சிறப்பு செய்திகள்

உள்ளாட்சி தேர்தலை கண்டு மு.க.ஸ்டாலின் நடுங்குகிறார் – அமைச்சர் ஆர்.பி.உதயகுமார் குற்றச்சாட்டு

மதுரை

உள்ளாட்சி தேர்தலை சந்திக்க ஸ்டாலின் நடுங்கிப் போய் உள்ளார் என்று அமைச்சர் ஆர்.பி.உதயகுமார் கூறினார்.

மதுரை புறநகர் மேற்கு மாவட்ட கழகம் சார்பில் உள்ளாட்சி தேர்தல் பணிகள் குறித்து கழக நிர்வாகிகளிடம் கலந்தாய்வு கூட்டம் நடைபெற்றது. இந்த கூட்டத்திற்கு மதுரை புறநகர் மேற்கு மாவட்ட கழக செயலாளரும், வருவாய், பேரிடர் மேலாண்மை மற்றும் தகவல் தொழில்நுட்பவியல்துறை அமைச்சருமான ஆர்.பி.உதயகுமார் தலைமை வகித்து உள்ளாட்சித் தேர்தல் பணி குறித்து ஆலோசனை வழங்கினார்.

அமைச்சர் ஆர்.பி.உதயகுமார் பேசியதாவது:-

எல்லோரும் எல்லா வளமும் பெற வேண்டும். இங்கு இல்லாமை இல்லை என்ற நிலை உருவாக வேண்டும் என்ற பொன்மொழிக்கு ஏற்ப புரட்சித்தலைவி அம்மா அவர்கள் நாடு போற்றும் நல்லாட்சி நடத்தினார்.கருணாநிதி என்ற தீய சக்தியை நாட்டை விட்டு அப்புறப்படுத்த புரட்சித்தலைவர் அ.இ.அ.தி.மு.க.வை ஆரம்பித்தார். தொடர்ந்து 11 ஆண்டு காலம் தமிழகத்தில் முதலமைச்சராக இருந்து பல்வேறு திட்டங்களை நாட்டு மக்களுக்கு தந்தார்.

புரட்சித்தலைவர் மறைவிற்கு பின் புரட்சித்தலைவி அம்மா அவர்கள் ஒரு சிறப்பான ஆட்சியை நடத்தினார். ஒரு முதலமைச்சர் எப்படி மக்கள் பணியாற்ற வேண்டும் என்று இந்தியாவிலுள்ள அனைத்து முதலமைச்சருக்கும் ரோல்மாடலாக விளங்கினார். அம்மாவின் மறைவிற்குப் பின் இந்த இயக்கத்தை முதலமைச்சரும், துணை முதலமைச்சரும் மீட்டு ஒரு சிறப்பான ஆட்சியை நடத்தி வருகின்றன.

இந்தியாவில் 29 மாநிலங்கள் உள்ளன. இன்றைக்கு தொடர்ந்து 28 ஆண்டுகளுக்கு மேல் தொடர்ந்து ஒரே இயக்கம் ஆட்சி செய்து வருகிறது என்ற வரலாற்று பெருமையை இன்றைக்கு நமது இயக்கம் பெற்றுள்ளது. இந்த இயக்கத்தில் ஒரு சாதாரண உறுப்பினராக இருப்பது கூட நமக்கு பெருமையாகும். அம்மாவின் வழியில் பல்வேறு சாதனை திட்டங்களை முதலமைச்சர் படைத்து வருகிறார். அவருக்கு உறுதுணையாக துணை முதலமைச்சர் இருந்து வருகிறார்.

சில மாதங்களுக்கு முன்பு வெளிநாடு சென்று நமது தமிழகத்திற்கு தொழில் முதலீட்டை முதலமைச்சர் ஈர்த்து தற்போது படிப்படியாக செயல்படுத்தி வருகிறார்.குடிமராமத்து திட்டத்தை தொடர்ந்து செயல்படுத்துவதன் மூலம் இன்றைக்கு தமிழகத்தின் நிலத்தடி நீர் உயர்ந்துள்ளது. இத்திட்டத்திற்காக இந்தியாவில் உள்ள பல்வேறு மாநிலங்கள் நமது முதலமைச்சரை பாராட்டுகின்றன.

கடந்த பொங்கல் திருநாளில் அனைவருக்கும் ஆயிரம் ரூபாயுடன் பொங்கல் சிறப்பு பரிசு தொகுப்பு வழங்கப்பட்டது. தற்போது வரும் பொங்கல் திருநாளுக்கும் இந்த திட்டத்தினை முதலமைச்சர் அறிவித்துள்ளார். இதற்காக 2363 கோடி ரூபாயும் ஒதுக்கி உள்ளார். இதன் மூலம் ஏழை, எளிய மக்களின் தோழனாய் முதலமைச்சர் திகழ்ந்து வருகிறார். ஒரே மாதத்தில் 9 மருத்துவ கல்லூரிகளுக்கு மத்திய அரசிடம் ஒப்புதல் பெற்று மாபெரும் சாதனையை முதலமைச்சர் படைத்துள்ளார் அவருக்கு உறுதுணையாக துணை முதலமைச்சர் இருந்து வருகிறார்

இன்றைக்கு தமிழக முதலமைச்சர் செய்துவரும் சாதனை திட்டங்கள் மூலம் கடைக்கோடியில் இருக்கும் மக்களும் பயன் பெற்று வருகின்றனர். இதனை கண்டு பொறுக்க முடியாத ஸ்டாலின் எப்படியாவது அம்மாவின் அரசிற்கு களங்கம் ஏற்படுத்த பல்வேறு பொய்யான குற்றச்சாட்டை பரப்பி வருகிறார். மக்கள் அதனை ஏற்கவில்லை.

கடந்த நாடாளுமன்ற தேர்தலில் பல்வேறு பொய்யான வாக்குறுதிகளை ஸ்டாலின் மக்களை ஏமாற்றினார். ஆனால் ஒரு வாக்குறுதியை கூட அவரால் நிறைவேற்ற முடியவில்லை. இதையெல்லாம் மக்கள் எண்ணி பார்த்து வருகின்றனர். அதன்பின் நடைபெற்ற விக்கிரவாண்டி, நாங்குநேரி ஆகிய சட்டமன்ற இடைத்தேர்தலில் பல்வேறு பொய் பிரச்சாரங்களை ஸ்டாலின் செய்தார். ஆனால் பொதுமக்கள் நம்பவில்லை. ஸ்டாலினுக்கு பாடம் புகட்டும் வண்ணம் அஇஅதிமுகவிற்கு வெற்றியை பரிசாக அளித்து திமுக கூட்டணிக்கு தோல்வியை பரிசாக கொடுத்தனர்.

தற்போது நாம் உள்ளாட்சித் தேர்தலை சந்திக்க உள்ளோம். இந்த உள்ளாட்சித் தேர்தலில் திமுகவிற்கு மக்களின் செல்வாக்கு இல்லை. இதை உணர்ந்த ஸ்டாலின் எப்படி 2016-ம் ஆண்டு உள்ளாட்சி தேர்தலை தடுக்க உச்ச நீதிமன்றம் சென்றாரோ அதேபோல் தற்போதும் சென்றார். ஏனென்றால் உள்ளாட்சி தேர்தல் நடந்தால் திமுக நிச்சயம் தோல்வியை பெறும். இந்த தோல்வி வருகிற சட்டமன்ற தேர்தலிலும் எதிரொலிக்கும் என்ற பயத்தில் நடுங்கிப் போய் உள்ளார்.

திமுகவினர் உள்ளாட்சி பதவிகளில் வந்தால் அராஜகம் செய்வார்கள் என்று மக்களுக்கு நன்றாக தெரியும். ஏனென்றால் ஆட்சியில் இல்லாதபோது பிரியாணி கடையிலும், டீக்கடைகளிலும், பஜ்ஜி கடைகளிலும் ஓசி கேட்டு அராஜகம் செய்ததை மக்கள் மறக்கவில்லை.

நிச்சயம் உள்ளாட்சி தேர்தல் நடைபெறும். இதில் அஇஅதிமுக தலைமையிலான கூட்டணி அமோக வெற்றி பெறும். திமுக தலைமையிலான அமையும் கூட்டணி படுதோல்வி அடையும். ஆகவே இன்று முதல் கழக நிர்வாகிகள் வீடு வீடாக சென்று முதலமைச்சர் செய்துவரும் சரித்திர சாதனைகளை மக்களிடத்தில் எடுத்துக் கூறுங்கள். தமிழகத்தில் மதுரை புறநகர் மேற்கு மாவட்டம் தான் உள்ளாட்சித் தேர்தலில் மிகப்பெரிய வெற்றியை கழகத்திற்கு பெற்று தந்தது என்ற வரலாற்றை நீங்கள் உருவாக்கும் வரை களப்பணி ஆற்றுங்கள்.

இவ்வாறு அமைச்சர் ஆர்.பி.உதயகுமார் பேசினார்.