தற்போதைய செய்திகள்

கருவில் இருக்கும் குழந்தைக்கும் நலத்திட்ட உதவிகள் வழங்கும் ஒரே மாநிலம் தமிழகம் – அமைச்சர் ஆர்.பி.உதயகுமார் பெருமிதம்…

மதுரை:-

கருவில் இருக்கும் குழந்தைக்கும் நலத்திட்ட உதவிகள் வழங்கும் ஒரே மாநிலம் தமிழகம் தான் என்று அமைச்சர் ஆர்.பி.உதயகுமார் பெருமிதத்துடன் கூறினார்.

மதுரை மாவட்ட பொது சுகாதாரம் மற்றும் நோய் தடுப்பு மருந்துத் துறை சார்பில் டி.கல்லுபட்டி காந்தி நிகேதன் பள்ளியில் கர்ப்பிணி பெண்களுக்கு சமூக வளைகாப்பு மற்றும் முதலமைச்சரின் சிறப்பு மருத்துவ முகாம் நடைபெற்றது. மாவட்ட ஆட்சித்தலைவர் த.சு.ராஜசேகர் தலைமை தாங்கினார். முகாமில் பங்கேற்ற 500-க்கும் மேற்பட்ட கர்ப்பிணி பெண்களுக்கு வளைகாப்பு நிகழ்ச்சியினை வருவாய், பேரிடர் மேலாண்மை மற்றும் தகவல் தொழில்நுட்பவியல் துறை அமைச்சர் ஆர்.பி.உதயகுமார் துவக்கி வைத்தார்.

இந்த நிகழ்ச்சியில் மேலூர் சட்டமன்ற உறுப்பினர் பி.பெரியபுள்ளான் என்ற செல்வம், சுகாதாரத்துறை துணை இயக்குநர் கே.வி.அர்ஜுன்குமார், மாவட்ட நலக்கல்வியாளர் முத்துவேல், சுகாதாரத்துறை துணை இயக்குநரின் நேர்முக உதவியாளர் துளசிராம், பிரீத்தி மருத்துவமனை இயக்குநர் டாக்டர் சிவக்குமார், முன்னாள் மாவட்ட கழக செயலாளர் ஜெயராமன், ஒன்றிய கழக செயலாளர்கள் அன்பழகன், ராமசாமி, மகாலிங்கம், மாவட்ட இலக்கிய அணி செயலாளர் திருப்பதி, கழக அம்மா பேரவை துணை செயலாளர் பா.வெற்றிவேல், பேரூர் கழக செயலாளர்கள் நெடுமாறன், பாலசுப்பிரமணி, முன்னாள் சேர்மன்கள் ஆண்டிச்சாமி, தமிழழகன் உள்பட பலர் கலந்து கொண்டனர்.

இந்நிகழ்ச்சியில் அமைச்சர் ஆர்.பி.உதயகுமார் பேசியதாவது:-

வளைகாப்பு நிகழ்ச்சி என்பது உறவினர்கள் மற்றும் நண்பர்களுடன் நடத்தப்படும். ஆனால் அம்மா அவர்களின் அரசு இந்தியாவிற்கே வழிகாட்டும் விதமாக அமைச்சர்கள், சட்டமன்ற உறுப்பினர்கள், மாவட்ட ஆட்சித்தலைவர்கள், அரசு அலுவலர்கள் மற்றும் காவலர்கள் கலந்து கொள்ளும் நிகழ்ச்சியாக நடத்தப்பட்டு வருகிறது.

எவ்வளவு விஞ்ஞான கண்டுபிடிப்புகள் இருந்தாலும் ஒரு உயிர் இன்னொரு உயிரை உருவாக்க கண்டு பிடிக்கவில்லை. பெண்களுக்கு கர்ப்ப சுமை என்பது தெய்வீக சுமையாகும். கர்ப்ப காலத்தில் பெண்கள் மகிழ்ச்சியாக இருக்க வேண்டும். உள்ளத்தை தூய்மையாக வைத்துக் கொள்ள வேண்டும். அதனோடு மருத்துவத்தை தெரிந்து கொள்ளும் வகையில் மருத்துவத்திற்கான விழிப்புணர்வு ஏற்படுத்தவே இதுபோன்ற சிறப்பு முகாம்கள் நடத்தப்படுகிறது. ஒரு உயிரை சுமக்கும் பொறுப்பு பெண்களுக்கு மட்டுமே உண்டு.

அதனால்தான் பூமி தாய்க்கும் பெண்களுக்கு உள்ள பெயரை சூட்டி மகிழ்ந்து வருகிறது நமது தமிழர் பண்பாடு. கர்ப்பிணி பெண்கள் மிகுந்த நம்பிக்கையோடு மருத்துவதை எடுத்துக்கொண்டால் அதிக பலன் கிடைக்கும். முதலமைச்சரின் விரிவான மருத்துவ காப்பீட்டுத்திட்டத்தில் ரூ.2 லட்சமாக இருந்ததை தற்போது முதலமைச்சர் ரூ.5 லட்சமாக உயர்த்தியுள்ளார்.

பிறந்த குழந்தைகளுக்கு 14 வகை பொருட்களுடன் கூடிய அம்மா பரிசு பெட்டகம் வழங்கப்படுகிறது. இது வரை 17,98,000 குழந்தைகளுக்கு வழங்கப்பட்டுள்ளது. அதே போல் கர்ப்பிணி பெண்களுக்கு ரூ.18000 உதவித்தொகை வழங்கப்பட்டு வருகிறது. இந்த 8 ஆண்டுகளில் 56,28,000 காப்பிணி பெண்களுக்கு ஏறத்தாழ ரூ.5,300 கோடி வழங்கப்பட்டுள்ளது.

தொடர்ந்து மக்கள் நலனில் அக்கறை கொண்ட அரசாக இந்த அரசு உள்ளது. இந்தியாவிலேயே 29-க்கும் மேற்பட்ட மாநிலங்கள் உள்ளன. கருவில் இருக்கும் குழந்தைகளுக்கு திட்டங்களை வழங்கும் ஒரே அரசு என்றால் அது தமிழகம் அரசு மட்டும் தான். அந்த திட்டத்தை வழங்கி வருபவர் முதலமைச்சர் ஆவார்.

இவ்வாறு அமைச்சர் ஆர்.பி.உதயகுமார் பேசினார்.