நாகப்பட்டினம்

ஆரோக்கிய மாதா ஆலய திருவிழா – வேளாங்கண்ணிக்கு 200 சிறப்பு பேருந்துகள் இயக்கம்…

சென்னை

ஆரோக்கிய மாதா ஆலய திருவிழாவை முன்னிட்டு வேளாங்கண்ணிக்கு 200 சிறப்பு பேருந்துகள் இயக்கப்படுகிறது.

இது குறித்து தமிழ்நாடு அரசு விரைவு போக்குவரத்து கழக பொது மேலாளர் வெளியிட்டுள்ள செய்திக்குறிப்பில் கூறியிருப்பதாவது:-

நாகப்பட்டினம் மாவட்டம் வேளாங்கண்ணி புனித அன்னை ஆரோக்கிய மாதா ஆலய திருவிழாவை முன்னிட்டு இந்த ஆண்டும் பொதுமக்களின் வசதிக்காக அரசு விரைவு போக்குவரத்து கழகத்தின் சார்பில் சென்னை, பெங்களூரு, திருநெல்வேலி, தூத்துக்குடி, கன்னியாகுமரி, நாகர்கோவில், திருவனந்தபுரம் மற்றும் கோயம்புத்தூர் ஆகிய ஊர்களிலிருந்து தேவைக்கேற்ப அதிநவீன மிதவைப் பேருந்துகள், இருக்கை வசதி கொண்ட குளிர்சாதன பேருந்துகள், இருக்கை மற்றும் படுக்கை வசதி கொண்ட குளிர்சாதன பேருந்துகள் என 200 சிறப்பு பேருந்துகள் வருகிற 25-ந்தேதி முதல் 10.9.2019 வரை 16 நாட்களுக்கு இயக்கப்படுகிறது.

பயணிகளின் வசதிக்காக நடைமுறையில் உள்ள இணையதள வசதியான www.tnstc.in உடன் www.redbus.in, www.paytm.com மற்றும் www.busindia.com போன்ற இணையதளங்கள் மூலமாகவும் முன்பதிவு செய்து கொள்ள வசதிகள் ஏற்படுத்தப் பட்டுள்ளது. அரசு விரைவு போக்குவரத்து கழகத்தின் இந்த அரிய சேவையினை பொதுமக்கள் முழுமையாக பயன்படுத்தி பயன்பெறுமாறு கேட்டுக் கொள்ளப்படுகிறார்கள்.

இவ்வாறு அந்த செய்திக்குறிப்பில் கூறப்பட்டுள்ளது.