கோவை

யானைகள் புத்துணர்வு முகாமில் வீடியோ காலில் யானையுடன் பேசிய பாகன் மனைவி

மேட்டுப்பாளையம்

கோவை மாவட்டம் மேட்டுப்பாளையத்தை அடுத்த தேக்கம்பட்டியில் யானைகள் புத்துணர்வு முகாம் நடைபெற்று வருகிறது. முகாமிற்கு சென்ற யானையுடன் பாகனின் மனைவி வீடியோ காலில் பேசியதும், அதற்கு யானை பதிலளித்த விதமும் அனைவரையும் மெய்சிலிர்க்க வைத்தது.

இந்து சமய அறநிலையைத்துறை சார்பில் தமிழகத்தில் உள்ள கோயில்கள் மற்றும் மடங்களை சேர்ந்த யானைகளுக்கு புத்துணர்ச்சி அளிக்கும் வகையில் 12-வது ஆண்டாக யானைகள் சிறப்பு நல்வாழ்வு முகாம் தேக்கம்பட்டி பவானி ஆற்றுப்படுகையில் இந்த மாதம் 15-ந்தேதி தொடங்கி நடைபெற்று வருகிறது. இதில் 28 யானைகள் பங்கேற்றுள்ளன. இங்குள்ள யானைகள் துள்ளி குதித்து விளையாடி மவுத் ஆர்கன் வாசித்து, நடனமாடி, கால்பந்து விளையாடி மகிழ்ந்து வருகின்றன.

இந்நிலையில் முகாமில் உள்ள கள்ளழகர் கோயில் சுந்தரவல்லி தாயார் யானையின் பாகன் மனைவி, குழந்தைகளுடன் போனில் வீடியோ காலில் பேசினார். பாகனின் மனைவி மற்றும் குழந்தைகளின் பேச்சை கேட்டதும் யானை அவர்களின் பேச்சை கூர்ந்து கவனித்தது. பாகனின் மனைவி யானையிடம் பேச வேண்டும், வீடியோவை யானை பக்கம் திருப்புங்கள் என்றார். உடனே பாகன் வீடியோ யானை முன்பு காண்பித்தார்.

யானையின் செல்லப் பெயரை கூறி பாகனின் மனைவி அழைத்தார். செல்போனை கூர்ந்து கவனித்த யானை வீடியோவில் தெரிந்த உருவத்தை அடையாளம் கண்டு முகம் மலர்ந்தது. நல்லா இருக்கிறாயா? நேரா நேரத்துக்கு சாப்பிடுகிறாதா? குறும்பு செய்யாமல் அப்பா சொல்வதை கேள் என்று பாகனின் மனைவி சொன்னார். இதை கேட்டதும் யானை தலையை ஆட்டி பதில் கூறியது. இதை அங்கிருந்த பார்வையாளர்கள் கண்டு மகனை ஊருக்கு அனுப்பிய தாய் போல் பாகனின் மனைவி நெகிழ்ச்சியாக பேசியதையும், அதற்கு யானை பதிலளித்த விதத்தையும் பார்த்து மெய்சிலிர்த்தனர்.