சிறப்பு செய்திகள்

ஊரக வளர்ச்சித்துறை அலுவலகங்களில் 1 மாதத்துக்குள் மழைநீர் சேகரிப்பு கட்டமைப்பு – அமைச்சர் எஸ்.பி.வேலுமணி உத்தரவு…

சென்னை:-

தமிழகத்தில் உள்ள அனைத்து ஊரக வளர்ச்சித்துறை அலுவல கங்கள் மற்றும் கட்டிடங்களில் ஒருமாத காலத்திற்குள் மழைநீர் சேகரிப்பு கட்டமைப்புகள் ஏற்படுத்தப்பட வேண்டும் என நகராட்சி நிர்வாகம், ஊரக வளர்ச்சி மற்றும் சிறப்பு திட்டங்கள் செயலாக்கத்துறை அமைச்சர் எஸ்.பி.வேலுமணி உத்தரவிட்டுள்ளார்.

அமைச்சர் எஸ்.பி.வேலுமணி தலைமையில், ஊரக வளர்ச்சி மற்றும் ஊராட்சித் துறையின் சார்பில் மாநில அளவில் ஊராட்சி பகுதிகளில் நடைபெற்று வரும் மழைநீர் சேகரிப்பு கட்டமைப்புகள் மற்றும் வளர்ச்சிப் பணிகள் குறித்த ஆய்வுக் கூட்டம் சென்னை மாநகராட்சி அம்மா மாளிகை கூட்டரங்கில் நடைபெற்றது.

இக்கூட்டத்தில் அமைச்சர் எஸ்.பி.வேலுமணி, தமிழகத்தில் உள்ள அனைத்து பஞ்சாயத்து அலுவலகங்கள், ஒன்றிய அலுவலகங்கள் மற்றும் ஊரக வளர்ச்சித்துறை சார்ந்த கட்டிடங்களில் ஒருமாத காலத்திற்குள் மழைநீர் சேகரிப்பு கட்டமைப்புகளை அமைக்கப்பட வேண்டும் என அதிகாரிகளுக்கு உத்தரவிட்டார். இப்பணிகள் முடிவுற்ற பின்னர் அதுகுறித்த விவரங்களை தகுந்த எண்ணிக்கையுடன் தலைமையிடத்திற்கு தெரியப்படுத்த வேண்டும் எனவும், இப்பணிகளை அனைத்து மாவட்டங்களிலும் அமைச்சர்கள் நேரடியாக சென்று ஆய்வு செய்ய உள்ளதாகவும் தெரிவித்தார்.

மேலும், அமைச்சர் எஸ்.பி.வேலுமணி, அனைத்து ஊரக உள்ளாட்சி பகுதிகளில் உள்ள உள்ளாட்சி அமைப்பு கட்டிடங்கள் உட்பட அனைத்து அரசு கட்டிடங்கள், வணிக வளாகங்கள், அனைத்து தொழிற்சாலை கட்டிடங்கள், பெரும் வணிக நிறுவனங்கள், அடுக்குமாடி குடியிருப்புகள், பள்ளிகள், கல்லூரிகள் உள்ளிட்ட அனைத்துக் கல்வி நிறுவனங்கள், தனிக் குடியிருப்புகள், பண்ணை வீடுகள், மருத்துவமனைகள், திருமண மண்டபங்கள், திரையரங்குகள், கார்ப்பரேட் நிறுவனங்கள், தங்கும் விடுதிகள், உணவகங்கள் உள்ளிட்ட அனைத்து கட்டடங்களிலும், மேலும், சாலை ஓரங்களிலும், பொதுவிடங்களிலும், மழைக்காலத்தில் தண்ணீர் தேங்கும் இடங்களைக் கண்டறிந்து மழைநீர் சேகரிப்பு கட்டமைப்புகளை விரைந்து ஏற்படுத்திட வேண்டும் என அறிவுறுத்தினார்.

நீர்நிலைகள் மற்றும் குளங்களை சுற்றியுள்ள கட்டடங்களில் சேகரிக்கப்படும் மழைநீர், நேரடியாக இந்நீர் நிலைகளில் சென்று சேர்க்கப்பட வேண்டும் எனவும், மனைகளின் பரப்பளவிற்கு ஏற்ப மழைநீர் கட்டமைப்புகள் மற்றும் மழைநீர் சேகரிப்பு தொட்டிகள் ஏற்படுத்திட வேண்டும் எனவும் அறிவுறுத்தினார். ஊரக வளர்ச்சித் துறையின் கட்டுப்பாட்டின் கீழ் 70,368 நீர் நிலைகளான சிறுபாசன ஏரிகள், குளங்கள் மற்றும் குட்டைகள் உள்ளன. இவற்றை முறையாக பராமரித்து அவற்றிலும் மழைநீர் சேகரிக்கும் வகையில் நடவடிக்கைகள் மேற்கொள்ளப்பட வேண்டும் எனவும் தெரிவித்தார்.

இக்கூட்டத்தில் ஊரக வளர்ச்சித் துறை இயக்குனர் க.பாஸ்கரன், ஊரக வளர்ச்சித்துறை கூடுதல் இயக்குனர்கள், மாவட்ட ஊரக வளர்ச்சி முகமை திட்ட இயக்குநர்கள், ஊரக வளர்ச்சித் துறை செயற்பொறியாளர்கள் உட்பட பலர் கலந்து கொண்டனர்.