தற்போதைய செய்திகள்

கல்லணை கிளை கால்வாய்களை தூர்வாரும் பணிக்கு முன்னுரிமை – அமைச்சர் ஆர்.காமராஜ் பேட்டி…

திருவாரூர்:-

கல்லணை கிளை கால்வாய்களை தூர்வாரும் பணிக்கு முன்னுரிமை அளிக்கப்படும் என்று அமைச்சர் ஆர்.காமராஜ் தெரிவித்தார்.

திருவாரூர் ஒன்றியம் மாங்குடி ஊராட்சிக்குட்பட்ட திருநெய்ப்பேர் வாய்க்கால் சிறப்பு தூர்வாரும் திட்டத்தின் கீழ் தூர்வாரும் பணியினை உணவுத்துறை அமைச்சர் ஆர்.காமராஜ் மாவட்ட ஆட்சியர் த.ஆனந்த் முன்னிலையில் பார்வையிட்டு ஆய்வு மேற்கொண்டார்.

பின்னர் அமைச்சர் ஆர்.காமராஜ் செய்தியாளர்களிடம் கூறியதாவது:-

விவசாயிகளின் நலனில் அக்கறைக்கொண்ட அரசு முதல்வர் தலைமையில் செயல்படும் அம்மா அவர்களின் அரசு. இந்த அரசு தொடர்ந்து விவசாயிகளை பாதுகாக்கும் அரசாக என்றும் விளங்கும். அதன் அடிப்படையில் திருவாரூர் மாவட்டத்தில் குடிமராமத்து திட்டம், வருடாந்திர தூர்வாரும் திட்டம் மற்றும் சிறப்பு தூர்வாரும் திட்டம் என இத்திட்டங்களின் மூலம் நீர்நிலைகள் மற்றும் பாசன நீர்நிலைகள் போர்க்கால அடிப்படையில் திருவாரூர் மாவட்டத்தில் தூர்வாரப்பட்டு வருகிறது. கல்லணையில் திறக்கப்பட்ட நீர் திருவாரூர் மாவட்டத்தில் கடைமடைப்பகுதி வரை சென்றடையும் வரை கிளை வாய்க்கால்கள் முன்னுரிமை அடிப்படையில் துரிதமாக தூர்வாரப்படும்.

மேலும், இத்தகைய தூர்வாரும் திட்டத்தினை கண்காணிக்க ஒவ்வொரு மாவட்டத்திற்கும் கணிப்பாய்வு அதிகாரிகளை முதல்வர் நியமித்துள்ளார். அந்த வகையில் திருவாரூர் மாவட்டத்திற்கு எம்.அரவிந்த் நியமிக்கப்பட்டுள்ளார். இவர் ஒவ்வொரு ஆறுகள் மற்றும் வாய்க்கால்களை நேரடியாக சென்று முடிவுற்ற பணிகளை பார்வையிட்டும், நடைபெறும் பணிகளை விரைவில் முடிப்பதற்கும் ஆலோசனை வழங்கி வருகிறார். இதன் அடிப்படையில் அனைத்து பாசன நீர்நிலைகளும் துரிதமாக தூர்வாரப்படும் இதற்கு விவசாயிகள் ஒத்துழைப்பு வழங்க வேண்டும்.

இவ்வாறு அமைச்சர் ஆர்.காமராஜ் கூறினார்.

இவ்ஆய்வில் வெண்ணாறு வடிநிலக்கோட்ட செயற்பொறியாளர் கண்ணன், மாங்குடி கூட்டுறவு சங்கத்தலைவர் மணிகண்டன் மற்றும் அரசு அலுவலர்கள், உள்ளாட்சி அமைப்பு பிரதிநிதிகள் கலந்து கொண்டனர்.