தற்போதைய செய்திகள்

தட்கலில் விண்ணப்பித்தவர்களுக்கு டிசம்பர் முதல் மின் இணைப்புகள் – அமைச்சர் பி.தங்கமணி பேட்டி

நாமக்கல்:-

தட்கலில் விண்ணப்பித்தவர்களுக்கு டிசம்பர் முதல் மின் இணைப்புகள் வழங்கப்படும் என்று மின்சாரத்துறை அமைச்சர் பி.தங்கமணி கூறினார்.

நாமக்கல் மாவட்டம், பள்ளிபாளையம் நகராட்சிக்குட்பட்ட பகுதிகளில் புதிய திட்டப் பணிகள் அடிக்கல் நாட்டு விழா நடைபெற்றன. இதில் கழக அமைப்புச் செயலாளரும், நாமக்கல் மாவட்ட கழக செயலாளரும், மின்சாரம், மதுவிலக்கு மற்றும் ஆயத்தீர்வைத் துறை அமைச்சருமான பி.தங்கமணி கலந்து கொண்டு ரூ.77.89 லட்சம் மதிப்பீட்டில் பள்ளிபாளையம் 8-வது வார்டில் புதிய அங்கன்வாடி கட்டடம் கட்டுதல், கிருஷ்ணவேணி அரசு பெண்கள் மேல்நிலைப் பள்ளியில் பேவர் பிளாக் சாலை அமைத்தல், கண்டிபுதூர் ஊராட்சி ஒன்றிய தொடக்கப்பள்ளி புதிய வகுப்பறை கட்டடம் கட்டுதல், பள்ளிபாளையம் அரசு ஆண்கள் மேல்நிலைப்பள்ளியில் சைக்கிள் நிறுத்தும் கூடாரம் கட்டுதல், நாட்டாகவுண்டன் புதூர் பகுதியில் அங்கன்வாடி கட்டடம் கட்டுதல், நியாய விலை கட்டடம் கட்டுதல் மேலும் சிமெண்ட் கான்கிரீட் சாலை அமைத்தல் ஆகிய 7 பணிகளுக்கு அடிக்கல் நாட்டி தொடங்கி வைத்தார்.

பின்னர் அமைச்சர் பி.தங்கமணி செய்தியாளர்களிடம் கூறியதாவது:- 

தமிழகத்தில் விவசாய மின் இணைப்பு பெற தட்கல் முறையில் விண்ணப்பித்தவர்களுக்கு டிசம்பர் மாதம் முதல் மின் இணைப்புகள் வழங்கப்படும். தக்கல் மின் இணைப்பு வழங்கும் திட்டம் 2017-ம் ஆண்டு முதல் நடைமுறையில் உள்ளது. இதன்படி வருடந்தோறும் 10 ஆயிரம் இணைப்புகள் வழங்கப்படுகின்றன. இந்த ஆண்டும் 10 ஆயிரம் மனுக்கள் பெறப்பட்டுள்ளன.

தமிழ்நாடு மின்சார வாரியத்தில், டிசம்பர் 12-ஆம் தேதி வரை கேங்மேன் உடல்தகுதி தேர்வு நடைபெற்று வருகிறது. இந்தத் தேர்வு அனைத்து மண்டலங்களிலும் தகுதியின் அடிப்படையில் மட்டுமே தேர்வு செய்யப்பட்டு, பணி ஆணைகள் வழங்கப்படும். அதற்குள்ளாக உள்ளாட்சித் தேர்தல் அறிவிக்கப்பட்டுவிட்டால், தேர்தல் நடைமுறைகளைக் கருத்தில் கொண்டு நடவடிக்கை எடுக்கப்படும்.

மாநிலத்தில் உள்ள அனல்மின் நிலையங்களுக்கு தேவையான நிலக்கரி கையிருப்பில் உள்ளது. மாதம் 75 ஆயிரம் மெட்ரிக் டன் இருப்பு தேவை என்ற நிலையில் தற்போது 50 ஆயிரம் மெட்ரிக் டன் நிலக்கரி மட்டுமே வந்து கொண்டுள்ளதால் நிலக்கரி வரத்து அதிகரிக்க நடவடிக்கை எடுக்கப்பட்டுள்ளது. எதிர்வரும் கோடைகாலத்தில் அதிக நிலக்கரி தேவை என்பதால் கையிருப்பு வைக்க வேண்டும். எனவே மத்திய சுரங்கங்கள் துறை அமைச்சரை சந்தித்து மின் உற்பத்திக்கு தேவையான நிலக்கரி கையிருப்பில் வைக்க கோரிக்கை வைக்கப்பட்டுள்ளது. புதிய மின் நிலையங்களுக்கு கோல் பிளாக் ஒதுக்கீடு செய்வதற்கும் மனு கொடுத்துள்ளோம். அதற்கு மத்திய அமைச்சர் உரிய ஒதுக்கீடு செய்வதாக உறுதி அளித்துள்ளார்.

எண்ணூர் அனல்மின் நிலைய விரிவாக்கம் மற்றும் குந்தா நீரேற்று புனல் மின் திட்டம் ஆகிய பணிகளுக்கு, சுற்றுச்சூழல் அனுமதி விரைந்து வழங்க மத்திய சுற்றுச்சூழல் துறை அமைச்சரைப் பார்த்து மனு கொடுத்துள்ளோம். விரைவாக நடவடிக்கை எடுப்பதாக அவர் தெரிவித்துள்ளார்.தமிழகத்தில் மின்தடை முழுமையாக தடுக்கப்பட்டு விட்டது.

சிறிய மின்தடைகள் இருந்தாலும், மாவட்டங்கள் தோறும் அமைக்கப்பட்டுள்ள தானியங்கித் தடை நீக்கம் மையம் வழியாக பொதுமக்களிடம் இருந்து புகார்களைப் பெற்று, உடனுக்குடன் மின் தடை சரிசெய்யப்படுகிறது. இதற்காக 1912 என்ற இலவச தொலைபேசி வசதியும் செய்யப்பட்டுள்ளது. மின்தடை குறித்த புகார் தெரிவித்தால் உடனுக்குடன் அவை சரி செய்யப்படுகிறது. இலவச தொலைபேசி புகார் ஆன்லைன் உடனடியாக நடவடிக்கை எடுக்கப்பட்டு, மின்தடை இல்லாமல் பார்த்துக் கொள்கின்றோம்.

இவ்வாறு அமைச்சர் பி.தங்கமணி கூறினார்.