தற்போதைய செய்திகள்

வர இருக்கின்ற தேர்தலில் 100 சதவீத வெற்றி வாகை சூட கழக அம்மா பேரவை தியாக படையாக செயல்படும் – அமைச்சர் ஆர்.பி.உதயகுமார் உறுதி

சென்னை:-

வர இருக்கின்ற தேர்தலில் 100 சதவீத வெற்றி வாகை சூட கழக அம்மா பேரவை தியாக படையாக செயல்படும் என்று அம்மா பேரவை செயலாளரும், வருவாய்த்துறை அமைச்சருமான ஆர்.பி.உதயகுமார் உறுதி அளித்தார்.

தலைமை கழகத்தில் கழக அம்மா பேரவை சார்பில் நடைபெற்ற ஆலோசனை கூட்டத்தில் கழக அம்மா பேரவை செயலாளரும், வருவாய்த்துறை அமைச்சருமான ஆர்.பி.உதயகுமார் பேசியதாவது:-

புரட்சித்தலைவி அம்மாவின் சரித்திர சாதனை திட்டங்களையெல்லாம் மங்கா புகழாக இருக்கும் வண்ணம் ஒவ்வொரு ஆண்டும் சிறப்பாக பிறந்தநாள் விழாவை கொண்டாடி வருகிறோம்.

இந்த மூன்று ஆண்டுகளில் அம்மா கண்ட கனவை நனவாக்கும் வகையில், எளிமையின் அடையாளமாகக் கொண்டு மக்களின் நம்பிக்கை கொண்டு, மக்களின் செல்வாக்கு பெற்றிருக்கும் முதலமைச்சர் மற்றும் அம்மா அரசிற்கு பெருமை சேர்க்கும் வகையில் ஜல்லிக்கட்டை மத்திய அரசிடம் பக்குவமாக எடுத்துச் சொல்லி மீட்டெடுத்த துணை முதலமைச்சர் ஆகியோரின் ஆணைக்கிணங்க கடந்த மூன்றாண்டுகளில் சிறப்பாக நடைபெற்றது.

இன்றைக்கு அம்மாவின் புகழ் மக்களிடத்தில் மங்கா புகழாக திகழ்ந்து வருகிறது. சமீபத்தில் ஒரு நிகழ்ச்சியில் நமது சாமானிய முதல்வர், பொங்கல் கொண்டாடி வயல் பரப்புகளில் ஒரு விவசாயியாய் வேலை செய்ததை முப்பது லட்சம் மக்கள் பார்த்து முதலமைச்சரை பாராட்டியுள்ளனர், அது மட்டுமல்லாது நமது துணை ஜனாதிபதியும் நமது முதலமைச்சரை மனதார பாராட்டியுள்ளார்.

முதலமைச்சர், துணை முதலமைச்சர் ஆகியோரின் ஆணைகளை கழகத்தின் ஒன்றரை கோடி தொண்டர்கள் செயல்படுத்த தயாராக உள்ளனர். இதில் கழக அம்மா பேரவை வர இருக்கின்ற தேர்தலில் தியாக படையாக, முதல் படையாக வெற்றி வாகை சூடும் படையாக செயல்படும் என்பதை கழக அம்மா பேரவை சார்பில் உறுதி அளிக்கிறோம்.

இன்றைக்கு முதலமைச்சர் துணை முதலமைச்சர் ஆகியோரின் ஆணைகளை ஏற்று ,அம்மாவின் பிறந்த நாள் விழாவை சிறப்பாக கொண்டாடி கழக அரசின் சாதனைகளை மக்களிடத்தில் நூற்றுக்கு நூறு சதவீதம் எடுத்துச்சென்று பணியாற்றி கழகத்திற்கு வெற்றி வாகை சூடி தருவோம்.

இவ்வாறு அமைச்சர் ஆர்.பி.உதயகுமார் பேசினார்.