வேலூர்

ஜோலார்பேட்டை ஒன்றியத்தில் குடிமராமத்து பணி தொடக்கம்…

வேலூர்:-

வேலூர் மாவட்டம் ஜோலார்பேட்டை ஊராட்சி ஒன்றியம் சின்ன வேப்பம்பட்டு ஊராட்சியில் 22 ஹெக்டர் பரப்பளவில் உள்ள சின்னவேப்பம்பட்டு ஏரியினை ஆழப்படுத்தி நீர்வரத்து கால்வாய்கள் மற்றும் ஏரிக்கரைகளை சீரமைக்கும் குடிமராமத்து பணிகளை வணிகவரி மற்றும் பத்திரப்பதிவுத் துறை அமைச்சர் கே.சி.வீரமணி நேற்று துவக்கி வைத்தார். இந்நிகழ்ச்சிக்கு மாவட்ட ஆட்சித் தலைவர் அ.சண்முகசுந்தரம் தலைமை வகித்தார்.

இந்நிகழ்ச்சியில் அமைச்சர் கே.சி.வீரமணி பேசியதாவது:-

முதலமைச்சர் தமிழகத்தில் நீர் ஆதாரத்தினை பாதுகாக்கவும் அவற்றை சீரமைக்கவும் தமிழ்நாடு நீர் வள பாதுகாப்பு இயக்கம் மற்றும் மேலாண்மை இயக்க திட்டம் சார்பில் குடிமராமத்து பணிகளை துவக்கி வைத்தார். அதன் தொடர்ச்சியாக வேலூர் மாவட்டத்தில் உள்ள 220 ஊராட்சி ஏரிகள் தலா ரூபாய் ஐந்து லட்சம் மதிப்பீட்டிலும், 461 ஊரணி, குளம், குட்டைகள் தலா ரூபாய் ஒரு லட்சம் மதிப்பீட்டிலும் ஆக மொத்தம் ரூ.15.60 கோடி மதிப்பீட்டில் குடிமராமத்து பணிகள் நடைபெறவுள்ளது.

ஏரிகளுக்கு தண்ணீர் வரும் நீர்வரத்து கால்வாய்களை தூர்வாருதல், ஏரியை ஆழப்படுத்துதல் மற்றும் ஏரிக்கரைகளை பலப்படுத்துதல் மற்றும் ஏரியில் உள்ள சீமை கருவேல மரங்களை அகற்றுதல் போன்ற பணிகள் இத்திட்டத்தில் மேற்கொள்ளப்படும்.

நமது மாவட்டத்தில் ஏற்கனவே பொதுப்பணித்துறை கட்டுப்பாட்டில் உள்ள ஏரிகளில் குடிமராமத்து பணிகள் நடைபெற்று வருகிறது. இதனை தொடர்ந்து ஊராட்சிகளிலும் இப்பணிகள் மேற்கொள்ளப்படவுள்ளது. எதிர்வரும் மழைக்காலங்களில் வரும் தண்ணீரை சேமிக்க இப்பணிகள் பெரும் பயன் உள்ளதாக அமையும். மேலும் இத்திட்டப்பணிகள் 100 நாள் வேலை திட்டப் பணியாளர்களும் ஈடுபடுத்தப்படவுள்ளனர்.

இவ்வாறு அமைச்சர் கே.சி.வீரமணி பேசினார்.

இந்த நிகழ்ச்சியில் திட்ட இயக்குநர் (ஊரக வளர்ச்சி முகமை) பெ.பெரியசாமி, செயற்பொறியாளர் ராஜவேலு, திருப்பத்தூர் கூட்டுறவு சர்க்கரை ஆலைத் தலைவர் ஏ.ஆர்.இராஜேந்திரன், முன்னாள் சட்டமன்ற உறுப்பினர் கே.ஜி.ரமேஷ், முன்னாள் ஒன்றியக் குழுத் தலைவர் ஆர்.ரமேஷ் மற்றும் ஊரக வளர்ச்சித் துறை அலுவலர்கள் கலந்துக்கொண்டனர்.