தற்போதைய செய்திகள்

திருப்பூரில் குடும்ப அட்டைதாரர்களுக்கு பொங்கல் சிறப்பு பரிசுத்தொகுப்பு – அமைச்சர் உடுமலை கே.ராதாகிருஷ்ணன் வழங்கினர்

திருப்பூர்

திருப்பூரில் குடும்ப அட்டைதாரர்களுக்கு பொங்கல் பரிசுத் தொகுப்புகளை கால்நடை பராமரிப்புத்துறை அமைச்சர் உடுமலை கே.ராதாகிருஷ்ணன் வழங்கினார்.

திருப்பூர் மாவட்டம், உடுமலைப்பேட்டை வட்டத்திற்குட்பட்ட, ஏரிப்பாளையம் வி.ஜி.ராவ் நகர் பகுதிநேர நியாயா விலைக்கடையில் பொங்கல் பண்டிகையை முன்னிட்டு 355 குடும்ப அட்டை தாரர்களுக்கு பொங்கல் பரிசு மற்றும் விலையில்லா வேட்டி, சேலைகள் வழங்கும் நிகழ்ச்சி நடைபெற்றது. இந்நிகழ்ச்சியில் மாவட்ட வருவாய் அலுவலர் டாக்டர் ஆர்.சுகுமார் தலைமை வகித்தார்.

இவ்விழாவில் கால்நடை பராமரிப்புத்துறை அமைச்சரும், தமிழ்நாடு அரசு கேபிள் டி.வி நிறுவனத்தலைவருமான உடுமலை கே.ராதாகிருஷ்ணன் பயனாளிகளுக்கு பொங்கல் பரிசுகளை வழங்கி பேசியதாவது:-

மறைந்தும் மறையாமலும் தமிழக மக்கள் நெஞ்சங்களில் வாழ்ந்து வருகின்ற புரட்சித்தலைவி அம்மாவின் வழிகாட்டுதலின்படி செயல்படும் தமிழக அரசு ஏழை எளியோரின் வாழ்க்கையில் முன்னேற்றம் அடைவதற்காக பார் போற்றும் பல உன்னதமான திட்டங்களை அறிவித்து திறம்பட செயல்படுத்தி வருகிறது. அந்த வகையில் தமிழர் திருநாளாம் பொங்கல் பண்டிகையை தமிழ்நாட்டில் உள்ள ஏழை, எளிய மக்கள் சிறப்பான முறையில் கொண்டாடும் வகையில் தமிழக அரசின் சார்பில் திருப்பூர் மாவட்டத்தில் இந்த ஆண்டிற்கு பொங்கல் பரிசு தொகுப்பு 7,21,056 குடும்ப அட்டைதாரர்களுக்கு ரூ.96,02,15,854 மதிப்பீட்டில் வழங்கப்படவுள்ளது.

பொங்கல் பரிசு தொகுப்பில், சிறப்பு பொங்கல் பரிசுத்தொகுப்பாக ரூ.1,000 ரொக்கப்பணம், 1 கிலோ பச்சரிசி, 1 கிலோ சர்க்கரை, 2 அடி நீளமுள்ள கரும்புத்துண்டு, 20 கிராம் முந்திரி, 20 கிராம் உலர் திராட்சை மற்றும் 5 கிராம் ஏலக்காய் ஆகிய பொருட்கள் உடன் விலையில்லா வேட்டி, சேலைகள் வழங்கப்படவுள்ளது. தமிழக அரசு அளிக்கின்ற பொங்கல் பரிசு தொகுப்பு மற்றும் விலையில்லா வேட்டி, சேலைகளை பெற்றுக்கொண்டு தமிழர் திருநாளாம் பொங்கல் திருநாளை சிறப்பான முறையில் கொண்டாட வேண்டும்.

இவ்வாறு அமைச்சர் உடுமலை கே.ராதாகிருஷ்ணன் தெரிவித்தார்.

இவ்விழாவில், உடுமலைப்பேட்டை வட்டத்திற்குட்பட்ட ஏரிப்பாளையம் வி.ஜி.ராவ் நகர் பகுதிநேர நியாய விலைக்கடையில் 355 குடும்ப அட்டை தாரர்களுக்கு ரூ.4,72,746 மதிப்பிலான ரூ.1,000 ரொக்கப்பணம், 1 கிலோ பச்சரிசி, 1 கிலோ சர்க்கரை, 2 அடி நீளமுள்ள கரும்புத்துண்டு, 20 கிராம் முந்திரி, 20 கிராம் உலர் திராட்சை மற்றும் 5 கிராம் ஏலக்காய் பொங்கல் பரிசு தொகுப்பும் மற்றும் விலையில்லா வேட்டி, சேலைகளை பயனாளிகளுக்கு அமைச்சர் உடுமலை கே.ராதாகிருஷ்ணன் வழங்கினார்.

இந்நிகழ்வின் போது, கூட்டுறவு சங்கங்களின் இனைப்பதிவாளர் பிரபு, மாவட்ட வழங்கல் அலுவலர் மற்றும் உடுமலை வருவாய் கோட்டாட்சியர் (பொ) முருகன், நுகர்பொருள் வாணிபக்கழக மண்டல மேலாளர் சக்திவேல், கூட்டுறவு சங்கங்களின் துணை பதிவாளர் நர்மதா, வட்டாட்சியர் தயானந்தன் உள்ளாட்சி அமைப்பு பிரதிநிதிகள் மற்றும் அரசு அலுவலர்கள் உட்பட ஏராளமான பொதுமக்கள் கலந்து கொண்டனர்.