தற்போதைய செய்திகள்

வேலூரில் 2.5 லட்சம் மரக்கன்றுகள் நடும் திட்டம் தொடக்கம் – அமைச்சர் கே.சி.வீரமணி பங்கேற்பு

வேலூர்

வேலூரில் 2.5 லட்சம் மரக்கன்றுகள் நடும் திட்டத்தை அமைச்சர் கே.சி.வீரமணி தொடங்கி வைத்தார்.

வேலூர் ஊரிசு கலை மற்றும் அறிவியல் கல்லூரியில் வேலூர் மாவட்ட பள்ளிக்கல்வித்துறை மற்றும் கோவை ஈஷா பசுமை பள்ளி இயக்கம் சார்பில் இரண்டாவது ஆண்டில் அரசு மற்றும் அரசு நிதியுதவி பள்ளி மாணவ மாணவிகள் சுமார் 2.5 லட்சம் மரக்கன்றுகளை உருவாக்கி நட்டு பராமரிக்கும் திட்டத்தினை வணிகவரி மற்றும் பதிவுத்துறை அமைச்சர் கே.சி.வீரமணி மரக்கன்றுகளை நட்டு பள்ளி மாணவ மாணவிகளுக்கு வழங்கி திட்டத்தை துவக்கி வைத்தார். இந்த விழாவிற்கு மாவட்ட ஆட்சித்தலைவர் அ.சண்முகசுந்தரம் தலைமை தாங்கினார்.

விழாவில் அமைச்சர் கே.சி.வீரமணி பேசியதாவது:-

புரட்சித்தலைவி அம்மா அவர்கள் தமிழகத்தில் இயற்கையை பாதுகாக்க மரக்கன்றுகளை நடும் திட்டத்தை செயல்படுத்தி விழிப்புணர்வு ஏற்டுத்தினார். அவரது வழியில் தமிழக அரசும் இவற்றை தொடர்ந்து பின்பற்றி வருகிறது. இந்த செயல்பாட்டில் கோவை ஈஷா யோகா மையமும் இணைந்து தமிழகம் முழுவதும் சுமார் 2.5 கோடிக்கும் மேலான மரக்கன்றுகளை எதிர்கால இளைஞர்கள் இயற்கையின் பாதுகாப்பு மற்றும் அவசியத்தை உணர்ந்து கொள்ளும் விதமாக இப்பணிகளில் மாணவர்களை ஈடுபடுத்தி மரக்கன்றுகளை விதைகள் கொண்டு உற்பத்தி செய்து அவற்றை எவ்வாறு நட்டு பராமரிப்பது மற்றும் விழிப்புணர்வு ஏற்படுத்துவது என்ற உன்னத பணியினை சிறப்பாக இந்த இயக்கம் செயல்படுத்தி வருகிறது.

வேலூர் மாவட்டத்தில் கடந்த ஆண்டில் சுமார் 2.70 லட்சம் மரக்கன்றுகள் நட்டுள்ளனர். தற்போது இரண்டாவது ஆண்டாக இப்பணிகளில் ஒருங்கிணைந்த மாவட்ட 136 அரசு பள்ளிகளை சார்ந்த மாணவ மாணவிகள் ஈடுபட்டு மரக்கன்றுகளை நட்டும், குடியிருப்புகளில் வழங்கியும் விழிப்புணர்வு ஏற்படுத்தி வருகின்றனர். இரண்டாம் ஆண்டில் சுமார் 2.50 லட்சம் மரக்கன்றுகளை நட்டு பராமரிக்க உள்ளனர். இவர்களுக்கு அரசின் சார்பாக நன்றிகளை தெரிவித்து கொள்கிறேன்.

மனித சமுதாயத்திற்கு இன்றைய காலகட்டத்தில் மழை பொழிவு பெறவும் சுத்தமான காற்றை சுவாசிக்கவும் மரங்கள் மிகவும் இன்றியமையாததாகும். வேலூர் என்றாலே வெயில் என்ற நிலையினை மாற்றிட மரங்களை நட்டு இயற்கையை பாதுகாத்திட அரசு பல்வேறு நடவடிக்கைகள் எடுத்து வருகிறது. மேலும் கடந்த ஆண்டு முதல் ஈஷா யோகா மையம் மூலமாக ஈஷா பசுமை பள்ளி இயக்கம் மற்றும் தமிழக பள்ளிக் கல்வித் துறை இணைந்து மாணவர்களை மரக்கன்று நட்டு பராமரித்திடும் பணிகளில் ஈடுபடுத்திடும் திட்டம் தொடங்கப்பட்டு இரண்டாம் ஆண்டில் இத்திட்டம் தொடங்கப்படுகிறது.

மாணவ, மாணவிகள் இத்திட்டத்தில் ஈடுபடுத்துவதால் அவர்களின் தன்னம்பிக்கை உருவாகிறது. அதிலும் பள்ளி மாணவ மாணவிகளை ஈடுபடுத்தி அவர்களின் மூலமாகவே செடிகளை விதைத்தல், மரக்கன்று நட்டு பராமரித்து வரக்கூடிய நடைமுறையை ஏற்படுத்தியுள்ளார்கள். வருங்கால தூண்களான மாணவ மாணவிகளிடம் இந்த திட்டம் இயற்கை மீது ஆர்வத்தை ஏற்படுத்தி அனைவருக்கும் பயனளிக்கும் விதமாக அமையும்.

இவ்வாறு அமைச்சர் கே.சி.வீரமணி பேசினார்.

இந்நிகழ்ச்சியில் மாவட்ட முதன்மை கல்வி அலுவலர் மார்ஸ், ஈஷா பசுமை பள்ளி திட்ட ஒருங்கிணைப்பாளர் சுயக்னா, ரப்பையா, பார்மாசெல் இந்தியா பிரைவேட் லிமிடெட் இயக்குநர் மனோகரன், ஈஷா யோகா மாவட்ட ஒருங்கிணைப்பாளர் வெங்கடசுப்பு மற்றும் மாணவ, மாணவிகள் கலந்து கொண்டனர்.