சிறப்பு செய்திகள்

வீடு- கட்டடங்களில் மழைநீர் சேகரிப்பு கட்டமைப்பு அமைக்க 3 மாதம் அவகாசம் – அமைச்சர் எஸ்.பி.வேலுமணி திட்டவட்டம்…

சென்னை:-
அனைத்து வீடுகள் மற்றும் கட்டடங்களில் மழைநீர் சேகரிப்பு கட்டமைப்புகளை 3 மாத காலத்திற்குள் அமைக்க வேண்டும் என்று அமைச்சர் எஸ்.பி.வேலுமணி திட்டவட்டமாக கூறினார்.

நகராட்சி நிர்வாகம், ஊரக வளர்ச்சி மற்றும் சிறப்புத் திட்டங்கள் செயலாக்கத்துறை அமைச்சர் எஸ்.பி.வேலுமணி தமிழகத்தில் சென்னை உள்ளிட்ட 14 மாநகராட்சிகள், 122 நகராட்சிகள், 528 பேரூராட்சிகள் மற்றும் 12,524 ஊராட்சிப் பகுதிகளில் மழைநீர் சேகரிப்பு கட்டமைப்புகள் ஏற்படுத்தப்படுவது குறித்தும் மற்றும் அனைத்து தரப்பு மக்களும் பயன்பெறும் வகையில், கட்டட அனுமதி வழங்கும் நடைமுறைகளை எளிமைப்படுத்துவது குறித்தும் உள்ளாட்சி அமைப்புகளின் அலுவலர்களிடம் நேற்று சென்னை மாநகராட்சியின் அம்மா மாளிகையில் விரிவான ஆய்வு மேற்கொண்டார்.

நிலத்தடி நீர் ஆதாரங்களை புனரமைத்து புத்துயிர் அளிப்பதோடு, நீர்த்தேக்கங்களை மேம்படுத்தவும் மழைநீர் சேகரிப்புத் திட்டத்தினை புரட்சித்தலைவி அம்மா அவர்கள் 2001-ல் தொடங்கினார்கள். இந்தியாவிலேயே மழைநீர் சேகரிப்புத் திட்டம் செயல்படுத்துவதில் தமிழகம் முதன்மை மாநிலமாக திகழ்கிறது. கட்டட அனுமதி வழங்குவதற்கு, அனைத்து கட்டடங்களிலும் “மழைநீர் சேகரிப்பு” கட்டமைப்பினை கட்டாயமாக அமைக்க உரிய சட்ட திருத்தங்கள் மேற்கொள்ளப்பட்டது.

அதேபோல, தமிழகத்தில் உள்ள பல்வேறு நீர்நிலைகள் மற்றும் கோவில் குளங்களை புனரமைக்கவும், நீடித்த நீர் பாதுகாப்பு திட்டத்தினை புரட்சித்தலைவி அம்மா அவர்கள் சட்டப் பேரவையில், 2015ல் அறிவித்தார். பொது மற்றும் தனியார் கட்டிடங்களில் ஏற்கனவே உருவாக்கப்பட்ட மழைநீர் சேகரிப்பு அமைப்புகள் புத்துயிர் பெறுவது மட்டும் அல்லாமல் புதிதாக அமைப்பதற்கும் பல்வேறு நடவடிக்கைகள் எடுக்கப்பட்டு வருகிறது.

சென்னை மாநகராட்சி முதலமைச்சர் எடப்பாடியார் உத்தரவின் பேரில், சென்னை மாநகராட்சியில், மழைநீர் கட்டமைப்புகளை ஆய்வு செய்யவும் மற்றும் புதிய கட்டமைப்புகளை ஏற்படுத்தவும், மாநகராட்சியின் மண்டல அலுவலர் மற்றும் சென்னை குடிநீர் வாரியத்தின் வட்டார பொறியாளர் ஆகியோர் தலைமையில், வார்டு வாரியாக ஒரு குழு வீதம் 200 குழுக்கள் அமைக்கப்பட்டு, மாநகராட்சியின் 200 வார்டுகளிலும் சுமார் 2 இலட்சம் வீடுகளில் மழைநீர் சேகரிப்பு கட்டமைப்புகளை ஆய்வு செய்திட 29.06.2019 அன்று நடைபெற்ற கூட்டத்தில் அறிவுறுத்தப்பட்டது.

அதன் தொடர்ச்சியாக, இந்த பணியில், இதுவரை 2.35 லட்சம் கட்டடங்கள் ஆய்வு செய்யப்பட்டுள்ளன. இவற்றில், 1.36 லட்சம் கட்டடங்களில் மழைநீர் சேகரிப்பு கட்டடமைப்புகள் நல்ல நிலையில் உள்ளன. 3,850 கட்டடங்களில், புதியதாக மழைநீர் சேகரிப்பு கட்டமைப்புகள் ஏற்படுத்தப்பட்டுள்ளன. ஏற்கனவே உள்ள மழைநீர் சேகரிப்பு கட்டமைப்புகள் மேம்படுத்தப்பட வேண்டிய 37,131 கட்டடங்களிலும், மழைநீர் சேகரிப்பு கட்டமைப்புகள் இல்லாத 60,461 கட்டடங்களில் உடனடியாக மழைநீர் சேகரிப்பு கட்டமைப்புகள் ஏற்படுத்த அறிவுறுத்தப்பட்டது. இந்த பணிகளை வரும் அக்டோபர் மாத இறுதிக்குள் முடித்திடவும் அறிவுறுத்தப்பட்டது.

232 உபயோகப்படுத்த இயலாத கிணறுகள் கண்டறியப்பட்டு அவற்றை தூர்வாரி, அருகில் உள்ள பகுதிகளிலிருந்து வரும் மழைநீரை இக்கிணறுகளில் சென்றடையும் வகையில் கட்டமைப்புகள் ஏற்படுத்த நடவடிக்கைகள் எடுக்கப்பட்டு வருகின்றன.இக்குழுவின் மூலம், பொது மக்களுக்கு, தங்கள் வீடுகளில், புதிய மழைநீர் சேகரிப்பு கட்டமைப்புகளை ஏற்படுத்தவும், பழுதான கட்டமைப்புகளை மேம்படுத்தவும் ஆலோசனைகள் வழங்கப்பட்டு வருகின்றன.

பராமரிப்பு இல்லாமல் இருந்த 210 நீர்நிலைகள் சென்னை மாநகராட்சியால் கண்டறியப்பட்டுள்ளன. இவற்றில், 13 நீர் நிலைகள் தனியார் நிறுவனங்கள் மூலம் சமூக பொறுப்பு நிதியிலிருந்தும், 9 குளங்கள் மூலதன நிதி மற்றும் சட்டமன்ற உறுப்பினர் தொகுதி மேம்பாட்டு நிதியின் கீழ் ரூ.11.91 கோடியிலும் ஆக மொத்தம் 22 நீர்நிலைகள் கடந்த ஆண்டில் புனரமைக்கப்பட்டது.சீர்மிகு நகரத் திட்டத்தின் கீழ், வில்லிவாக்கம் ஏரி உட்பட 64 குளங்களில் ரூ.55 கோடி மதிப்பீட்டில் புனரமைப்பு பணிகள் இம்மாத இறுதிக்குள் முடிக்கப்படும்.

சென்னை பெருநகர வளர்ச்சி திட்ட நிதியின்மூலம் 53 குளங்களை புனரமைக்கும் பணிகள் ரூ.109.54 கோடி மதிப்பீட்டில் பணிகள் துவங்கப்பட உள்ளன.21 நீர்நிலைகளில் சமூக பொறுப்பு நிதி மூலம் பணிகள் நடைபெற்று வருகிறது.
இங்கு நடைபெற்ற சிறப்பான நிகழ்வின் போது, 14 தனியார் தொழில் நிறுவனங்கள் மற்றும் தொண்டு நிறுவனங்கள் மூலமாக 34 குளங்களை புனரமைக்க, புரிந்துணர்வு ஒப்பந்தங்கள் வழங்கப்பட்டது. மீதமுள்ள 17 குளங்கள் பல்வேறு திட்டங்களின் கீழ் எடுத்துக் கொள்ளப்பட உள்ளன.இத்திட்டங்கள் நிறைவேற்றப்படுகையில், சென்னை மாநகரப் பகுதிகளில் 1 TMC அளவு மழைநீரை கூடுதலாக தேக்கி வைக்க முடியும். இதனால் நிலத்தடி நீர் மட்டமும் பெரும் அளவு உயரும்.

14 மாநகராட்சிகள் (சென்னை நீங்கலாக) மற்றும் 121 நகராட்சிகளில், மொத்தமுள்ள 47.85 லட்சம் கட்டடங்களில், இதுவரை 15.89 லட்சம் கட்டடங்கள் மீள ஆய்வு செய்யப்பட்டதில், 10.19 லட்சம் கட்டடங்களில் புனரமைப்பு செய்ய அறிவிப்புகள் கொடுக்கப்பட்டுள்ளன. 4.96 லட்சம் கட்டடங்கள் உடனடியாக புதிய மழைநீர் சேகரிப்பு கட்டமைப்புகள் ஏற்படுத்த அறிவிப்புகள் கொடுக்கப்பட்டுள்ளன. மீதமுள்ள கட்டடங்களில் நவம்பர் 2019க்குள் ஆய்வு செய்யப்பட்டு, அதன் அடிப்படையில் அனைத்து கட்டடங்களிலும் மழைநீர் கட்டமைப்புகள் உள்ளதை உறுதி செய்ய உத்தரவிடப்பட்டது.
கோவில் குளங்கள் உட்பட மொத்தமுள்ள 1,786 குளங்களில், 773 குளங்களுக்கு மழைநீர் சேகரிப்பு அமைப்புகள் நிறுவப்பட்டுள்ளன.

ராமநாதபுரம், காரைக்குடி, புதுக்கோட்டை, பெரம்பலூர் நகராட்சிகள் மற்றும் தூத்துக்குடி மாநகராட்சியில் உள்ள 5 நீர் நிலைகள், உள்கட்டமைப்பு இடைவெளி நிரப்புதல் நிதியில் ரூ.6.14 கோடியில், புனரமைப்பு பணிகள் முடிக்கப்பட்டுள்ளது. பல்லாவரம் பெரிய ஏரி, கீழ்கட்டளை ஏரி, புனரமைப்பு பணிகள் தமிழ்நாடு நகர்புற வளர்ச்சி திட்டத்தின் மூலம் ரூ.14.98 கோடி மதிப்பீட்டில் பணிகள் நடைபெற்று வருகிறது.

ஈரோடு மாநகராட்சி மற்றும் அரியலூர், நாகப்பட்டினம், பட்டுக்கோட்டை, புதுக்கோட்டை, காரைக்குடி மற்றும் சாத்தூர் ஆகிய 6 நகராட்சிகளில் 42 நீர் ஆதாரங்களை மேம்படுத்துவதற்காக ஜெர்மன் மேம்பாட்டு வங்கி நிதி திட்டத்தின் கீழ் ரூ.38.24 கோடியில் பணிகள் முன்னேற்றத்தில் உள்ளன.

சீர்மிகு நகர திட்டத்தின் கீழ், ரூ.308 கோடி மதிப்பீட்டில் கோயம்புத்தூர் மாநகராட்சியில் 8 நீர் நிலைகளில் புனரமைப்பு பணிகள் எடுக்கப்பட்டு, அதில் 3 பணிகள் முன்னேற்றத்திலும், மீதமுள்ள குளங்கள் ஒப்பந்தப்புள்ளி நிலையிலும் உள்ளன. மேலும், தஞ்சாவூர் மாநகராட்சியில் ரூ. 10.25 கோடி மதிப்பீட்டில் 2 நீர் நிலைகளில் புனரமைப்பு பணிகள் பல்வேறு நிலைகளில் முன்னேற்றத்தில் உள்ளன. 528 பேரூராட்சிகளில் உள்ள 14 ஆயிரம் அரசு கட்டடங்கள் 24.12 லட்சம் வீடுகள், 2.34 லட்சம் வணிக மற்றும் தொழிற்சாலை இடங்களில் முறையே 26.60 லட்சம் சேகரிப்பு கட்டமைப்புகள் ஏற்படுத்தப்பட்டுள்ளன.

ஊரக வளர்ச்சித் துறையின் கட்டுப்பாட்டின் கீழ் 70,368 நீர் நிலைகளான சிறுபாசன ஏரிகள், குளங்கள் மற்றும் குட்டைகள் உள்ளன.மகாத்மா காந்தி தேசிய ஊரக வேலை உறுதி திட்டத்தின் கீழ் 2011 முதல் 2015 வரையிலான 5 ஆண்டுகளில் 50,767 சிறுபாசன ஏரிகள், குளங்கள் மற்றும் குட்டைகள் ரூ.2,200 கோடி மதிப்பீட்டில் தூர்வாரப்பட்டுள்ளன. 2016-17 முதல் 2017-18 வரையிலான 2 ஆண்டுகளில் மொத்தம் 16,508 சிறுபாசன ஏரிகள், குளங்கள் மற்றும் குட்டைகள் ரூ.877 கோடி மதிப்பீட்டில் தூர் வாரப்பட்டுள்ளன. கடந்த 2 ஆண்டுகளில், 22,347 தடுப்பணைகள் ரூ.485 கோடி மதிப்பீட்டில் கட்டி முடிக்கப்பட்டுள்ளன. இந்த தடுப்பணைகளில் தற்போது பெய்த மழையினால் நல்ல பயன் தந்துள்ளது.

தாய் II திட்டத்தின் கீழ் (2016-17) ரூ.226 கோடி மதிப்பீட்டில் ஊராட்சி ஒன்றியங்களின் பராமரிப்பில் உள்ள 1,201 சிறுபாசன ஏரிகளில் உள்ள முட்புதர்களை அகற்றி, இயந்திரங்கள் மூலம் தூர்வாரி, கரைகள் பலப்படுத்தப்பட்டுள்ளன.முதலமைச்சர் 10.07.2019 அன்று சட்டப்பேரவையில் விதி-110ன் கீழ் அறிவித்ததற்கிணங்க, கிராமப்புறங்களில் தண்ணீரை சேமித்து பாசனத்திற்கு பயன்படுத்திடவும், நிலத்தடி நீர் மட்டத்தினை உயர்த்திடவும், தமிழ்நாட்டின் ஊரகப் பகுதிகளில் உள்ள வாய்க்கால்கள், ஓடைகள் மற்றும் கால்வாய்களின் குறுக்கே மகாத்மா காந்தி தேசிய ஊரக வேலை உறுதித் திட்ட பணியாளர்களைக் கொண்டு தற்போது, 10,000 தடுப்பணைகள் கட்டும் பணிகள் ரூ.312 கோடி மதிப்பீட்டில் துவங்கப்பட்டுள்ளன.

மேலும், மாநில நிதியின் மூலம், 5000 சிறுபாசன ஏரிகளும் 25,000 குளங்கள், குட்டைகள் ரூ.500 கோடி மதிப்பீட்டில் இயந்திரங்களைக் கொண்டு தூர்வாருதல் மற்றும் கரைகள் பலப்படுத்தும் பணிகள் துவங்கப்பட்டுள்ளன. மேலும், அவற்றிலுள்ள மதகுகள், கலங்குகள் MGNREGS திட்டத்தின் கீழ் ரூ.750 கோடி மதிப்பீட்டில் சீரமைக்கும் பணிகள் துவங்கப்பட்டுள்ளன. இப்பணிகள் அனைத்தும் செப்டம்பர் மாத இறுதிக்குள் முடிக்கப்படும் என அமைச்சர் தெரிவித்தார்.

மேலும், அமைச்சர், அனைத்து நகர்ப்புற மற்றும் ஊரக உள்ளாட்சி பகுதிகளில் உள்ள உள்ளாட்சி அமைப்பு கட்டடங்கள் உட்பட அனைத்து அரசு கட்டடங்கள், வணிக வளாகங்கள், அனைத்து தொழிற்சாலை கட்டடங்கள், பெரும் வணிக நிறுவனங்கள், அடுக்குமாடி குடியிருப்புகள், பள்ளிகள், கல்லூரிகள் உள்ளிட்ட அனைத்துக் கல்வி நிறுவனங்கள், தனிக் குடியிருப்புகள், பண்னை வீடுகள், மருத்துவ மனைகள், திருமண மண்டபங்கள், திரையரங்குகள், கார்பரேட் நிறுவனங்கள், தங்கும் விடுதிகள், உணவகங்கள் உள்ளிட்ட அனைத்து கட்டடங்களிலும், மேலும், சாலை ஓரங்களிலும், பொது திறந்தவிடங்களிலும், மழைக்காலத்தில் தண்ணீர் தேங்கும் இடங்களைக் கண்டறிந்து மழைநீர் சேகரிப்பு கட்டமைப்புகள் விரைந்து ஏற்படுத்திட வேண்டும் என அறிவுறுத்தினார்.

மேலும், நீர்நிலைகள் மற்றும் குளங்களை சுற்றியுள்ள கட்டடங்களில் சேகரிக்கப்படும் மழைநீர், நேரடியாக இந்நீர் நிலைகளில் சென்று சேர்க்கப்பட வேண்டும் எனவும், மனைகளின் பரப்பளவிற்கு ஏற்ப மழைநீர் கட்டமைப்புகள் மற்றும் மழைநீர் சேகரிப்பு தொட்டிகள் ஏற்படுத்திட வேண்டும் எனவும் அறிவுறுத்தினார்.

சென்னை மாநகராட்சியில் அமைக்கப்பட்டது போன்று அனைத்து மாநகராட்சிகள், நகராட்சிகள் மற்றும் பேரூராட்சிகளில் ஒருங்கிணைந்த குழுக்கள் அமைத்து மழைநீர் சேகரிப்பு கட்டடமைப்புகள் ஏற்படுத்துப்பட்டு வருவதை அன்றாடப் பணியாக கண்காணிக்க வேண்டும். அனைத்து வகையான கட்டடங்களிலும், மழைநீர் சேகரிப்பு மற்றும் நிலத்தடி நீரை உயர்த்தும் கட்டமைப்புகள் உருவாக்கப்பட வேண்டும். இப்பணிகள், அனைத்து கட்டடங்களிலும் 3 மாத காலத்திற்குள் தரமான மற்றும் போதுமான மழைநீர் சேகரிப்பு கட்டடமைப்புகள் ஏற்படுத்தப்பட வேண்டும் என அலுவலர்களுக்கு அறிவுரை வழங்கினார்.