தமிழகம்

அம்மாவின் வழியில் ஏழைகளின் வாழ்க்கை தரத்தை உயர்த்துவதே நமது லட்சியம் – துணை முதலமைச்சர் முழக்கம்

சென்னை:-

புரட்சித்தலைவி அம்மாவின் வழியில் ஏழைகளின் வாழ்க்கை தரத்தை உயர்த்துவதே நமது லட்சியம் என்று துணை முதலமைச்சர் ஓ.பன்னீர்செல்வம் கூறினார்.

சென்னை ராயப்பேட்டையில் உள்ள தலைமை கழகத்தில் கழக புரட்சித்தலைவி அம்மா பேரவை சார்பில்
நடைபெற்ற ஆலோசனை கூட்டத்தில் கழக ஒருங்கிணைப்பாளரும், துணை முதலமைச்சருமான ஓ.பன்னீர்செல்வம் பேசியதாவது-

நம்மை எல்லாம் பல்வேறு பொறுப்புகள் தந்து, நல்ல பயிற்சியையும் அளித்து, இன்றைக்கு கழகம் ஒரு ஆலமரமாக பரந்து விரிந்து காலூன்றி நம்மை வெல்ல யாராலும் முடியாது என்று உலகிற்கே சூளுரைத்த, அம்மாவின் திருநாமத்தைத் தாங்கி இருக்கின்ற, பேரவையின் சார்பாக இந்த கூட்டம் நடக்கிறது. அம்மாவின் பிறந்தநாள் விழாவை வெகு சிறப்பாக நாம் நடத்தியுள்ளோம். இவை அத்தனையும் தாண்டி, அம்மாவின் சாதனைகள், அம்மா செய்த தியாகங்கள், அம்மா நடந்து வந்த பாதை, அவர் ஆட்சியில் இருக்கும்போது செய்த சாதனைகள், இவை எல்லாம் நமது பேரவை கடந்த காலங்களில், தெளிவாக நல்ல பணியை செய்துள்ளது. மீண்டும் அந்த பணியை உறுதிப்படுத்தும் வகையிலும், மென்மேலும் சிறக்கின்ற வகையிலும், இந்த கூட்டம் உள்ளது.

அம்மாவின் பிறந்தநாளை முன்னிட்டு, அம்மா அவர்கள் நம்மோடு இருந்தபோது எப்படி விழாவை கொண்டாட வேண்டும் என்று ஆலோசனையை வழங்கியுள்ளார். தமிழகம் மட்டுமல்லாமல் இந்திய அளவில் பல்வேறு அரசியல் இயக்கங்கள் உள்ளது. அதனை வழிநடத்த தலைவர்கள் இருக்கிறார்கள். அந்த தலைவர்களின் பிறந்த நாளை அந்த கட்சி தொண்டர்கள் எவ்வளவு ஆடம்பரமாக, விமர்சையாக கொண்டாடி வருகிறார்கள் என்பதை, நாம் அனுபவ ரீதியாக, அரசியல் ரீதியாக பார்த்திருக்கிறோம். ஆனால் அம்மா அவர்கள் தங்களுடைய பிறந்தநாளை முன்னிட்டு, யாரும் என் இல்லம் வர வேண்டாம். ஏழை எளிய மக்கள் வாழுகின்ற இல்லம் நாடிச் சென்று, அவர்களுக்கு பல்வேறு நலத்திட்ட உதவிகளை செய்ய வேண்டும் என்று, நமக்கு அன்பான கட்டளையிட்டுள்ளார்.

கட்சியுடைய தலைவர்கள், எவ்வளவு பேர் இருந்தாலும், என்னுடைய இல்லம் நாடி வர வேண்டாம், ஏழை எளியவர்களுக்கு உதவி செய்யக்கூடிய கரங்களாக உங்கள் கரங்கள் இருக்க வேண்டும் என்று, இந்தியாவில் இப்படி சொல்லுகின்ற ஒரே தலைவர் நமது அம்மா தான். அம்மாவின் ஒவ்வொரு சிந்தனையும், செயலும், நாட்டை பற்றியும், நாட்டில் உள்ள மக்களை பற்றியும், இந்தியாவின் ஒருமைப்பாட்டைப் பற்றியும், இறையாண்மை பற்றியும், அவர்கள் கொண்டிருந்த அழுத்தமான கொள்கை, கோட்பாடு, இவற்றை நாம் என்றைக்கும் நம்முடைய இதயங்களில் ஏந்தி நின்று, பொதுவாழ்க்கையில் ஈடுபடுபவர்கள், ஏழை எளிய மக்கள் படுகின்ற துன்பங்களைக் கண்டு, மனம் உருகி தங்களால் இயன்ற உதவி செய்கின்ற,நல்ல உள்ளங்களாக இருக்க வேண்டும் என்று, அம்மா நல்ல ஆலோசனைகளையும், அறிவுரைகளையும் வழங்கியுள்ளார்.

குறிப்பாக அமைச்சர் உதயகுமார் குறிப்பிட்டதுபோல மருத்துவ முகாம்கள், ஏழை எளிய மக்களுக்கு இலவச திருமணங்கள், பள்ளி, கல்லூரிகளுக்கு கல்வி உபகரணங்கள், கண் தானம்,ரத்த தானம், இதுபோன்ற உதவிகளை செய்வதற்கு நாம் ஏற்கனவே நல்ல பயிற்சி எடுத்துள்ளோம். அதையும் மீறுகின்ற வகையில் ஏழை எளியவர்களுக்கு, உதவியை செய்ய வேண்டும். அம்மாவின் பொற்கால ஆட்சியில் மாநிலத்தின் மொத்த நிதியில் கிட்டதட்ட 48-லிருந்து 50 சதவீதம், ஏழை எளிய மக்களின் சமூகப் பாதுகாப்பு திட்டத்திற்கு மட்டுமே ஒதுக்கினார்கள். இதற்கு நிதி ஒதுக்க காரணம், வாழ்க்கையின் அடித்தட்டில் உள்ள ஏழை எளிய மக்கள், பொருளாதாரத்தில் உயர் நிலையில் உள்ளவர்களுடன் நிலை நிறுத்த வேண்டும் என்பதுதான் அம்மாவின் உன்னத லட்சியம்.

கொள்கை, கோட்பாடு.அம்மா அவர்கள் எடுத்த நடவடிக்கை,அவரின் முயற்சி, அதனை செயல்படுத்திய விதம், இன்றைக்கு நல்ல பலனை தந்து, அம்மாவின் திட்டங்கள் தமிழகத்தில் உள்ள அனைத்து இல்லங்களிலும் நிலையாக குடிகொண்டிருக்கின்றது. சாதனை மிகுந்த ஆட்சியாக நமக்கு வழிநடத்தி காட்டியுள்ளார். அம்மா நடந்து வந்த பாதை, புரட்சித்தலைவர் வகுத்துத் தந்த பாதை,இன்றைக்கு நாம் அப்படியே கடைபிடித்து வருகிறோம். இதனை எல்லாம் நாம் மனதில் நிறுத்தி, அம்மா பேரவை செயலாளர்கள் மற்ற சார்பு அணியைக் காட்டிலும், நீங்கள் பணி செய்வதிலும், கடமை செய்வதிலும், மக்களுக்கு தொண்டாற்றுவதில் முதல் இடத்தை தக்க வைத்துள்ளீர்கள். எதிர்காலத்திலும் அந்த இடத்தை நீங்கள் தக்கவைத்து, சார்பு அணிகளுக்கு வழிகாட்டியாகத் திகழவேண்டும் என வாழ்த்துகிறேன்.

இவ்வாறு துணை முதலமைச்சர் ஓ.பன்னீர்செல்வம் பேசினார்.