உள்ள 8 வட்டங்களுக்கு உட்பட்ட 523 வருவாய் கிராமங்களிலும் முதலமைச்சரின் சிறப்பு குறைதீர்வு முகாம்கள் கடந்த 01.08.2019 முதல் தொடங்கி நடைபெற்றது. இதற்கென தலா 6 அலுவலர்கள் கொண்ட 32 குழுக்கள் அமைக்கப்பட்டு, மாவட்டத்திலுள்ள அனைத்து கிராமங்களிலும் பொதுமக்களின் கோரிக்கைகளை மனுக்களாக பெறப்பட்டது.

முதலமைச்சரின் சிறப்பு குறை தீர்வு முகாம்களில் பெறப்பட்ட மனுதாரர்களின் மனுக்களில் உள்ள கோரிக்கைகளை அரசின் விதிகளுக்குட்பட்டு பரிசீலித்து, குறைகளுக்கு தீர்வு காணும் வகையில் தகுதியான மனுதாரர்களுக்கு உரிய நலத்திட்ட உதவிகள் வழங்கப்படுகின்றன. தமிழகத்திலுள்ள அனைத்து தரப்பு மக்களுக்கும், தாய்மார்களுக்கும், பெண்களுக்கும், விவசாயிகளுக்கும் ஏற்றமிகு வாழ்வினை தந்திடும் வகையில் அரசு எப்போதும் நல்ல திட்டங்களை செயல்படுத்தி வருகிறது.

இவ்வாறு அமைச்சர் ஓ.எஸ்.மணியன் தெரிவித்தார்.

இவ்விழாவில் மாவட்ட ஆட்சித்தலைவர் பிரவீன் பி.நாயர், மயிலாடுதுறை தொகுதி சட்டமன்ற உறுப்பினர் வி.ராதாகிருஷ்ணன், மாவட்ட வருவாய் அலுவலர் மு.இந்துமதி, மயிலாடுதுறை வருவாய் கோட்டாட்சியர் இ.கண்மணி, செய்தி மக்கள் தொடர்பு அலுவலர் மீ.செல்வகுமார், வட்டாட்சியர், ஆர்.முருகானந்தம் உட்பட அனைத்துத்துறை அரசு அலுவலர்கள் கலந்து கொண்டனர்.