தற்போதைய செய்திகள்

உலக அளவில் பொருளாதார வளர்ச்சியில் தமிழகம் 2-வது இடம் – அமைச்சர் எம்.சி.சம்பத் பெருமிதம்

கடலூர்

உலக அளவில் பொருளாதார வளர்ச்சியில் தமிழகம் இரண்டாவது இடத்தில் உள்ளது என்று அமைச்சர் எம்.சி.சம்பத் பெருமிதத்துடன் கூறினார்.

கடலூர் மத்திய மாவட்ட கழக மாணவரணி சார்பில் மொழிப்போர் தியாகிகளுக்கு அஞ்சலி செலுத்தும் வகையில் வீரவணக்க நாள் பொதுக்கூட்டம் மஞ்சகுப்பம் மணிக்கூண்டு எம்.ஜி.ஆர். சிலை அருகில் நடைபெற்றது. இந்த கூட்டத்திற்கு மாவட்ட மாணவரணி செயலாளர் எஸ்.கலையரசன் தலைமை தாங்கினார். குறிஞ்சிப்பாடி கிழக்கு ஒன்றிய கழக செயலாளர் கே.ஜி.பாஷ்யம், நெய்வேலி நகர கழக செயலாளர் கோவிந்தராஜ், குறிஞ்சிப்பாடி பேரூர் கழக செயலாளர் ஆனந்தபாஸ்கர், மாவட்ட மாணவர் அணி இணை செயலாளர் அன்பு. எழில்முருகன், நகர மாணவரணி செயலாளர் எரிதழல் பி.சிவா, ஒன்றிய மாணவரணி செயலாளர்கள் ராபர்ட், விஜயராயலு ஆகியோர் முன்னிலை வகித்தனர்.

கடலூர் நகர கழக செயலாளர் ஆர்.குமரன் வரவேற்புரை நிகழ்த்தினார். இந்த கூட்டத்தில் தொழில்துறை அமைச்சரும், கடலூர் மத்திய மாவட்ட செயலாளருமான எம்.சி.சம்பத், கழக செய்தி தொடர்பாளர் ஆர்.எம்.பாபு முருகவேல், தலைமை கழக பேச்சாளர் வி.ஜி.ஆர்.ராமதாஸ் ஆகியோர் சிறப்புரை ஆற்றினர்.

இந்த கூட்டத்தில் அமைச்சர் எம்.சி.சம்பத் பேசியதாவது:-

மொழிதான் ஒரு தனி மனிதனின் அடையாளம். நாடும் மொழியும் தான் ஒரு மனிதனை எங்கிருந்தாலும் வேறுபடுத்தி காட்டும். உலகத்தில் மிக பழமையான மொழிகளாக சமஸ்கிருதமும் தமிழும் உள்ளன. இதில் தமிழ்தான் அதிக மக்களால் பேசப்படுகின்ற மொழியாக உள்ளது. தமிழுக்கு அமுதென்று பேர் அந்த தமிழ் இன்பத் தமிழ் எங்கள் உயிருக்கு நேர் என்று பாடினார் பாவேந்தர் பாரதிதாசன். மொழியை உயிருக்கு நிகராக நேசித்தவர்கள் கவிஞர்கள் என்பது இதன் மூலம் நமக்கு தெரிகின்றது. தமிழ் மொழி தொன்மை வாய்ந்தது என்பதை நமக்கு தொல்காப்பியமும் திருக்குறளும் அடையாளப்படுத்துகின்றன.

சீன நாட்டு பிரதமர் சமீபத்தில் மகாபலிபுரம் வந்தார். அப்போது அவர் 2000 ஆண்டுகளுக்கு முன்பு தமிழக பகுதிகளும், சீனமும் தொடர்பில் இருந்துள்ளன என்று கூறினார். அதன்பிறகு சீனர்கள் தமிழ்நாட்டை உற்றுநோக்கும் நிலை உள்ளது. சீன பிரதமர் வந்தபிறகு வாரந்தோறும் அரசு அதிகாரிகளும், தொழிலதிபர்களும் தமிழ்நாட்டிற்கு வந்து செல்லும் நிலை உள்ளது. தமிழ்நாட்டில் இருப்பது போன்று கல் சிற்பங்கள் சீனாவிலும் உள்ளன. இது தமிழர்களின் தொன்மையை காட்டுகின்றது.

புரட்சித்தலைவி அம்மா அவர்கள் ஹார்வர்டு பல்கலைக்கழகத்திற்கு தமிழ் இருக்கை அமைப்பதற்கு 10 கோடி ரூபாய் தந்து தமிழை ஆராய்ச்சி செய்யும் மாணவர்களுக்கு ஊக்கம் அளித்தார். தஞ்சையில் தமிழ் பல்கலைக்கழகம் அமைத்துள்ளார். உலகத் தமிழ் மாநாட்டை அண்ணாவும், புரட்சித் தலைவரும், அம்மாவும் நடத்தி தமிழுக்குப் பெருமை சேர்த்தார்கள்.

தமிழக அரசு வாஷிங்டனில் யாதும் ஊரே என்ற ஒரு நிகழ்ச்சியை நடத்தியது. இதன் நோக்கம் உலகமெங்கும் வாழும் தமிழர்களை, தமிழ் அறிவை ஒன்றிணைப்பது. உலகத்தில் உள்ள அனைத்து நாடுகளிலும் உள்ள தனியார் கம்பெனிகளில் இரண்டாம் இடங்களில், மூன்றாம் இடங்களில் தமிழர்களே உள்ளனர். தமிழர்களின் மூளைக்காகவே அவர்கள் அங்கு பணியமர்த்தப்படுகிறார்கள். கூகுள் நிறுவனத்தில் தலைமை செயல் அதிகாரியாக வேலை பார்க்கும் சுந்தர் பிச்சை தமிழர் என்பது நமக்கெல்லாம் மிகவும் பெருமை வாய்ந்த விஷயம். இங்கிலாந்து நாட்டிலுள்ள லண்டனில் கடலூர் மாவட்டத்தில் அவதரித்த வள்ளலாரின் திருச்சபை உள்ளது. இவையெல்லாம் தமிழ் எந்த அளவிற்கு தொன்மை வாய்ந்த மொழி என்பதை நமக்கு காட்டுகிறது.

கடலூரில் ஹால்தியா என்ற பெட்ரோ கெமிக்கல் தொழிற்சாலை வர முயற்சிகளை மேற்கொண்டுள்ளோம். ரூ.50,000 கோடி முதலீட்டில் இந்த தொழிற்சாலை வர உள்ளது. இந்த தொழிற்சாலை வந்தால் கடலூர் நகராட்சியின் தரம் உயரும். கடலூரில் உள்ள மக்களின் தனிநபர் வருமானமும் உயரும். தூத்துக்குடியில் அல்கிராபி பெட்ரோகெமிக்கல் என்ற ஒரு நிறுவனம் ரூ.49 ஆயிரம் கோடியில் வர உள்ளது. இதற்காக ஒப்பந்தம் கையெழுத்தாகியுள்ளது. இதன் மூலம் 20 ஆயிரம் பேருக்கு வேலை கிடைக்கும். பழைய மகாபலிபுரம் சாலையில் மென்பொருள் பூங்கா வரவுள்ளது. இதன்மூலம் 70,000 பேருக்கு சென்னையில் வேலை கிடைக்கும். இதன் மூலம் சென்னையின் தரம் உயரும் சூழ்நிலை உள்ளது. தொழில் துறை மூலம் தமிழகம் சிறப்பான வளர்ச்சியை பெற்றுள்ளது. உலக அளவில் பொருளாதார வளர்ச்சியில் தமிழகம் 8.4 சதவீதம் பெற்று இரண்டாம் இடத்தில் உள்ளது.

மத்திய மாவட்ட கழகத்தின் அலுவலகம் ஒன்று விரைவில் திறக்கப்பட உள்ளது. இந்த அலுவலகத்தில் அரசுத் தேர்வு எழுதும் மாணவர்களுக்கு இலவச பயிற்சி வகுப்புகள் நடத்தப்பட உள்ளன. அறிவார்ந்த ஆசிரியர்களை கொண்டு இங்கு பயிற்சி வகுப்புகள் நடத்தி மாணவர்களை போட்டித்தேர்வுக்கு பட்டை தீட்டி அனுப்பும் பணியை செய்ய உள்ளோம். ஓய்வுபெற்ற இந்திய ஆட்சிப்பணி அதிகாரிகள் இங்கு வாரந்தோறும் ஆய்வு செய்து மாணவர்களை போட்டித் தேர்வுக்கு சிறப்பாக தயார் செய்யும் பணியை கழகம் விரைவில் மேற்கொள்ளும் என்று இந்த மாணவர்கள் கூட்டத்தில் தெரிவித்துக்கொள்கிறேன்.

இவ்வாறு அமைச்சர் எம்.சி.சம்பத் பேசினார்.