தற்போதைய செய்திகள்

கஜா புயலால் பாதிக்கப்பட்ட விவசாயிகளுக்கு விலையில்லா தென்னங்கன்றுகள் – அமைச்சர் ஓ.எஸ்.மணியன் வழங்கினார்…

நாகப்பட்டினம்:-

நாகப்பட்டினத்தில் கஜா புயலால் பாதிக்கப்பட்ட விவசாயிகளுக்கு விலையில்லா தென்னங்கன்றுகளை அமைச்சர் ஓ.எஸ்.மணியன் வழங்கினார்.

நாகப்பட்டினம் மாவட்டம் தலைஞாயிறு ஊராட்சி ஒன்றியம் வெள்ளப்பள்ளம் ஊராட்சி, வானவன்மகாதேவி கிராமத்தில், வேளாண்மைத்துறை சார்பில் கஜா புயலால் பாதிக்கப்பட்ட தென்னை விவசாயிகளுக்கு வாழ்வாதாரத் தொகுப்புத் திட்டத்தின் கீழ் விலையில்லா தென்னங்கன்றுகளை கைத்தறி மற்றும் துணிநூல்துறை அமைச்சர் ஓ.எஸ்.மணியன் வழங்கினார். இந்நிகழ்ச்சிக்கு மாவட்ட ஆட்சித்தலைவர் முனைவர்.சீ.சுரேஷ்குமார் தலைமை வகித்தார்.

விவசாயிகளுக்கு தென்னங்கன்றுகளை வழங்கி அமைச்சர் ஓ.எஸ்.மணியன் பேசியதாவது:-

நாகப்பட்டினம் மாவட்டத்தில் கஜா புயலால் மிகப்பெரிய பாதிப்புக்கு உள்ளான விவசாயப் பெருங்குடி மக்களின் வாழ்வாதாரத்தை பேணி பாதுகாக்கும் விதமாக விழுந்த மரங்களுக்கு ஈடாக புதிய மரங்களை உருவாக்கும் நோக்கோடு புரட்சித்தலைவி அம்மாவின் அரசு மறுசீரமைப்புப் பணிகள் என்ற வகையில் பாதிக்கப்பட்ட அனைவருக்கும் புதிதாக மரங்கன்றுகள் வழங்கப்படுகிறது.

சுனாமி எப்படி கடற்கரையோரம் வாழ்ந்த மக்களை மிகுந்த பாதிப்புக்குள்ளாக்கியதோ, அதேபோல் நம் பகுதியில் வாழ்ந்து வந்த மக்களுக்கு வாழ்வளித்த மரங்களை கஜா புயல் முற்றிலுமாக அழித்து விட்டது. கஜா புயலால் வரும் பாதிப்புகள் இந்த அளவிற்கு இருக்கும் என யாரும் எதிர்பார்க்கவில்லை. ஆனாலும் அரசின் சார்பில் தேவையான எச்சரிக்கை அறிவிப்புகள் விடப்பட்டது.

அன்றை தினம் புயல் வருவதற்கான எவ்வித அறிகுறிகளும் இல்லாமல் தட்பவெட்ப நிலை மிகவும் இயல்பாகவே இருந்தது. இருப்பினும் அரசு சார்பில் பொதுமக்களுக்கு புயல் கரையை கடக்கும் என எதிர்பார்க்கப்பட்ட நேரம் மற்றும் பகுதிகள் குறித்தும் கடற்கரையோர மக்கள் பாதுகாப்பான இடங்களுக்கு செல்லும்படியும், அனைவருக்கும் அடிப்படை வசதிகள் செய்து தரப்படும் என்றும் தேவையான முன்னெச்சரிக்கை நடவடிக்ககைகள் மேற்கொள்ளப்பட்டதன் விளைவாக பெரும் உயிரிழப்புகளை தவிர்த்திருக்கிறோம்.

அதேநேரத்தில் வீடுகள், மரங்கள், கால்நடைகள் என அனைத்து வாழ்வாதாரங்களையும் மக்கள் இழந்து தவித்தனர். அம்மாவின் அரசு எல்லா வகையிலும் பாதிக்கப்பட்ட மக்களுக்கு உரிய உதவிகளை வழங்கியது. தொடர்ந்து மக்களுக்கான மறுவாழ்வுப் பணிகள், பட்டா வழங்குதல், கோவில் நிலங்களில் குடியிருப்பவர்க்கு பட்டா வழங்குதல், அரசு வீடுகள் கட்டித் தர நடவடிக்கை மேற்கொள்ளுதல், மரக்கன்றுகள் வழங்குதல், கோடை காலமாதாலால் சொட்டு நீர் பாசனக் கருவிகள் வழங்குதல் உள்ளிட்ட பணிகளை மேற்கொள்ள நடவடிக்கை மேற்கொள்ளப்பட்டு வருகிறது.

இதுவரை வெள்ளப்பள்ளம் கிராமத்திற்கு 2424 தென்னங்கன்றுகள் 58 பயனாளிகளுக்கு வழங்கப்பட்டுள்ளது. இன்னும் 765 பயனாளிகளுக்கு 28505 தென்னங்கன்றுகள் வழங்கப்பட உள்ளன. இக்கிராமத்தில் தென்னை நிவாரணத் தொகையாக 4 கோடியே 17 லட்சத்து 21 ஆயிரத்து 900 ரூபாய் வழங்கப்பட்டுள்ளது.விவசாயிகள் தங்கள் மரக்கன்றுகளை பெற்றுக் கொண்டு, வேளாண்மைத்துறை அலுவலர்களின் அறிவுரையோடு உரிய எண்ணிக்கையில் மரக்கன்றுகளை நட்டு, அவற்றை நல்லவிதமாக வளர்த்திட வேண்டும். மேலும் இந்த மரக்கன்றுகளை வளர்ந்து வரும் வரையில் அரசு தொடர்ந்து அனைத்து உதவிகளையும் செய்யும்.

இவ்வாறு அமைச்சர் ஓ.எஸ்.மணியன் பேசினார்.

இந்நிகழ்ச்சியில் வேளாண்மை இணை இயக்குநர் எம்.நாராயணசாமி, துணை இயக்குநர் பன்னீர்செல்வம், உதவி இயக்குநர் கருப்பையா, தலைஞாயிறு தொடக்க வேளாண்மை கூட்டுறவு வங்கித் தலைவர் ஆர்.பாலசுப்பிரமணியன், செய்தி மக்கள் தொடர்பு அலுவலர் மீ.செல்வகுமார், வட்டார வளர்ச்சி அலுவலர்கள், வட்டாட்சியர் உள்பட பொதுமக்கள் பலர் கலந்து கொண்டனர்.