சிறப்பு செய்திகள்

பொங்கல் பரிசு தொகுப்பு பெறுவதற்கான காலஅவகாசம் நீட்டிப்பு – தமிழக அரசு அறிவிப்பு

சென்னை

அரிசி குடும்ப அட்டைகளுக்கு வழங்கப்படும் பொங்கல் பரிசு தொகுப்புகள் பெறுவதற்கான காலஅவகாசத்தை தமிழக அரசு நீட்டித்துள்ளது.

பொங்கல் பண்டிகையையொட்டி தமிழக அரசு சார்பில் அரிசி குடும்ப அட்டை தாரர்களுக்கு 1000 ரூபாய் ரொக்கத்துடன் பொங்கல் தொகுப்பு வழங்கப்பட்டு வருகிறது. கடந்த 9ம்தேதி முதல் அனைத்து ரேஷன் கடைகளிலும் பச்சரிசி, வெல்லம், முந்திரி பருப்பு, ஏலக்காய், திராட்சை, கரும்புடன் ஆயிரம் ரூபாய் ரொக்கப்பணமும் வழங்கப்படுகிறது.

நெரிசல் இல்லாமல் பொதுமக்கள் வாங்கி செல்ல வசதியாக தெரு வாரியாக பிரிக்கப்பட்டு வழங்கப்பட்டது. ஒரு கோடியே 97 லட்சம் பேர் அரிசி பெறக்கூடிய ஸ்மார்ட் கார்டுகளை பயன்படுத்தி வருகிறார்கள். பொங்கல் தொகுப்பு பெறுவதற்கு நேற்று கடைசி நாளாகும். இதுவரை வாங்காதவர்கள் வெளியூர் சென்றவர்கள் முறையான ஆவணங்கள் கொடுக்காமல் இருந்தவர்களுக்கு நேற்று வழங்கப்பட்டது. நேற்று மாலை 6 மணி வரை பொங்கல் பரிசு விநியோகிக்கப்பட்டது.

இந்நிலையில் பொங்கல் பரிசு தொகுப்பினை பெறுவதற்கான காலஅவகாசத்தை மேலும் நீட்டித்து தமிழக அரசு உத்தரவிட்டுள்ளது. பொங்கல் பரிசு வாங்காதவர்கள் வருகிற 21-ந்தேதி வரை சம்பந்தப்பட்ட ரேஷன் கடைகளில் பெற்றுக்கொள்ளலாம் என அறிவிக்கப்பட்டுள்ளது. இதன் மூலம் விடுபட்டவர்கள் பொங்கல் முடிந்த பிறகும் பொங்கல் பரிசை பெறலாம்.