தற்போதைய செய்திகள்

முதலமைச்சரின் சாதனையை கூறினால் ஸ்டாலின் செல்லாக்காசாகி விடுவார்- அமைச்சர் செல்லூர் கே.ராஜூ உறுதி

மதுரை

மக்களின் நம்பிக்கையை பெற்ற இயக்கமாக அ.தி.மு.க. திகழ்கிறது. முதலமைச்சரின் சாதனையை கூறினால் போதும். வரவிருக்கும் மாநகராட்சி தேர்தலில் ஸ்டாலின் செல்லாக்காசாகி விடுவார் என்று அமைச்சர் செல்லூர் கே.ராஜூ பேசி உள்ளார்.

மதுரை மாநகராட்சி பகுதியில் உள்ளாட்சி தேர்தல் நடைபெற இருப்பதை முன்னிட்டு கழகத்தின் சார்பில் மாமன்ற உறுப்பினர் பதவிக்கு போட்டியிட விண்ணப்பம் அளித்த கழக நிர்வாகிகளிடம் கலந்தாய்வுக் கூட்டம் நடைபெற்றது. இக்கூட்டத்தில் மதுரை மாநகர் மாவட்ட கழக செயலாளரும், கூட்டுறவுத்துறை அமைச்சருமான செல்லூர் கே.ராஜூ, மதுரை புறநகர் கிழக்கு மாவட்ட கழக செயலாளர் வி.வி.ராஜன் செல்லப்பா எம்.எல்.ஏ ஆகியோர் ஆலோசனை வழங்கினர். இக்கூட்டத்தில் தேர்தல் பொறுப்பாளர்களான முன்னாள் நாடாளுமன்ற உறுப்பினர் கோபாலகிருஷ்ணன், கிரம்மர் சுரேஷ், எம்.எஸ்.பாண்டியன் மாவட்ட கழக துணைச் செயலாளர் தங்கம், மாவட்ட பொருளாளர் ராஜா உள்ளிட்டோர் இருந்தனர்.

இக்கூட்டத்தில் அமைச்சர் செல்லூர் ராஜூ பேசியதாவது:-

முதலமைச்சர். துணை முதலமைச்சர் ஆகியோர் விரைவில் வரவுள்ள மாநகராட்சி தேர்தலில் நூறு சதவிகிதம் கழக கூட்டணி வெற்றி பெற வேண்டுமென்று நமக்கு கட்டளையிட்டுள்ளனர். இன்றைக்கு அம்மாவின் வழியில் நமது இயக்கத்தையும், ஆட்சியையும் காப்பாற்றி கழக ஒருங்கிணைப்பாளர்கள் சாதனை படைத்து வருகின்றனர்.

தமிழகத்தில் பல்வேறு இயக்கங்கள் இருந்தாலும் குறிப்பாக நமது இயக்கம் மக்களின் நம்பிக்கையை பெற்ற இயக்கமாக இருந்து வருகிறது. ஏனென்றால் கடைக்கோடி மக்களுக்கும் திட்டங்களை வழங்கி மக்களைக் காக்கும் அரசாக கழக அரசு உள்ளது.

தி.மு.க ஆட்சி காலத்தில் குடும்ப ஆட்சியை நடத்தினார்கள் தவிர எதுவும் செய்யவில்லை. ஆனால் ஸ்டாலின் இதையெல்லாம் மறைக்கும் வண்ணம் அவதூறு பிரச்சாரத்தை செய்கிறார். இந்தப் பிரச்சாரம் இனிமேல் மக்களிடம் எடுபடாது. முதலமைச்சரின் சாதனையை கூறினால் போதும். வரவிருக்கும் மாநகராட்சி தேர்தலில் ஸ்டாலின் செல்லாக்காசாகி விடுவார். இந்த தேர்தலில் நாம் நிச்சயம் வெற்றிபெறுவோம்.

இவ்வாறு அமைச்சர் செல்லூர் கே.ராஜூ பேசினார்.