தற்போதைய செய்திகள்

சர்வதேசப் போட்டிகளில் வெற்றி பெற்று முதல்வருக்கு பெருமை தேடி தர வேண்டும் – இளைஞர்கள் பள்ளி மாணவர்களுக்கு அமைச்சர் ஆர்.பி.உதயகுமார் வேண்டுகோள்

மதுரை

சர்வதேச போட்டிகளில் பெற்றி இளைஞர்கள், பள்ளி மாணவர்கள் முதலமைச்சருக்கு பெருமை தேடி தர வேண்டும் என்று அமைச்சர் ஆர்.பி.உதயகுமார் வேண்டுகோள் விடுத்துள்ளார்.

முதலமைச்சரின் ஆணைக்கிணங்க தமிழகம் முழுவதும் அம்மா இளைஞர் விளையாட்டு திட்டத்தின் கீழ் போட்டிகள் நடைபெற்று வருகிறது. அதன்படி மதுரை மாவட்டம் திருமங்கலம் தொகுதியில் உள்ள அம்மாபட்டியில் அம்மா இளைஞர் விளையாட்டு திட்டத்தின் கீழ் போட்டிகள் நடைபெற்றது. இந்நிகழ்ச்சிக்கு மாவட்ட ஆட்சித் தலைவர் வினய் தலைமை வகித்தார்.

வருவாய் ,பேரிடர் மேலாண்மை மற்றும் தகவல் தொழில்நுட்பவியல்துறை அமைச்சர் ஆர்.பி.உதயகுமார் விளையாட்டு போட்டிகளை தொடங்கி வைத்து கைப்பந்து, பேட்மிட்டன், கிரிக்கெட், உள்ளிட்ட விளையாட்டுகளை விளையாடினார். மேலும் கிரிக்கெட் போட்டியில் மாவட்ட ஆட்சியர் பந்து வீச அமைச்சர் உதயகுமார் பேட்டிங் செய்தார். கனகச்சிதமாக பந்தை அமைச்சர் விளாசித் தள்ளினார்.

இந்த விழாவில் அமைச்சர் ஆர்.பி.உதயகுமார் பேசியதாவது;-

புரட்சித்தலைவி அம்மா அவர்கள் ஏற்கனவே ஊராட்சி பகுதிகள் தோறும் விளையாட்டு போட்டி திட்டத்தை அறிவித்து ஒவ்வொரு ஊராட்சிக்கும் 25,000 ரூபாய் நிதி வழங்கினார். அதன் மூலம் விளையாட்டு போட்டிகள் நடைபெற்றன.

இதனை மேலும் விரிவு படுத்தும் வகையில் கிராமங்களில் உள்ள இளைஞர்களின் விளையாட்டு திறனை ஊக்குவித்து வெளிக்கொணரும் வகையில் தமிழ்நாட்டில் உள்ள 12,524 கிராம ஊராட்சிகள் மற்றும் 528 பேரூராட்சிகளில் அம்மா இளைஞர் விளையாட்டு திட்டம் செயல்படுத்தப்படும் என்று சட்டமன்றத்தில் 110 விதியின் கீழ் முதலமைச்சர் அறிவித்தார். இத்திட்டத்தினை செயல்படுத்தும் பொருட்டு ரூ.76 கோடியே 23 லட்சத்து 9 ஆயிரத்து 300 நிதி ஒதுக்கீடு செய்து அரசாணை வெளியிடப்பட்டது. இதனைத்தொடர்ந்து 13,052 கிராம ஊராட்சிகள் மற்றும் பேரூராட்சிகளில் இருபாலருக்கும் தனித்தனியாக அம்மா இளைஞர் விளையாட்டுக் குழு அமைக்கப்பட்டுள்ளது.

இந்த விளையாட்டு போட்டியில் கபடி, வாலிபால் கிரிக்கெட் மற்றும் பூப்பந்து ஆகிய விளையாட்டுகளில் அந்தந்த கிராமங்கள் மற்றும் பள்ளியில் பணிபுரியும் உடற்கல்வி ஆசிரியர்கள் மூலம் பயிற்சி அளிக்கப்படும். இதற்காக அவர்களுக்கு ஆண்டுதோறும் ரூ.4000 தொகுப்பூதியமாக வழங்கப்படும். மேலும் விளையாட தேவையான கம்பங்கள் கிரிக்கெட் மட்டைகள், பந்துகள், கையுறைகள் முதலான பொருட்கள் அனைத்து ஊராட்சி மற்றும் பேரூராட்சிகளில் இருபாலருக்கும் வழங்கப்பட்டு வருகிறது. திறந்தவெளி உடற்பயிற்சி மையம் மற்றும் உபகரணங்கள் வழங்கப்பட்டு வருகிறது.

கபடி, வாலிபால், கிரிக்கெட் அல்லது பூப்பந்து ஆகிய விளையாட்டுகளில் ஊராட்சி ஒன்றிய அளவில் மாவட்ட அளவில் மற்றும் மாநில அளவில் போட்டிகள் நடத்தப்படும் மாநில அளவில் நடைபெறும் போட்டியில் வெற்றி பெறும் அணிக்கு பரிசுகள் வழங்கப்படும்,பொதுவாக விளையாடும் பொழுது மனம் மகிழ்ச்சி அடையும். நமது உள்ளம் தூய்மை ஆகும். மனது கட்டுப்படும். விளையாட்டு போட்டியில் விளையாடும் மாணவர்களாகிய நீங்கள் மாநில அளவிலும் வெற்றி பெற்று தேசிய அளவில் வெற்றி பெற்று சர்வதேச அளவில் வெற்றி பெற்று தமிழகத்திற்கும், முதலமைச்சருக்கும் பெருமை தேடி தரவேண்டும்.

இவ்வாறு அமைச்சர் ஆர்.பி.உதயகுமார் பேசினார்.

இந்நிகழ்ச்சியில் மாவட்ட ஆட்சியர் வினய் ,துணை ஆட்சியர் பிரியங்கா, கோட்டாட்சியர் முருகேசன், வட்டாட்சியர் தனலட்சுமி, மற்றும் மாவட்ட கழக துணைச்செயலாளர் ஐயப்பன், மாவட்ட இலக்கிய அணி செயலாளர் திருப்பதி, ஒன்றிய கழக செயலாளர் அன்பழகன், ராமசாமி, மகாலிங்கம், பிச்சை ராஜன், செல்லம்பட்டி ராஜா, முன்னாள் சேர்மன் தமிழழகன், திருமங்கலம் யூனியன் சேர்மன்லதா , துணை சேர்மன் வளர்மதி மற்றும் அம்மாபட்டி ஊராட்சித் தலைவர் கல்பனா சுகுமார் உள்பட பலர் கலந்து கொண்டனர்.