தற்போதைய செய்திகள்

மக்கள் விரும்பாத எந்த திட்டத்தையும் அம்மாவின் அரசு அனுமதிக்காது – அமைச்சர் டி.ஜெயக்குமார் திட்டவட்டம்

சென்னை,

மக்கள் விரும்பாத எந்த திட்டத்தையும் அம்மாவின் அரசு அனுமதிக்காது என்று அமைச்சர் டி.ஜெயக்குமார் திட்டவட்டமாக கூறினார்.

சென்னையில் மீன்வளத்துறை அமைச்சர் ஜெயக்குமார் செய்தியாளர்களுக்கு பேட்டி அளித்தார். அப்போது அவர் கூறியதாவது:-

மக்கள் விரும்பாத எந்தத் திட்டத்தையும் அம்மாவின் அரசு ஆதரிக்காது. மீத்தேன், ஹைட்ரோ கார்பன் திட்டத்திற்கு மாநில அரசு ஒப்புதல் கொடுக்கவில்லை. எதிர்காலத்தில் கொடுக்கவும் கொடுக்காது. மாநில அரசின் ஒப்புதலின்றி மத்திய அரசின் திட்டங்களை கொண்டுவர முடியாது. கொள்கை முடிவு எடுக்க வேண்டும் என மு.க.ஸ்டாலின் கூறுவது, தூங்குவது போல் நடிப்பது போன்று உள்ளது.

அரசு ஒப்புதலே அளிக்காத பட்சத்தில் கொள்கை முடிவு எப்படி எடுக்க முடியும். ஹைட்ரோ கார்பன் திட்டத்தைக் கொண்டு வந்ததே திமுக தான். அவர்கள் ஏன் அப்போது கொள்கை முடிவு எடுக்கவில்லை. அ.தி.மு.க அரசு விவசாயிகளுக்கு எதிரானது போன்று ஒரு மாயையை, ஸ்டாலின் உருவாக்க நினைக்கிறார். ஸ்டாலின் மீண்டும், குழம்பிய குட்டையில் மீன் பிடிக்க முடியாது.

தஞ்சை பெரியக் கோயிலில் குடமுழுக்கு சிறப்பாக நடைபெற அரசு நிதி அளித்துள்ளது. ஆகம விதியை கருத்தில் கொண்டு குடமுழுக்கில் நடைமுறைகள் பின்பற்றப்பட்டு வருகின்றன. தமிழ் முறைப்படி குடமுழுக்கு நடத்தப்பட வேண்டும் என்பதை அரசு பரிசீலிக்கும். ரஜினி எதிர்காலத்தில் ஆக்கப்பூர்வமான விஷயங்கள் குறித்து பேச வேண்டும். பழமையை பற்றி பேசக்கூடாது.

இவ்வாறு அமைச்சர் டி.ஜெயக்குமார் கூறினார்.