ராமநாதபுரம்

நடுக்கடலில் துப்பாக்கி முனையில் 13 தமிழக மீனவர்கள் சிறைபிடிப்பு – இலங்கை கடற்படை அட்டூழியம்

ராமநாதபுரம்

துப்பாக்கி முனையில் தமிழக மீனவர்கள் இலங்கை படையினரால் சிறைபிடிக்கப்பட்டனர். ராமேஸ்வரத்தை சேர்ந்த மீனவர்கள் 2500 பேர் 520 விசை படகுகளில் மீன்பிடிக்க சென்றனர். அவர்கள் கச்சத்தீவு அருகே மீன்பிடித்துக் கொண்டிருந்தபோது அங்கு வந்த இலங்கை கடற்படையினர் அவர்களை துப்பாக்கி முனையில் விரட்டியடித்தனர். உடனடியாக ராமேஸ்வரம் மீனவர்கள் தங்கள் படகுகளை திருப்பி கரைக்கு வர தயாரானார்கள்.

அந்த சமயத்தில் இலங்கை கடற்படையினர் மீனவர்களின் படகுகளுக்குள் புகுந்து மீன்பிடி வலைகளை அறுத்து சேதப்படுத்தினர். கரை திரும்பிய மீனவர்கள் இலங்கை கடற்படை அட்டூழியத்தால் தங்களின் வாழ்வாதாரம் கேள்விக்குறியாகி உள்ளது என்றும், மத்திய அரசு உடனடியாக இலங்கை அரசுடன் பேசி நடவடிக்கை எடுக்க வேண்டும் என்றும் தெரிவித்தனர்.

அதேபோல் புதுக்கோட்டை மீனவர்கள் 13 பேர் இந்திய கடற் பகுதிக்குள் மீன்பிடித்துக் கொண்டிருந்தபோது அவர்களை இலங்கை கடற்படையினர் துப்பாக்கி முனையில் சிறைபிடித்து சிறையில் அடைத்துள்ளனர். புதுக்கோட்டை மாவட்டம் கோட்டைபட்டினம் ஜெகதாபட்டினத்தில் மீன்பிடி தளங்கள் உள்ளன. இந்த மீன்பிடி தளங்களில் இருந்து சுமார் 750-க்கும் மேற்பட்ட விசைப்படகுகள் மூலம் 3 ஆயிரத்துக்கும் மேற்பட்ட மீனவர்கள் கடலக்கு சென்று மீன்பிடித்து வருகின்றனர். நேற்று முன்தினம் சுமார் 450-க்கும் மேற்பட்ட விசைப்படகுகளில் 1500-க்கும் மேற்பட்ட மீனவர்கள் கடலுக்குள் மீன்பிடிக்க சென்றனர்.

அவர்கள் இந்திய கடல் எல்லை பகுதியான நெடுந்தீவு அருகே மீன்பிடித்துக் கொண்டிருந்தபோது அங்குவந்த இலங்கை கடற்படையினர் 3 விசை படகுகளில் மீன்பிடித்துக் கொண்டிருந்த மீனவர்களை கைது செய்தனர். மொட்டையன் என்பவருக்கு சொந்தமான விசைப்படகில் மீன்பிடித்துக் கொண்டிருந்த காளிதாஸ், ராக்கப்பன், மற்றொரு காளிதாஸ், ஆதவன், ஹரிஷ் மற்றும் சேகர் என்பவருக்கு சொந்தமான விசைப்படகில் மீன்பிடித்துக் கொண்டிருந்த சுந்தர், சின்னத்தம்பி, பிரவீன், ராஜாராம், அண்ணாதுரை, தம்பிராஜ், முத்து, முருகன் ஆகிய 13 பேரையும் கைது செய்து விசைப்படகுகளையும் சிறைபிடித்தனர். அவர்களை காங்கேசன் துறைமுகத்துக்கு அழைத்து சென்று விசாரணை நடத்தி வருகின்றனர்.  இதற்கிடையே ஈரான் சிறையில் அடைக்கப்பட்டிருந்த 3 தமிழக மீனவர்கள் விடுதலை செய்யப்பட்டனர்.