தற்போதைய செய்திகள்

உடல் உறுப்பு மாற்று அறுவை சிகிச்சையில் தமிழகம் முதலிடம் – அமைச்சர்கள் பெருமிதம்…

கோவை:-

உடல் உறுப்பு மாற்று அறுவை சிகிச்சையில் தமிழகம் தொடர்ந்து முதலிடம் வகிக்கிறது என்று அமைச்சர்கள் எஸ்.பி.வேலுமணி, டாக்டர் சி.விஜயபாஸ்கர் ஆகியோர் பெருமிதத்துடன் கூறினார்.

கோவையில் உலக உடல் உறுப்பு தான தினவிழா நடைபெற்றது.உடல் உறுப்பு தான தினத்தை முன்னிட்டு இந்திய தொழில் கூட்டமைப்பின், யங் இந்தியன்ஸ் மற்றும் கோவை அரசு மருத்துவமனை சார்பில் விழிப்புணர்வு நிகழ்ச்சி நடந்தது.

நிகழ்ச்சியில் கழக அமைப்பு செயலாளரும், கோவை புறநகர் மாவட்டக் கழகச் செயலாளரும்,நகராட்சி நிர்வாகம், ஊரக வளர்ச்சி மற்றும் சிறப்புத் திட்டங்கள் செயலாக்கத் துறை அமைச்சர் எஸ்.பி. வேலுமணி மற்றும் மக்கள் நல்வாழ்வுத்துறை அமைச்சர் டாக்டர் சி.விஜயபாஸ்கர் ஆகியோர் சிறப்பு விருந்தினர்களாக கலந்து கொண்டனர்.

உடல் உறுப்பு தானம் செய்தவர்கள் மற்றும் உடல் உறுப்பு தான அறுவை சிகிச்சை மேற்கொள்ளும் மருத்துவர்கள் ஆகியோருக்கு வாழ்த்து தெரிவித்து அமைச்சர் எஸ்.பி.வேலுமணி பேசியதாவது:-

நம் நாட்டில் 5 லட்சம் நபர்கள் உடல் உறுப்புக்காக காத்திருக்கின்றனர். ஒவ்வொருவரும் தங்களது உடல் உறுப்பை தானமாக கொடுப்பதற்கான கையெழுத்தை சுய விருப்பத்துடன் பதிவு செய்யவேண்டும். மூளைச்சாவு அடைந்தவர்களிடம் அவரது ரத்த சொந்தங்களின் அனுமதியின் பேரில் உடல் உறுப்பு தானம் பெறப்படுகிறது. மூளைச்சாவு அடைந்தவரின் உடல் உறுப்புகளை தானமாக அளிப்பதன் மூலம் ஏழு பேருக்கு வாழ்வளிக்க முடியும். அந்த குடும்ப உறுப்பினர் மறைந்து விட்டாலும் அவரது உறுப்புகளை தானம் தருவதன் மூலம் மற்றொருவர் வாழ்கிறார் என்ற மனநிறைவு அக்குடும்பத்தினர் பெறுகின்றனர்.

தமிழ்நாடு உறுப்பு மற்றும் ஆணையம் கடந்த 2014-ம் ஆண்டு புரட்சித்தலைவி அம்மா அவர்களால் துவக்கப்பட்டது. ஒவ்வொரு ஆண்டும் ஆகஸ்ட் 13-ம் நாள் உடல் உறுப்பு தான தினமாக கொண்டாடப்படுகிறது. உடல் உறுப்பு மாற்று அறுவை சிகிச்சையில் தமிழ்நாடு தொடர்ந்து முன்னிலையில் உள்ளது. இதற்காக கடந்த நான்கு ஆண்டுகளாக தொடர்ந்து சிறந்த மாநிலத்திற்கான விருதை தமிழகம் பெற்றுள்ளது.

தமிழகம் உடல் உறுப்புதானம் மட்டுமின்றி ரத்ததானம் செய்வதிலும் முன்னிலையில் உள்ளது. கை மாற்று அறுவை சிகிச்சையின் வெற்றியானது தமிழக சுகாதாரத் துறையின் வெற்றியாக உள்ளது. தொடர்ந்து தமிழக அரசும், சுகாதாரத் துறையும் மக்கள் நலனில் அக்கறையுடன் செயல்பட்டு வருகிறது. ஏழைகளுக்கு மருத்துவ நலன்கள் கிடைக்க வேண்டும் என தமிழக அரசு முழு மூச்சோடு செயல்பட்டு வருகிறது.

இவ்வாறு அமைச்சர் எஸ்.பி.வேலுமணி பேசினார்.

அமைச்சர் டாக்டர் சி.விஜயபாஸ்கர் பேசியதாவது:-

தமிழகம் இந்திய அளவில் உடல் உறுப்பு தானத்தில் முன்னிலையில் உள்ளது. இதற்கு காரணம் இங்கு உள்ள கொடையாளர்களே.உடல் உறுப்புதானத்தின் மூலம் 7568 பேர் மறுவாழ்வு அடைந்துள்ளனர். அதேபோல உடல் உறுப்பு தானம் செய்யும் குடும்பங்களுக்கு அரசின் உதவிகளில் முன்னுரிமையும், முக்கியத்துவமும் கிடைக்கும். அரசு மற்றும் தனியார் மருத்துவமனைகளில் உடல் உறுப்பு மாற்று அறுவை சிகிச்சை ஏழை எளிய மக்களுக்கு கட்டணமில்லாமல் செய்யப்படுகிறது.

இந்த சிகிச்சைகளுக்காக தமிழ்நாட்டில் மட்டும்தான் முதலமைச்சரின் விரிவான மருத்துவ காப்பீட்டு திட்டத்தின் மூலம் ரூ 25 லட்சம் வரை வழங்கப்படுகிறது. உடல் உறுப்பு தானத்திற்கு தேவையான அனைத்து உதவிகளும் செய்யப்பட்டு வருகிறது. உடல் உறுப்பு மாற்று அறுவை சிகிச்சையை தமிழ்நாட்டின் இரண்டாம் நிலை நகரங்களுக்கு விரிவுபடுத்தப்பட்டு வருகிறது.

மேலும் கடந்த ஆண்டு தமிழகத்தில் இந்தியாவிலேயே முதன்முறையாக ஸ்டான்லி அரசு மருத்துவமனையில் கை மாற்று அறுவை சிகிச்சை நாராயணசாமி என்பவருக்கு வெற்றிகரமாக மேற்கொள்ளப்பட்டது. தற்போது நலமுடன் உள்ளார். மேலும் பொது மக்களிடையே உடல் உறுப்பு தானம் குறித்து விழிப்புணர்வு ஏற்படுத்தி உடல் உறுப்பு தானத்தை ஒரு மக்கள் இயக்கமாக தமிழ்நாடு மேற்கொண்டு வருகிறது.

இவ்வாறு அமைச்சர் டாக்டர் சி.விஜயபாஸ்கர் பேசினார்.

உடல் உறுப்பு தானம் செய்த குடும்பத்தினர் மற்றும் உடல் உறுப்புதான விழிப்புணர்வாளர்களுக்கு அமைச்சர்கள் எஸ்.பி.வேலுமணி, டாக்டர் சி.விஜயபாஸ்கர் ஆகியோர் பரிசுகள் வழங்கி கவுரவித்தனர்.