தமிழகம்

அரசு ஊழியர்களுக்கு கூடுதலாக 30 பேருந்துகள் இயக்கம் – சென்னை மாநகர போக்குவரத்து கழகம் அறிவிப்பு

சென்னை

அரசு அலுவலர் மற்றும் பணியாளர்களுக்காக, மாநகர் போக்குவரத்துக் கழகத்தின் சார்பில், கூடுதலாக 30 பேருந்துகள் இயக்கப்படவுள்ளது. தனியார் தொழிற்சாலைகளின் பணியாளர்களும் பேருந்து வசதிக்கு தொடர்பு கொள்ளலாம் என்று சென்னை மாநகர போக்குவரத்து கழகம் அறிவித்துள்ளது.

இதுகுறித்து சென்னை மாநகர போக்குவரத்து கழக நிர்வாகம் வெளியிட்டுள்ள செய்திக்குறிப்பு வருமாறு:-

தமிழகத்தில் கொரோனா வைரஸ் நோய் தடுப்பு மற்றும் முன்னெச்சரிக்கை நடவடிக்கைகள் முதலமைச்சர் உத்தரவின் பேரில், போர்க்கால அடிப்படையில் தொடர்ந்து மேற்கொள்ளப்பட்டு வருகிறது. மேலும், அத்தியாவசிய மற்றும் அவசரப் பணிகளுக்கு அரசு போக்குவரத்துக் கழகப் பேருந்துகளை இயக்கிடுமாறும் முதலமைச்சர் உத்தரவிட்டுள்ளார்.
ஊரடங்கு நடைமுறைப்படுத்தப்பட்டு மே 31 வரை நீட்டிக்கப்பட்டுள்ள நிலையில், தமிழ்நாடு அரசின் பல்வேறு துறைகளைச் சார்ந்த அலுவலர்கள் மற்றும் பணியாளர்கள் 33 சதவிகித அளவில் பணியாற்றி வந்த நிலையில், 18.05.2020 முதல் 50 சதவிகித பணியாளர்கள் பணிக்கு வருமாறு அறிவுறுத்தப்பட்டுள்ளனர்.

அதனடிப்படையில், தமிழக அரசின் பல்வேறு துறைகள், தலைமைச் செயலகம் மற்றும் உயர்நீதிமன்றம் உள்ளிட்ட அலுவலகங்களில் உள்ளவர்கள் பணிக்கு வர ஏதுவாக, மாநகர் போக்குவரத்துக் கழகத்தின் சார்பில், 200 பேருந்துகள் கட்டண அடிப்படையில் இயக்கப்பட்டு வருகிறது.

இந்நிலையில் தலைமைச் செயலகத்திற்கு கூடுதல் பேருந்துகள் இயக்கிடுமாறு கோரியதன் அடிப்படையில், பணியாளர்கள் அலுவலகம் வந்து செல்ல ஏதுவாக 25 பேருந்துகளும், சென்னை மாவட்ட ஆட்சியர் அலுவலகம், பள்ளி கல்வி இயக்குநரகம் உள்ளிட்ட அரசின் பல்வேறு துறைகளுக்காக 5 பேருந்துகள் என ஆகமொத்தம்
230 பேருந்துகள் கட்டண அடிப்படையில் இயக்கப்பட்டு வருகிறது.

மேலும், விழுப்புரம் அரசுப் போக்குவரத்துக் கழகத்தின் சார்பில், செங்கல்பட்டு, காஞ்சிபுரம், திருத்தணி, திருவள்ளூர், வேலூர் மற்றும் விழுப்புரம் ஆகிய பகுதிகளிலிருந்து தலைமைச் செயலகம், எழிலகம் உள்ளிட்ட பல்வேறு அரசு அலுவலக ஊழியர்கள் பணிக்கு வர ஏதுவாக, 49 பேருந்துகள் இயக்கப்படுகின்றன.

சென்னையில் உள்ள மாநில, மத்திய அரசின் பல்வேறு துறைகள் மற்றும் தன்னாட்சி நிறுவனங்களைச் சார்ந்த அலுவலர்கள் மற்றும் பணியாளர்களுக்கு பேருந்து வசதி தேவைப்படும் பட்சத்தில், இம்மாநகர் போக்குவரத்துக் கழகத்தின், தலைமையகப் பொது மேலாளர் (இயக்கம்) 9445030503, துணை மேலாளர் (வணிகம்) 9445030523 ஆகியோர்களை கைப்பேசி எண்ணிலும், edp.mtc@tn.gov.in மின்னஞ்சல் முகவரியிலும் அணுகிடுமாறு கேட்டுக் கொள்ளப்படுகிறார்கள்.

மேலும், சென்னை மற்றும் புறநகர் பகுதிகளில் மாநகர் போக்குவரத்துக் கழகத்தின் எல்லைக்குட்பட்ட பகுதிகளில் இயங்கி வரும் தனியார் தொழிற்சாலைகளின் பணியாளர்களுக்கு பேருந்து வசதி தேவைப்படும் பட்சத்தில், அவர்களும் மேற்கண்ட முகவரியில் தொடர்பு கொள்ளுமாறும் கேட்டுக் கொள்ளப்படுகிறார்கள்.

இவ்வாறு அந்த செய்திக்குறிப்பில் தெரிவிக்கப்பட்டுள்ளது.