தற்போதைய செய்திகள்

மரக்கன்றுகளை நட்டு பராமரிக்கும் 30 பள்ளிகளுக்கு தலா ரூ.10 ஆயிரம் : அமைச்சர்கள் பி.தங்கமணி, டாக்டர் வெ.சரோஜா வழங்கினர்

நாமக்கல்:-

நாமக்கல் மாவட்டத்தில் மரக்கன்றுகளை நட்டு பராமரிக்கும் 30 பள்ளிகளுக்கு தலா ரூ.10 ஆயிரம் சிறப்பு நிதியை அமைச்சர்கள் பி.தங்கமணி, டாக்டர் வெ.சரோஜா ஆகியோர் வழங்கினர்.

நாமக்கல் மாவட்ட ஆட்சியர் அலுவலக கூட்டரங்கில் அனைத்து துறை அலுவலர்களுக்கான ஆய்வுக்கூட்டம் மாவட்ட ஆட்சித்தலைவர் கா.மெகராஜ் தலைமையில் நடைபெற்றது. நாமக்கல் நகர கழக செயலாளரும், தொகுதி சட்டமன்ற உறுப்பினருமான கே.பி.பி.பாஸ்கர், மாவட்ட ஊராட்சி குழுத்தலைவர் ஆர்.சாரதா, நாமக்கல் மாவட்ட கழக அவைத்தலைவரும், மாவட்ட ஊராட்சிக்குழு துணைத்தலைவரும், முன்னாள் நாடாளுமன்ற உறுப்பினருமான பி.ஆர்.சுந்தரம் ஆகியோர் முன்னிலை வகித்தனர்.

இக்கூட்டத்தில் கழக அமைப்பு செயலாளரும், நாமக்கல் மாவட்ட கழக செயலாளரும், மின்சாரம், மதுவிலக்கு மற்றும் ஆயத்தீர்வைத்துறை அமைச்சருமான பி.தங்கமணி, கழக மகளிர் அணி இணைச் செயலாளரும், சமூக நலன் மற்றும் சத்துணவு திட்டத்துறை அமைச்சருமான டாக்டர் வெ.சரோஜா ஆகியோர் பங்கேற்று ஊரக வளர்ச்சித்துறை, வருவாய்த்துறை, தமிழ்நாடு குடிநீர் வடிகால் வாரியம் உள்ளிட்ட பல்வேறு துறைகளின் மூலம் மேற்கொள்ளப்பட்டு வரும் பணிகளின் முன்னேற்றம், தற்போதைய நிலை, மாவட்டம் முழுவதும் குடிநீர் வடிகால் வாரியம், நகராட்சிகள், பேரூராட்சிகள், ஊராட்சி ஒன்றியங்கள் உள்ளிட்ட உள்ளாட்சி அமைப்புகளின் மூலம் தற்போது வழங்கப்பட்டு வரும் குடிநீர் விநியோகம் மற்றும் வரும் கோடை காலத்தில் பொதுமக்களுக்கு குடிநீர் வழங்க செய்யப்பட்டுள்ள முன்னேற்பாடுகள் குறித்து விரிவாக ஆய்வு மேற்கொண்டனர்.

ஞானமணி தொழில்நுட்ப கல்லூரியின் கட்டட பொறியியல் துறையில் பயின்ற ர.கிருத்திகா என்ற மாணவி தனது ஆய்வின் மூலம் கான்கிரீட்டை பயன்படுத்தி காற்று மாசுபடுதலை கட்டுபடுத்தும் முறையை கண்டறிந்துள்ளார். இந்த தொழில்நுட்பத்தை மேம்படுத்த ஆராய்ச்சி மேற்கொள்ள பொறியியல் பட்டதாரிகளுக்கு அரசு வழங்கும் ஆராய்ச்சிக்கான நிதிஉதவி ரூ.2 லட்சம் பெறவதற்கு விண்ணப்பிக்க, ஆராய்ச்சி மேற்கொள்பவரின் பங்களிப்பு தொகையான ரூ.50,000 தனக்கு தேவைப்படுவதாகவும், அதற்கு நிதி வழங்கி உதவுமாறு முதலமைச்சருக்கு சேலத்தில் அளித்த கோரிக்கை மனுவானது, சேலம் மாவட்ட ஆட்சித்தலைவருக்கு சென்றது.

அந்த கோரிக்கை மனுவானது பொறியியல் பட்டதாரி மாணவியின் சொந்த மாவட்டமான நாமக்கல் மாவட்ட ஆட்சித்தலைவருக்கு வழங்கப்பட்டது. அதன் அடிப்படையில் நாமக்கல் மாவட்ட ஆட்சித்தலைவர் கா.மெகராஜ், கழக அமைப்பு செயலாளரும், நாமக்கல் மாவட்ட கழக செயலாளரும், மின்சாரம், மதுவிலக்கு மற்றும் ஆயத்தீர்வைத்துறை அமைச்சருமான பி.தங்கமணியிடம் தெரிவித்த நிலையில், அமைச்சர் மாணவியின் ஆராய்ச்சிக்கு உதவ தானே ரூ.50,000 தனது சொந்த நிதியில் இருந்து வழங்குவதாக தெரிவித்தார். இந்த ஆய்வுக்கூட்டத்தில் பொறியியல் பட்டதாரி மாணவி ர.கிருத்திகா, தொழில்நுட்பத்தை மேன்மைபடுத்தும் வகையில் ஆய்வுகளை மேற்கொள்ள அமைச்சர் பி.தங்கமணி ரூ.50,000-க்கான காசோலையினை வழங்கினார்.

மேலும் இந்த நிகழ்ச்சியில் சாலை பாதுகாப்பு வார விழாவையொட்டி மாவட்ட அளவில் அரசுப்பள்ளி மாணவ, மாணவியர்களுக்கு நடத்தப்பட்ட பேச்சுப்போட்டி, சுலோகன் போட்டி, ஓவியப் போட்டிகளில் முதல் 3 இடம் பிடித்த மாணவ, மாணவிகளுக்கு பரிசு மற்றும் பாராட்டு சான்றிதழ்களையும், சாலை பாதுகாப்பு வார விழாவையொட்டி சாலை பாதுகாப்பு விழிப்புணர்வு குறும்படத்தை உருவாக்கி காவல்துறைக்கு வழங்கிய இயக்குநர், தயாரிப்பாளர், இசைஅமைப்பாளர், நடிகர், நடிகைகள் உள்ளிட்ட குழுவினருக்கு பாராட்டு சான்றிதழ்களையும் அமைச்சர்கள் வழங்கினர்.

அதனைத் தொடர்ந்து நாமக்கல் கல்வி மாவட்டம் மற்றும் திருச்செங்கோடு கல்வி மாவட்டத்தில் (2017-2019) தேசிய பசுமைப்படை மூலம் தலா 50 மரங்கள் நட்டு பராமரிக்கும் 30 பள்ளிகளுக்கு சிறப்பு நிதியாக தலா ரூ.10,000-த்தை அமைச்சர்கள் வழங்கினர்.

அரசு மற்றும் அரசு உதவிபெறும் பள்ளிகளில் 10-ம் வகுப்பு மற்றும் 12-ஆம் வகுப்பு மாணவர்களில் தமிழ்வழியில் பயின்று தேர்ச்சி பெற்ற சிறந்த மாணவர்களுக்கான கல்வி செயல்பாடுகள் உள்ளிட்ட பிற தனித்திறன் உடைய மாணவர்களை ஊக்குவிக்கும் வகையில் 2018-19-ம் கல்வியாண்டில் 10-ம் வகுப்பு பயின்ற 15-மாணவர்களுக்கு தலா ரூ.10,000-ம், 12- ஆம் வகுப்பு பயின்ற 15-மாணவர்களுக்கு தலா ரூ.20,000-மும் அமைச்சர்கள் வழங்கினர்.

மேலும் நாமக்கல் மாவட்டம், நல்லிபாளையம், எம்.ஜி.ஆர். காலனியில் வசித்து வரும் கமலவேணி என்பவரின் கணவர் ஜி.சிவலிங்கம் 15.01.2020 அன்று சேலம் சாலையில் நடந்த விபத்தின் காரணமாக கடந்த 19.01.2020 அன்று காலமானார். அவரது இதயம், சிறுநீரகங்கள் ஆகிய உடல் உறுப்புகள் தானம் செய்யப்பட்டு 3 நபர்களுக்கு மறுவாழ்வு அளிக்கப்பட்டது. ஏழ்மை நிலையிலும் தனது கணவரின் உடலுறுப்புகளை தானமாக வழங்கி 3 நபர்களின் வாழ்க்கைக்கு உதவிய சேவையினை பாராட்டியும், சிறப்பிக்கும் வகையிலும் ஜி.சிவலிங்கம் மனைவி கமலவேணி என்பவருக்கு மாதாந்திர ஓய்வூதியம் ரூ.1,000 பெறுவதற்கான ஆணையினை அமைச்சர்கள் வழங்கினர்.

நாமக்கல் நாடாளுமன்ற முன்னாள் உறுப்பினர் பி.ஆர்.சுந்தரம் தொகுதி மேம்பாட்டு நிதி 2018-19-ன் கீழ் ரூ.6 லட்சம் மதிப்பீட்டில் பொது மருத்துவத்துறையின் பயன்பாட்டில் பொதுமக்களுக்கு உதவிசெய்யும் வகையிலான அமரர் ஊர்தியை பரமத்தி வேலூர் லயன்ஸ் கிளப்பிற்கு அமைச்சர்கள் வழங்கினர்.