தேனி

முல்லைப்பெரியாறு அணையை கட்டிய பென்னிகுக் பிறந்தநாள் விழா – பொங்கல் வைத்து கொண்டாட விவசாயிகள் பிரமாண்ட ஏற்பாடு

தேனி

முல்லைப்பெரியாறு அணையை கட்டிய பென்னிகுக் பிறந்தநாள் விழாவை பொங்கல் வைத்து கொண்டாட விவசாயிகள் பிரமாண்ட ஏற்பாடுகளை செய்து வருகின்றனர்.

முல்லைப் பெரியாறு அணையை கட்டிய பென்னிகுக் பிறந்தநாள் விழாவை முதல்முறையாக அரசு விழாவாக கொண்டாட விவசாயிகள் தயாராகி வருகின்றனர். தேனி, திண்டுக்கல், மதுரை, ராமநாதபுரம், சிவகங்கை ஆகிய 5 மாவட்ட விவசாயிகளின் குடிநீர் மற்றும் பாசனத்திற்காக முல்லைப்பெரியாறு அணை கடந்த 1895 ஆம் ஆண்டு கட்டப்பட்டது.

இங்கிலாந்து நாட்டை சேர்ந்த பொறியாளரான கர்ணல் ஜான்பென்னிகுக் தனது கடுமையான முயற்சியாால் பல்வேறு சோதனைகளுக்கு இடையே தன் சொத்துக்களை எல்லாம் விற்று இந்த அணையை கட்டி முடித்தார். தற்போது இந்த அணை 5 மாவட்ட விவசாயிகளின் ஜீவாதார பிரச்சனையாக உள்ளது.

அணையின் நீர்மட்டத்தை உயர்த்துவதில் தமிழகம், கேரள அரசுகளுக்கு இடையே ஏற்பட்ட பிரச்சினையால் கடந்த 2011 ஆம் ஆண்டு கம்பம் பள்ளத்தாக்கு பகுதி விவசாயிகள் சுமார் 40 நாட்கள் கேரளாவை நோக்கி தொடர் முற்றுகை போராட்டம் நடத்தினர்.இந்த போராட்டம் இந்திய அளவிலும் பெரும் தாக்கத்தை ஏற்படுத்தியது. இதைத்தொடர்ந்து அணை குறித்த வரலாறும், அதனை கட்டி முடித்த ஜான் பென்னிகுக்கும் தமிழக மக்கள் மனதில் பதிவானது.

புரட்சித்தலைவி அம்மா ஆட்சி காலத்தில் சட்டப்போராட்டம் நடத்தி முல்லைப்பெரியாறு அணை நீர்மட்டத்தை 142 அடியாக உயர்த்த உச்சநீதிமன்றத்தில் வழக்கு தொடர்ந்து அதில் வெற்றியும் கண்டார். அதற்காக 5 மாவட்ட விவசாயிகள் புரட்சித்தலைவி அம்மாவுக்கு பிரமாண்ட பாராட்டு விழா நடத்தினார்கள். அதனை கட்டி முடித்த ஜான்பென்னிகுக்கை தேனி மாவட்ட மக்கள் தங்கள் கடவுளாக நினைத்து வழிபட்டு வருகின்றனர்.

இதை உணர்ந்த புரட்சித்தலைவி அம்மா அவர்கள் பென்னிகுக்குக்கு மணிமண்டபம் அமைத்து சிலையும் வைத்தார். ஒவ்வொரு ஆண்டும் அவரது பிறந்தநாளான ஜனவரி 15-ந்தேதி தேனி மாவட்டத்திற்கு எப்போதும் உள்ளூர் விடுமுறை அறிவிக்கப்படும். அப்போது பாலார்பட்டி மற்றும் சுருளிப்பட்டி கிராம மக்கள் பொங்கல் வைத்து பென்னிகுக் பிறந்தநாளை கொண்டாடுவார்கள்.

புரட்சித்தலைவி அம்மா ஆட்சிக்காலத்தில் தான் பென்னிகுக் பிறந்தநாள் விழா அரசு விழாவாக கொண்டாட அறிவிப்பு வெளியிடப்பட்டது. தமிழக சட்டப்பேரவையில் இதை புரட்சித்தலைவி அம்மா அவர்கள் அறிவித்தார். அப்போது பென்னிகுக் பிறந்தநாள் விழா அரசு சார்பில் விழாவாக கொண்டாடப்படுகிறது. இதற்கு விவசாயிகளும், பொதுமக்களும் ஆதரவு தெரிவித்துள்ளனர். அதேபோல் இந்த ஆண்டும் அவரது பிறந்தநாள் விழாவில் விவசாயிகள் அனைவரும் ஊர்வலமாக சென்று சிலைக்கு மாலை அணிவிக்கவும், பொங்கல் வைத்து கொண்டாடவும் ஏற்பாடுகள் செய்துள்ளனர். இதனால் பென்னிகுக் மணிமண்டபம் விழாக்கோலம் பூண்டுள்ளது.