தற்போதைய செய்திகள்

எம்.எல்.ஏ.க்கள் தொகுதி மேம்பாட்டு நிதி ரூ.3 கோடியாக உயர்வு – பேரவையில் முதல்வர் அறிவிப்பு…

சென்னை:-

சட்டமன்ற உறுப்பினர் தொகுதி மேம்பாட்டு நிதி ரூ.3 கோடியாக உயர்த்தப்படும் என்று சட்டப்பேரவையில் முதலமைச்சர் எடப்பாடி கே.பழனிசாமி அறிவித்தார்.

சட்டப்பேரவையில் வீட்டுவசதி மற்றும் நகர்ப்புற வளர்ச்சித்துறை, பொதுத்துறை மானிய கோரிக்கை மீதான விவாதம் நடைபெற்றது. இந்த விவாதத்தில் மதுரை தெற்கு தொகுதி உறுப்பினர் எஸ்.எஸ்.சரவணன் பேசுகையில் தொகுதி மேம்பாட்டு நிதி தற்போது ரூ.2.50 கோடி வழங்கப்படுகிறது. இதனை ரூ.4 கோடியாக உயர்த்த வேண்டும் என்று கேட்டுக்கொண்டார்.

இதற்கு பதில் அளித்த முதலமைச்சர் எடப்பாடி கே.பழனிசாமி இந்த கோரிக்கையை அனைத்து சட்டமன்ற உறுப்பினர்களும் வைத்துள்ளனர். உறுப்பினர்களின் வேண்டுகோளின்படி சட்டமன்றத் தொகுதி மேம்பாட்டு நிதி ரூ.3 கோடியாக உயர்த்தப்படும்.

இவ்வாறு முதலமைச்சர் எடப்பாடி கே.பழனிசாமி அறிவித்தார்.