தற்போதைய செய்திகள்

முதலமைச்சரின் சிறப்பு குறை தீர்க்கும் திட்டம்: தண்டோரா மூலம் பொதுமக்களுக்கு அறிவிப்பு – அமைச்சர் எம்.ஆர்.விஜயபாஸ்கர் தகவல்…

கரூர்:-

முதலமைச்சரின் சிறப்பு குறை தீர்க்கும் திட்டம் நடைபெறும் தேதி குறித்து தண்டோரா மூலம் பொதுமக்களுக்கு அறிவிக்கப்படும் என்று அமைச்சர் எம்.ஆர்.விஜயபாஸ்கர் தெரிவித்தார்.

மக்களைத்தேடி மாவட்ட நிர்வாகம் என்ற உன்னத நோக்கத்தில் அனைத்து தரப்பு மக்களின் கோரிக்கைகளையும் நிறைவேற்ற வேண்டும் என்ற உயரிய நோக்கத்தில் முதலமைச்சரால் 19.08.2019 அன்று சேலம் மாவட்டத்தில் முதலமைச்சரின் சிறப்பு குறை தீர்க்கும் திட்டம் தொடங்கி வைக்கப்பட்டது.

அதனடிப்படையில், கரூர் மாவட்டத்தில் கரூர் நகராட்சி 1,2,3,4,5 வார்டு மற்றும் மண்மங்கலம் வட்டம் கோயம்பள்ளியில் முதலமைச்சரின் சிறப்புகுறை தீர்க்கும் திட்ட முகாம் நடைபெற்றது. முகாமிற்கு மாவட்ட ஆட்சித்தலைவர் த.அன்பழகன் தலைமை வகித்தார். போக்குவரத்துத்துறை அமைச்சர் எம்.ஆர்.விஜயபாஸ்கர் கலந்து கொண்டு பொதுமக்களை நேரில் சந்தித்து மனுக்களை பெற்றுக் கொண்டார்.

இந்நிகழ்ச்சியில் அமைச்சர் எம்.ஆர்.விஜயபாஸ்கர் பேசியதாவது:-

முதலமைச்சர் அனைத்து தரப்பு மக்களின் கோரிக்கைகளும் விரைந்து நிறைவேற்றப்பட வேண்டும் என்ற உன்னத நோக்கத்தில், இந்த சிறப்பு குறை தீர்க்கும் திட்டத்தை அறிவித்துள்ளார். இத்திட்டத்தின் கீழ், கரூர் மாவட்டத்தின் அனைத்து பகுதிகளிலும், கிராமம் கிராமமாக அரசுத்துறை அலுவலர்கள் நேரடியாக பொதுமக்களை சந்தித்து அவர்களிடமிருந்து கோரிக்கை மனுக்களை பெறுவார்கள். எந்தெந்த பகுதிகளில் எந்தெந்த தேதிகளில் மனுக்கள் அரசுத்துறை அலுவலர்கள் மனுக்களை பெறவுள்ளனர் என்ற தகவலை சம்மந்தபட்ட பகுதிகளில் உள்ள மக்களுக்கு முன்கூட்டியே தண்டோரா மூலமோ அல்லது ஒலிபெருக்கி விளம்பரங்கள் வாயிலாகவோ எடுத்துக்கூறி விழிப்புணர்வு ஏற்படுத்தப்படும்.

அவ்வாறு பெறப்படும் மனுக்கள் அனைத்தும் அன்றையதினமே, இத்திட்டத்திற்கென்று பிரத்யேகமாக தயாரிக்கப்பட்டுள்ள மனுக்களை ஆன்லைனில் பதிவு செய்யும் முறையில் பதிவுசெய்து, சம்மந்தப்பட்ட துறை அலுவலர்களுக்கு அனுப்பி வைக்கப்படும். இந்த மனுக்களின் மீது உரிய விசாரணை செய்து, தகுதிவாய்ந்த நபர்களுக்கு அவர்களின் கோரிக்கைகளை ஒரு மாத காலத்திற்குள் நிறைவேற்றித்தரும் வகையில், சம்பந்தப்பட்ட துறையின் அலுவலர்கள் நடவடிக்கை எடுக்க வேண்டும் என்று முதலமைச்சர் உத்தரவிட்டுள்ளார். விதிகளுக்குட்பட்டு அரசின் உதவிகளை பெற தகுதிவாய்ந்த நபர்கள் தேர்ந்தெடுக்கப்பட்டு அனைவருக்கும் உரிய நலத்திட்ட உதவிகள் செப்டம்பர் மாதம் வழங்கப்படவுள்ளது.

கரூர் மாவட்டத்திற்கு பல நல்ல திட்டங்களை வாரி வழங்கும் முதலமைச்சராக நமது முதலமைச்சர் இருக்கிறார். சுமார் 300 கோடியில் புதிய அரசு மருத்துவக்கல்லூரி மருத்துவமனை, காவேரியில் சுமார் 500 கோடி மதிப்பீட்டில் புதிய கதவணை கட்ட அனுமதி, கரூர் மாவட்டத்திற்கு புகளூர் புதிய தாலுகா, அரவக்குறிச்சி பகுதியில் ரூ.250 கோடி மதிப்பில் குடிநீர் திட்டப்பணிகள், தாந்தோணி பகுதிக்கு ரூ.81.4கோடி மதிப்பில் குடிநீர் திட்டப்பணிகள்,

நெரூர் உன்னியூர் பாலம், நெரூர் மற்றும் குளித்தலை பகுதியில் தலா ஒரு கதவணைகள் கட்ட ஆய்வு செய்து திட்ட அறிக்கை தாக்கல் செய்ய ரூ.50 லட்சம் ஒதுக்கீடு என இன்னும் பல திட்டங்களை கரூர் மாவட்டத்திற்காக வழங்கியவர் முதலமைச்சர். கரூர் மாவட்டத்தில் ஏற்கனவே உள்ள மாயனூர் கதவணையோடு சேர்த்து புதிதாக 3 கதவணைகள் என மொத்தம் நான்கு கதவணைகள் அமையும்போது, மொத்தமாக 5 டி.எம்.சி தண்ணீரை தேக்கக்கூடிய மாவட்டமாக கரூர் மாவட்டம் இருக்கும்.

இவ்வாறு அமைச்சர் எம்.ஆர்.விஜயபாஸ்கர் பேசினார்.

இந்நிகழ்ச்சியில் கிருஷ்ணராயபுரம் சட்டமன்ற உறுப்பினர் ம.கீதா, திருச்சிராப்பள்ளி மத்திய கூட்டுறவு வங்கித்தலைவர் ஏ.ஆர்.காளியப்பன், கரூர் நகர கூட்டுறவு வங்கித்தலைவர் திருவிக, மொத்த கூட்டுறவு விற்பனை பண்டகசாலை தலைவர் நெடுஞ்செழியன், தளவாபாளையம் கூட்டுறவு வங்கித்தலைவர் ரேணுகா, கரூர் நகராட்சி ஆணையர் ராஜேந்திரன், கரூர் வருவாய் கோட்டாட்சியர் சந்தியா, சமூக பாதுகாப்பு திட்ட துணை ஆட்சியர் சரவணமூர்த்தி, மண்மங்கலம் வட்டாட்சியர் ரவிக்குமார். முன்னாள் சட்டமன்ற உறுப்பினர் காமராஜ், கூட்டுறவு சங்கபிரதிநிதிகள் கமலகண்ணன், வி.சி.கே.ஜெயராஜ், தமிழ்நாடு செல்வராஜ், மல்லிகா உள்ளிட்ட பலர் கலந்து கொண்டனர்.